Ñaporomboʼékena Mboʼehára Guasu ojapohaguéicha jaiporu vove lívro Mbaʼépa omboʼe la Biblia?
1. Mbaʼéichapa omboʼevaʼekue Jesús?
1 Jesús, pe Mboʼehára Guasu omboʼevaʼekue oñentende porã hag̃uáicha. Omopensa hag̃ua umi ohendúvape chupe, sapyʼánte oporandu raẽ mbaʼépa heʼi hikuái peteĩ mbaʼére (Mat. 17:24-27). Haʼe ningo omboʼevaʼekue Ñandejára Ñeʼẽ heʼíva (Mat. 26:31; Mar. 7:6). Saʼi saʼípe omboʼevaʼekue hemimboʼekuérape, ohechakuaágui mbeguekatúpemante oikuaavetaha hikuái ohóvo (Juan 16:12). Jesús oñatende avei ohecha hag̃ua oguerovia ha ontendepahína hikuái umi mbaʼe omboʼéva chupekuéra (Mat. 13:51). Pe lívro Mbaʼépa añetehápe omboʼe la Biblia? ojejapo ikatu hag̃uáicha ñaporomboʼe Jesús omboʼehaguéicha.
2. Mbaʼéichapa ikatu jaiporu umi porandu oĩva oñepyrũvo pe kapítulo?
2 Umi Porandu iñimportantevéva. Jastudia vove peteĩ kapítulo ñande rapicha ndive, iporãvaʼerã jahecha hendive umi porandu oĩva iñepyrũme. Umi ostudiáva oikuaaseve hag̃ua ikatu jalee chupe umi porandu, térã jajerure chupe tombohovái mbykymi. Natekotevẽi jajesarekoiterei umi mbaʼe heʼívare térã jakorrehi voi chupe ojavyhápe. Jaagradesentevaʼerã chupe heʼihaguére opensáva ha ñañemoĩma jastudia hendive. Upe heʼivaʼekuére jahechakuaáta mbaʼépa ñamyesakã porãve vaʼerã chupe.
3. Mbaʼéichapa ikatu ñamboʼe ñande rapichápe ontende porã hag̃uáicha?
3 Téysto oñemoĩva. Jaiporu memevaʼerã Ñandejára Ñeʼẽ jastudia jave ñande rapicha ndive (Heb. 4:12). Natekotevẽi jaleepa umi téysto oñemoĩva guive. Jaleevaʼerã umi ohechaukáva mbaʼérepa jaguerovia peteĩ mbaʼe. Umi téysto oñeʼẽva heta mbaʼére sapyʼánte natekotevẽvéima jalee. Pe lívro Mbaʼépa omboʼe la Biblia? omyesakã Ñandejára Ñeʼẽ oñentende porã hag̃uáicha, aníkena ñande ñambohasýtei. Ñamyesakã porã vaʼerã umi mbaʼe iñimportantevéva ha ani ñañeʼẽterei peteĩ mbaʼérente. Avei natekotevẽiramo ndajaiporuvaʼerãi ótro informasión ñañeʼẽve hag̃ua upe jastudiávare.
4. Mbaʼéichapa jaikuaáta ñahesaʼỹijótapa ñane estudiánte ndive pe informasión oĩvéva?
4 Informasión oĩvéva. Ko informasión oĩvéva oreko catorce téma ñanepytyvõva ñantende porãve hag̃ua umi kapítulo heʼíva. Jajaposérõnte koʼãva ikatu ñahesaʼỹijo jastudia jave. Térã ikatúnte ñamokyreʼỹ ñane estudiántepe olee hag̃ua haʼeño, koʼýte hesakã porãmaramo chupe upe jastudiáva hína. Ñamoĩ chupe oroviaha Jesús haʼeha pe Mesías, upéicharõ jastudia vove hendive kapítulo 4, “Mávapa Jesucristo”, natekotevẽvéima ñahesaʼỹijo hendive pe párte heʼihápe “Jesucristo pe Mesías oñeprometevaʼekue”. Sapyʼánte ikatu jahecha jastudia jave tekotevẽha ñahesaʼỹijo hendivekuéra ko informasión oĩvéva.
5. Ñahesaʼỹijótaramo informasión oĩvéva, mbaʼéichapa ikatu jajapo?
5 Ñahesaʼỹijótaramo ñane estudiánte ndive pe informasión oĩvéva, oĩ porãta japreparáramo porandu jastudia hag̃ua. Ikatúnte avei ñahesaʼỹijoʼimi jepi hendive jastudia jave, jahechakuaáramo upéicha iporãvetaha. Jajapóramo koʼã mbaʼe, jahecháta hesakã porãpa hína chupe oleéva.
6. Mbaʼéichapa ikatu jaiporu pe rrekuádro ñamohuʼã vove peteĩ kapítulo?
6 Mbaʼéichapa ikatu jaiporu rrekuádro oĩva ñane manduʼa jey hag̃ua. Pe rrekuádro heʼihápe ‘Mbaʼépa omboʼe la Biblia’, katuete ombohovái umi porandu oĩva umi kapítulo oñepyrũvo. Ikatu jaiporu upéva ñanemanduʼa jey hag̃ua umi mbaʼe iñimportantevévare. Heta puvlikadór ohechakuaa oipytyvõha iñestudiántepe oleéramo hendive upe rrekuádrope oĩva, ikatu voi olee umi téysto oĩva ijykére. Ha upe rire ojerure iñestudiántepe oñeʼẽmi hag̃ua upe téysto heʼívare. Jajapóramo péicha jahechakuaáta hesakãpa chupekuéra umi mbaʼe iñimportantevéva ha mbaʼe téystopepa oĩ, upéicha avei jahecháta oroviapahína umi mbaʼe. Oiporukuaavéta avei Ñandejára Ñeʼẽ omyesakã hag̃ua hapichakuérape Ñandejára ojeruréva.
7. Mbaʼéichapa ñanepytyvõta pe lívro Mbaʼépa omboʼe la Biblia? ñamboʼe hag̃ua Jesús ojapohaguéicha?
7 Ñamboʼéramo ñande rapichápe Jesús ojapohaguéicha, ñaipytyvõ porãvéta chupe oikuaa hag̃ua Jehovápe. Ha upéicha oikóta chugui Ñandejára rembiguái (Mat. 28:19, 20). Pe lívro Mbaʼépa omboʼe la Biblia? ñanepytyvõta jajapo hag̃ua upéicha. Jaiporukuaákena ñamboʼe hag̃ua pe añetegua igústo ha oñentende porã hag̃uáicha.