Oñeporandúva jepi

◼ Mbaʼépa jajapokuaa enterovéva ñañatende porãve hag̃ua rreunionhápe? (Deu. 31:12.)

Jehová ningo ñanerekomboʼe umi rreunión rupive, ha jahechauka hag̃ua ñamombaʼeha upéva, tekotevẽ ñag̃uahẽ jepi voi porã. Avei iporãta jaguapýramo tenonde gotyo, péicha oĩramo orekóva mitã térã sapyʼánte og̃uahẽva tardeve ikatu oguapy hapykue gotyo. Tekotevẽ avei oñepyrũ mboyve pe rreunión ñambogue térã ñamoĩma kirirĩhápe ñande selulár. Enterove ñañehaʼãramo ñamombaʼe ñane rreunión, nañamolestamoʼãi avavépe ha maymáva ikatúta ñañatende porã (Ecl. 5:1; Fili. 2:4).

Oĩ jave ou ramóva salónpe iporãta peteĩ ermáno oikuaáva chupe oguapýrõ ijykére. Péva tuicha oipytyvõta oimérõ pe ou ramóva oreko mitã michĩva. Koʼãva ndojepokuaái jepi oĩ ãichagua rreuniónpe ha upévare ovyʼavéta oguapýramo hapykue gotyo. Péicha umi túva naiprovlemamoʼãi tekotevẽramo osẽ okápe sapyʼaite oñatende hag̃ua umi mitãre (Pro. 22:​6, 15). Naiporãmoʼãi koʼã família oguapy ambue kotýpe, ani hag̃ua umi mitã oimoʼã upépe ikatuha ohuga ha ijayvu. Iporãvéta isy térã itúva osẽramo sapyʼami okápe pe mitã reheve, okorrehiʼimi térã omeʼẽ chupe oikotevẽva ha upéi oike jey salónpe.

Umi akomodadór oipytyvõ avei enterove ojesareko porã hag̃ua rreunionhápe. Haʼekuéra oipytyvõ umi famíliape otopa hag̃ua iñasientorã, avei ohecha moõpa oguapykuaa umi sapyʼánte og̃uahẽva tárde. Koʼã ermáno pyʼaporãme ha kirirĩhaitépe ohechauka umi og̃uahẽvape moõpa ikatu oguapy. Péicha noñemolestái avavépe ha enterove ikatu oñatende porã. Oikóramo sapyʼa peteĩ mbaʼe oñehaʼaroʼỹva ha upéva káusare ndaikatúi oñeñatende porã rreunionhápe, umi akomodadór oñehaʼã osolusiona iporãveháicha. Ha peteĩ mitã iñakãhatãramo salónpe, haʼekuéra pyʼaporãme ohecha mbaʼépa ojapóta oipytyvõ hag̃ua itúva térã isýpe.

Jahechaháicha, enterove jaháva salónpe ikatu ñaipytyvõ ñañatende porãve hag̃ua rreunionhápe. Péicha Jehová ñanerekomboʼéta ha jaikuaa porãvéta mbaʼéichapa haʼe oguerúta peteĩ múndo pyahu oĩháme pyʼaguapy ha tekojoja (Heb. 10:​24, 25).