Ñañembokatupyrýkena ñaporomboʼekuaa hag̃ua

Katuete ningo enterovéva ñaporomboʼe porãse ikatu hag̃uáicha ñaipytyvõ umi héntepe oikuaa ha ohayhu hag̃ua Jehovápe. Mbaʼéichapa ikatu jajapo upéva? Tekotevẽ ñahaʼanga Mboʼehára Guasu Jesucrístope (Luc. 6:40). Opa mbaʼe haʼe heʼi ha ojapóva opokoiterei umi héntere. Jesús omombaʼapo umi hénte akã og̃uahẽ porãve hag̃ua ikorasõmekuéra pe marandu. Avei omyesakã porãiterei chupekuéra mbaʼe mbaʼépa ojapokuaa iñeʼẽrendu hag̃ua Ñandejárape. Ikatúpa ñande avei jajapo upéicha?

Jajerovia Jehováre. Jesús ningo oporomboʼe porãiterei vaʼekue Itúva omeʼẽgui chupe ipytu marangatu ha ojerovia mbarete rupi Hese. Ha nde, reñemboʼépa nde pyʼaite guive Ñandejárape nepytyvõ hag̃ua rejapo jave peteĩ estúdio, peteĩ diskúrso térã remoakãta jave rreunión? Rehechaukáramo rejeroviaha nde pyʼaite guive Ñandejárare, haʼe nepytyvõta ndekatupyryve hag̃ua reporomboʼéta vove.

Iñimportanteterei avei jaiporu meme Ñandejára Ñeʼẽ ñaporomboʼéta jave. Pór ehémplo, Jesús iñaranduetereíramo jepe nomboʼéi mbaʼevete ijeheguireínte. Upéicharõ jahechakuaa Ñandejára Ñeʼẽ añoite ikatuha okambia ñande rapichakuéra rekove. Opoko rupi hemiandúre, og̃uahẽ hiʼánga rugua meve ha omomýi chupekuéra ojapo hag̃ua iporãva (Heb. 4:12).

Ñamombaʼeguasu Jehovápe. Umi hénte ohecharamojoa Jesúspe ‘oñeʼẽkuaaiterei’ rupi, péro haʼe ndojevaléi upévare ojehechauka hag̃ua, síno omboʼe umi héntepe omombaʼeguasu hag̃ua Jehovápe (Luc. 4:22; Juan 7:16–18). Ñande avei ñahaʼangavaʼerã chupe ikatu hag̃uáicha oiko ñandehegui peteĩ mboʼehára katupyry. Péro ani ñanderesarái Jesús heʼivaʼekue hemimboʼekuérape: ‘Peẽ pehesapevaʼerã opavave renondépe, umi hénte ohecha hag̃ua umi mbaʼe porã pejapóva, ha omombaʼeguasu pende Ru yvagapeguápe’ (Mat. 5:16, NM).

Ñaporomboʼéta jave iporã ñañeporandu: “Omombaʼeguasúpa Jehovápe umi mbaʼe haʼéva, térãpa ahechaukasénte aporomboʼekuaaha?”. Iporã ningo añete jaiporu ehémplo térã ñande rembiasakue ñaporomboʼévo, péro ñañatendevaʼerã ani umi mbaʼe ohesarea ñane estudiántepe ha ndojesarekovéi Ñandejára omboʼesévare chupe.

Jahechauka mbaʼéichapa idiferénte Ñandejára Ñeʼẽ Peteĩ tapicha ontende porã vaʼerã umi mbaʼe ñamboʼéva chupe ikatu hag̃uáicha omoirũ Jesúspe. Ohechakuaavaʼerã mbaʼéichapa idiferénte Ñandejára Ñeʼẽ umi japu oñemboʼévagui. Upévare iporã ñamyesakã chupe mbaʼépepa idiferénte umi mbaʼe ñamboʼéva.

Jehová heʼi jey jey vaʼekue ipuévlope ohechakuaa hag̃ua mbaʼéichapa idiferénte ojuehegui umi mbaʼe ipotĩva ha ikyʼáva (Lev. 10:9–11). Heʼi avei umi omombaʼeguasúva chupe omyesakãtaha ‘mbaʼépa imarangatu ha mbaʼépa ikyʼa’ (Eze. 44:23). Proverbios kuatiañeʼẽme pyʼỹinte ohechauka avei mbaʼéichapa idiferénte pe tekojoja ha tekojojaʼỹ, térã arandu ha tavy. Péro mokõi mbaʼe ojojoguáva ikatu avei idiferénte ojuehegui. Pór ehémplo apóstol Pablo heʼi idiferenteha peteĩ hekojojáva peteĩ ipyʼaporãvagui (Rom. 5:7).

Jesús avei oporomboʼérõ guare ohechauka ko mbaʼe. Mateo 21:28–32–pe omombeʼu upéva. Peteĩ jey Jesús heʼi umi ohendúvape chupe ohechakuaa hag̃ua mbaʼeichaitépa idiferénte peteĩ tapicha oñembosantuláriova peteĩ oñembyasývagui ipyʼaite guive.

Ñamopensa umi ñanerendúvape. Jesús ningo omokyreʼỹvaʼekue umi héntepe opensa hag̃ua. Pór ehémplo peteĩ jey oporandu Pédrope: ‘Mbaʼépa nde ere Simón? Mávapepa umi mburuvicha guasu okovra umi impuésto? Itaʼyrakuérapepa térã ambue héntepe?’ (Mat. 17:25, NM). Jesús oporandu chupe koʼã mbaʼe omombaʼapo hag̃ua iñakã, ha Pedro ombohovái chupe hesakuaitépe.

Ótra vuéltape peteĩ kuimbaʼe oporanduvaʼekue Jesúspe: ‘Máva piko che rapicha?’, haʼe omoĩ chupe peteĩ ehémplo ohechauka hag̃ua mbaʼéichapa idiferénte peteĩ samaritáno, ambue saserdóte ha levítagui. Upe rire oporandu chupe: ‘Mávapa koʼã mbohapy kuimbaʼe apytépe ohechauka ohayhuha hapichápe?’ (Luc. 10:29–36). Ko ehémplo rupive Jesús oipytyvõ pe kuimbaʼépe opensa hag̃ua, ombohováinte rangue chupe derechoite oporanduvaʼekue (Luc. 7:41–43).

Ñag̃uahẽ ikorasõme. Peteĩ mboʼehára katupyry oĩ porãva Ñandejára renondépe ohayhu hembipota, ndahaʼéi oikuaánteva de memória umi mbaʼe oĩva la Bíbliape (Deu. 10:12, 13). Upévare ñande ñamombaʼeguasuvaʼerã Jehovápe jahayhúgui chupe, ndahaʼéi jajechaukaségui (Mat. 6:5–8). Jesús omboʼevaʼekue iñimportanteha ñaneñeʼẽrendu Ñandejárape, péro heʼi iñimportanteveha jahecha mbaʼépa ñanemomýi jajapo hag̃ua upéva (Mat. 7:20–23).

Ñahaʼangáramo Jesúspe ñandekatupyryvéta. Iporã ningo añete ñamboʼe ñande rapichápe mbaʼépa Jehová ohaʼarõ enterovévagui. Péro avei iñimportánte oikuaa porã Jehovápe ohayhu hag̃ua chupe ha ikatu hag̃uáicha oĩ porã henondépe. Péro upéicha avei tekotevẽ oñeporandu mbaʼérepa oservi Jehovápe ideprovécho hag̃ua chupe umi mbaʼe oaprendéva. Jesús omokyreʼỹvaʼekue umi héntepe ojapo hag̃ua upéva. Pór ehémplo, ontende vaíramo hikuái peteĩ mbaʼe oporandu chupekuéra mbaʼérepa opensa, heʼi térã ojapo upéva. Ha upéicharõ jepe nontendeporãirõ hikuái, omyesakãve chupekuéra térã oiporu ehémplo ontende porãve hag̃ua upe omboʼeséva.

Ñamyesakã porã Ñandejára Ñeʼẽ. Ñanearandúramo jajapóta umi mbaʼe jaikuaáva ñasolusiona hag̃ua ñane provléma, ani hag̃ua jajapo ivaíva ha ñaipytyvõ hag̃ua ñande rapichápe. Peteĩ mboʼehára katupyry omboʼevaʼerã iñestudiántepe iñaranduve hag̃ua péro ndodesidirivaʼerã hese.

Apóstol Pedro oheja ñandéve peteĩ ehémplo porã upévape. Áño 33–pe ojapo peteĩ diskúrso omokyreʼỹva umi héntepe okambia hag̃ua hekove (Hech. 2:14–36). Haʼe omombeʼu mbohapy mbaʼe oĩva Ñandejára Ñeʼẽme ha umi hénte ogueroviáva, upe rire omyesakã chupekuéra mbaʼépa heʼise ha mbaʼéichapa oñekumpli. Upéicha rupi umi oĩva upépe ohechakuaa ojapovaʼerãha umi mbaʼe ohendúva. Ñande avei ñamyesakãramo umi mbaʼe oĩva Ñandejára Ñeʼẽme, umi ñanerendúva oikuaáta mbaʼépa ikatu ojapo ha ikyreʼỹta okambia hag̃ua oñekotevẽhápe (Hech. 2:37).

Ñaporomboʼe ñane ehémplo rupive. Umi mbaʼe jaʼéva oipytyvõkuaa ñande rapichápe, péro upéicha avei ñane ehémplo rupive ikatuhína ñamboʼe chupe. Mbaʼéichapa jajapokuaa upéva? Jajapovaʼerã umi mbaʼe jaʼéva ha ani ñaporomboʼénte. Upéva heʼise ñamokyreʼỹramo ñane estudiántepe olee meme hag̃ua la Biblia, ñande avei akóinte jaleevaʼerã. Térã ñamokyreʼỹramo umi ermáno kongregasionpegua osẽ hag̃ua opredika, ñande avei jajapovaʼerã ikatúva guive ñasẽ hag̃ua ñamyerakuã pe marandu porã. Upéicha ningo ñaporomboʼe porãvéta (Rom. 2:21–23).

Ñañembokatupyrýkena ñaporomboʼekuaa hag̃ua ha akóinte jajapo apóstol Pablo heʼivaʼekue: ‘Eñangareko ndejehe ha umi mbaʼe remboʼévare, ejepytaso mbarete opa mbaʼépe. Péicha rejapórõ nde voi rejesalváta ha avei umi nerendúva’ (1 Tim. 4:16).