‘Ñandejára marandu porã oñemombeʼúta oparupiete’
1. Mbaʼérepa jaʼekuaa avave ndaikatumoʼãiha ojoko ñane predikasión?
1 Ndaipóri mbaʼevete asy ikatúva ojoko Jehovápe ojapo hag̃ua hembipota (Isa. 14:24). Ñapensamína oikovaʼekue Gedeón rehe, haʼe ningo oguereko ipoguýpe 300 kuimbaʼe ha oñorairõvaʼerã hikuái 135.000 madianíta kóntrape. Jaʼéta voi ningo hesekuéra: “Mbaʼe anga piko umi 300 kuimbaʼe ojapóta ikontrapekuéra”. Péro Jehová heʼi Gedeónpe: “Renohẽta Israélpe upe jejopy vaihágui Madiangua poguýgui. Che hína upe romondóva” (Jue. 6:14). Ñane tiémpope Jehová ojesarekohína peteĩ tembiapo iñimportantetereívare. Mbaʼe tembiapópa hína upéva? Jesús heʼivaʼekue Mateo 24:14-pe [NM]: ‘Ñandejára rréino rehegua marandu porã oñemombeʼúta oparupiete ko yvy ape ári’. Ndaipóri avave ikatúva ojoko ko tembiapo porãite asy!
2. Mbaʼérepa jaʼekuaa Jehová ñanepytyvõtaha peteĩteĩme ñamyerakuãvo imarandu?
2 Jehová ñanepytyvõ peteĩteĩme. Jaikuaa porã ningo Jehová oipytyvõha ipuévlope, upéicha rupínte oñakãrapuʼã ohóvo. Péro ikatúpa jaʼe haʼe ñanepytyvõha peteĩteĩme? Pór ehémplo apóstol Pablo oikotevẽrõ guare, Jehová oipytyvõvaʼekue chupe Jesucristo rupive (2 Tim. 4:17). Upévare jaʼekuaa katuete ñanderovasataha avei peteĩteĩme ñañehaʼãmbaitéramo jajapo hembipota (1 Juan 5:14).
3. Mbaʼéicha javépa Jehová ñanepytyvõ?
3 Nde jopýpa umi mbaʼe pohýi rehasáva ára ha ára ha upévare nekaneʼõ resẽ hag̃ua predikasiónpe? Jehová ningo “omombarete ikaneʼõvape” (Isa. 40:29-31). Oĩpa oñemoĩva nderehe térã ndepersegíva? ‘Eity umi mbaʼe ipohýiva ha ndejopýva Ñandejára ári, Haʼe oñangarekóta nderehe’ (Sal. 55:22, ÑÑB). Rekyhyjépa sapyʼánte repredika hag̃ua? Jehová heʼi: “Tereho katu. Che roipytyvõta reñeʼẽ hag̃ua, che haʼéta ndéve upe erevaʼerã” (Éxo. 4:11, 12). Nderasykatupahína ha upéicha rupi ndaikatúi repredika nde rejaposeháicha? Jehová ningo omombaʼe ha ohovasáta upe rejapóva nde pyʼaite guive, tamichĩ jepe raʼe upéva (1 Cor. 3:6, 9).
4. Mbaʼépa jajapóta jajeroviáramo Jehováre?
4 Jehová ningo “oipysomahína ipo, omboguevivaʼerã chupe katu ndaipóri” (Isa. 14:27). Upévare jajeroviakuaa haʼe akóinte ohovasataha ñane rembiapo. Jasegíkena upéicharõ ‘japredika kyhyjeʼỹme’ jaikuaágui Jehová oĩtaha ñanendive (Hech. 14:3).