Peteĩ tembiapo ñanembovyʼaitereíva
1. Mbaʼépa ojejapo koʼág̃a rupi oñepytyvõ hag̃ua umi héntepe?
1 Oiméne ovyʼaitéraʼe umi hénte primer síglopegua ohechávo mbaʼéichapa oñemonguera umi hasývape (Luc. 5:24-26). Ñande avei javyʼaiterei koʼág̃a rupi, oñepytyvõ haguére hetápe oikuaa hag̃ua Jehovápe (Rev. 22:1, 2, 17). Ñamombaʼeterei ningo jaleéramo umi mbaʼe ohasavaʼekue heta hénte ha omombeʼu mbaʼéichapa Ñandejára Ñeʼẽ ha espíritu sánto okambia chupekuéra. Péro javyʼavétantema ñande voi ñambostudiáramo ñande rapichápe ha ñaipytyvõ chupe oñakãrapuʼã hag̃ua.
2. Mbaʼérepa jaʼe javyʼataha ñaipytyvõramo ñande rapichápe oikuaa hag̃ua Ñandejára rembipota?
2 Mbaʼéichapa héra Ñandejára? Mbaʼérepa oheja jahasa asy? Mbaʼépa ojapóta Irréino ñanderehehápe? Javyʼa ningo ikatu haguére ñambohovái koʼãichagua porandu ha koʼýte jahechávo mbaʼéichapa ñane estudiánte ipyʼarory oikuaa haguére Ñandejára rembipota (Pro. 15:23; Luc. 24:32). Avei ñandepyʼarory jahecháramo ijerovia mbareteveha ohóvo ha oñepyrũma oiporu Jehová réra, oñemonde hekópe porã, oheja umi mbaʼe vai ojapovaʼekue ha opredika hapichakuérape. Upéi oñemeʼẽramo Jehovápe ha ojevautisa, oikótama chugui ñane ermáno térã ermána ha ñanemoirũtama ko tembiapópe. Ajépa ñanembovyʼaitéta péicha oñakãrapuʼãramo ohóvo ñane estudiánte! (1 Tes. 2:19, 20.)
3. Mbaʼépa jajapovaʼerã jajuhu hag̃ua peteĩ ostudiaséva la Biblia?
3 Reipytyvõsépa nde rapichápe? Oiméramo upéicha ejerure Jehovápe tanepytyvõ rejuhu hag̃ua peteĩ ostudiaséva la Biblia, ha upéi ejapo opa ikatúva retopa hag̃ua peteĩva jepe (1 Juan 5:14). Repredikavaʼerã opa hendárupi ha retopataha órape umi héntere. Ha ija vovéntema ere nde rapichápe ostudia hag̃ua nendive la Biblia (Ecl. 11:6). Upéi retopáramo peteĩ oikuaasevéva Ñandejára Ñeʼẽgui, reho jey vaʼerã hendápe ha reñemongetave hendive pe marandu porãre (1 Cor. 3:6-9).
4. Mbaʼérepa kyreʼỹme ñaikuaveʼẽvaʼerã estúdio vívliko?
4 Koʼág̃a rupi oĩ gueteri heta tapicha oikuaaséva Ñandejárape ha oikoséva tekojojápe. Ha upearã oikotevẽmante ombostudiáva chupekuéra la Biblia (Mat. 5:3, 6). Jaikuaaháicha, koʼẽrõitéma og̃uahẽta huʼãme pe tembiapo oñemeʼẽvaʼekue ñandéve. Upévare, jahákena kyreʼỹme ñamombeʼu pe marandu porã ha ñaipytyvõ ñande rapichakuérape oservi hag̃ua Jehovápe (Isa. 6:8).