Jajapo estúdio vívliko oñakãrapuʼãva Párte 12:
Ñaipytyvõ ñane estudiántepe omoñepyrũ ha ojapo hag̃ua estúdio vívliko
1 Oñepyrũvo osẽ pe predikasiónpe, ñane estudiánte ikatu okyhyje pe opensáramo omoñepyrũ ha ojapovaʼerãha avei peteĩ estúdio vívliko. Mbaʼéichapa ikatu ñaipytyvõ chupe ojerovia hag̃ua ijehe, ojapose hag̃uáicha ko tembiapo iñimportantetereíva ñane predikasiónpe? (Mat. 24:14; 28:19, 20.)
2 Peteĩ estudiánte oĩ porãmava oiko hag̃ua chugui peteĩ puvlikadór neʼĩrava ojevautisa, katuete oĩma avei pe Eskuéla dél Ministério Teokrátikope. Pe eskuélape oñemboʼéva ojeprepara ha oñemeʼẽ hag̃ua umi tembiapo, oipytyvõta chupe oporomboʼekuaa hag̃ua, oikuaa hag̃ua umi mbaʼe oikotevẽva peteĩ ojapóva disípulo, “peteĩ mbaʼapohára ndoguerekóiva mbaʼérepa otĩ hag̃ua, oiporúva hendápe porã pe ñeʼẽ añeteguáva” (2 Tim. 2:15).
3 Emboʼe ne ehémplo rupive. Oprepara aja idisipulokuérape, Jesús omboʼe hesakã porã hag̃uáicha chupekuéra ha omoĩ avei peteĩ ehémplo iporãitereíva. Haʼe heʼi: “Pe temimboʼe ningo ndatuichavéi imboʼeháragui, péro opavave oñehekomboʼe porã vaʼekue ohupytýta imboʼehárape” (Luc. 6:40). Iñimportanteterei nde avei rejapo pe Jesús ojapohaguéicha, ha remoĩ avei peteĩ ehémplo iporãva ne predikasiónpe. Ohecháramo pe ehémplo remoĩva ne predikasiónpe, ne estudiánte ohechakuaáta ojejapoha rrevisíta oñemoñepyrũ hag̃ua estúdio vívliko.
4 Ikatu ere ne estudiántepe natekotevẽiha ñamombeʼupaite pe óga járape mbaʼéichapa jajapo peteĩ estúdio, ñamoñepyrũse jave hendive pe estúdio. Iporãve jepi jahechaukánte chupe, ha upevarã ikatu jaiporu peteĩ térã mokõi párrafo peteĩ puvlikasióngui. Upéva rejapo hag̃ua ikatu reiporu pe osẽva ko Ñane Rembiapo Rréino Rehegua-pe páhina 8, ha avei Nuestro Ministerio del Reino, enero 2002-pe, páhina 6.
5 Opyta porã vove emokyreʼỹ ne estudiántepe oho hag̃ua nendive, térã ótro puvlikadór ikatupyrýva ndive, ótro estúdio vívliko ojejapohápe. Upépe ikatu okomenta peteĩ párrafope térã peteĩ téysto vívliko iñimportántevape. Upéicha, pe ohecháva rupive pe estudiánte ikatúta oaprendeve mbaʼéichapa ojejapo peteĩ estúdio vívliko oñakãrapuʼãva (Pro. 27:17; 2 Tim. 2:2). Eguerohory pe ojapóva, ha peñemongeta mbaʼéichapa ikatu ojapo porãve.
6 Oñepytyvõramo pe puvlikadór pyahúpe oiko hag̃ua chugui peteĩ mboʼehára Ñandejára Ñeʼẽgui, oĩta ojapo hag̃uáicha pe ‘tembiapo iporãva’, omoñepyrũ ha ojapo hag̃ua peteĩ estúdio vívliko ijeheguiete (2 Tim. 3:17). Ajépa javyʼa ñambaʼapohaguére hendivekuéra ñamosarambi hag̃ua mborayhúpe ko invitasión: “Oipotáva guive, toyʼu ohepymeʼẽʼỹre pe y omeʼẽva tekove” (Rev. 22:17).