Eipytyvõ ne famíliape oservi porã hag̃ua Ñandejárape
1. Mbaʼépa ojapovaʼerã tuvakuéra oikuaávo Salmo 148:12, 13-pe heʼíva?
1 Jehová ningo oipota umi mitã omombaʼeguasu chupe (Sal. 148:12, 13). Upévare tuvakuéra tekotevẽ omboʼe ifamíliape Ñandejára rembipota ha hekoporã hag̃ua. Ha oipytyvõvaʼerã avei chupekuéra opredikakuaa hag̃ua. Mbaʼéichapa ikatu ojapo hikuái koʼã mbaʼe?
2. Mbaʼéichapa tuvakuéra ikatu oipytyvõ ifamíliape iñehémplo rupive?
2 Emboʼe ne ehémplo rupive. Gedeón heʼivaʼekue umi 300 soldádope: ‘Pemaʼẽ cherehe ha pejapo che ajapoháicha’ (Jue. 7:17). Péicha avei umi mitã michĩete guive ojapose ituvakuéra ojapóva. Peteĩ ermáno ombaʼapóva pyharekue og̃uahẽramo jepe hógape heʼõngue ijapére, oho ifamíliandi predikasiónpe sábado pyhareve opytarangue oke. Péicha heʼiʼỹre mbaʼevete ohechauka umi mitãme omotenondevaʼerãha predikasión (Mat. 6:33). Upévare iporã ñañeporandumi: “Ohechakuaápa cherehe che familiakuéra añemboʼeha, aleeha la Biblia, akomentaha rreunionhápe ha apredikaha kyreʼỹme?”. Jaikuaaháicha ndaikatumoʼãi voínte rejapo opa mbaʼe hekopete, péro ne família ohechávo reñehaʼãmbaiteha reservi porã Jehovápe, ikyreʼỹta avei ojapo hag̃ua nde rejapoháicha (Deu. 6:6, 7; Rom. 2:21, 22).
3. Mbaʼéichapa tuvakuéra ikatu oipytyvõ ifamíliape ohupyty hag̃ua hetave mbaʼe Ñandejára servísiope?
3 Umi mbaʼe ikatúva ohupyty. Tuvakuéra naikaneʼõi omboʼe hag̃ua ifamiliakuérape oguata, oñeʼẽ ha oñemondekuaa hag̃ua. Ha ohechávo ikatupyryvemaha ohóvo, omboʼe chupekuéra umi mbaʼe ndojapokuaáiva gueteri. Umi oservíva Jehovápe katu oipytyvõ avei ifamíliape oñehaʼã hag̃ua ohupyty hetave mbaʼe Ñandejára servísiope, ha ojapo upéva umi mitã oikotevẽháicha (1 Cor. 9:26). Ha nde, remboʼépa ne famíliape okomenta hag̃ua rreunionhápe haʼekuéra ontendeháicha ha opreparakuaa hag̃ua idiskúrso ojapótava Eskuéla Jaiporukuaa Hag̃ua la Bíbliape? (Sal. 35:18.) Reipytyvõpa chupekuéra ikatupyryve hag̃ua predikasiónpe? Remokyreʼỹpa chupekuéra ojevautisa ha oiporupaite hag̃ua itiémpo Jehová servísiope? Mbaʼépa rejapo ojeheʼave hag̃ua hikuái umi ermáno ijerovia mbarete ha ikyreʼỹvare? (Pro. 13:20.)
4. Mbaʼérepa iporã tuvakuéra ohekomboʼe ifamíliape michĩete guive?
4 Peteĩ jey pe salmísta heʼivaʼekue: ‘Ñandejára, chemitã guive ningo nde cherekomboʼe, ha koʼág̃a peve amombeʼu umi mbaʼe tuichaite nde rejapovaʼekue’ (Sal. 71:17). Upéicharõ, ehekomboʼékena ne famíliape michĩete guive ombaʼapo meme hag̃ua Jehová servísiope, upéva katuete oipytyvõ ha ideprovéchota chupe okakuaapa rire jepe (Pro. 22:6).