Ñamboʼe ñane famíliape omombaʼeguasu hag̃ua Jehovápe

1. Ikatúnepa mitãkuña ha mitãrusukuéra omombaʼeguasu Jehovápe?

¹ Salmo 148:12, 13 omokyreʼỹ mitãrusu ha mitãkuñanguérape omombaʼeguasu hag̃ua Jehovápe. Ñandejára Ñeʼẽme jajuhu oĩhague heta pyahu ojapóva upéva. Umíva apytépe jajuhu Samuel, mitã ‘akóinte ombaʼapóva Ñandejárape g̃uarã’ (1 Sam. 2:18). Peteĩ mitãkuñaʼi katu heʼivaʼekue Naamán rembirekópe, Israélpe oĩha peteĩ Jehová proféta ikatútava omonguera iménape lépragui (2 Rey. 5:1-3). Jesús ojapórõ guare heta milágro pe témplope, “umi mitãnguéra” sapukáipe heʼivaʼekue: “Glória pe rréi David Raʼýpe!” (Mat. 21:15, BNP). Upéicharõ, mbaʼéichapa ikatu tuvakuéra omboʼe ifamíliape omombaʼeguasu hag̃ua Jehovápe?

2. Mbaʼérepa tuvakuéra omoĩvaʼerã ehémplo porã ifamiliakuérape?

² Tuvakuéra raẽ ojapovaʼerã. Umi tuvakuéra Israelgua ohekomboʼe hag̃ua ifamíliape, haʼekuéra raẽ ohayhuvaʼerã Jehovápe ha omombaʼevaʼerã Iléi ipyʼaite guive (Deu. 6:5-9). Tuvakuéra imanduʼa porãramo predikasión rehe ha osẽramo káda semána opredika, ifamiliakuéra omombaʼéta avei upéva ha vyʼápe ojapóta hikuái.

3. Mbaʼépa ojapo peteĩ ermána ituvakuéra omoĩ rupi chupe ehémplo porã?

³ Vyʼápe peteĩ ermána imanduʼa: “Yma che michĩme, che familiakuéra katuete káda semána pahápe osẽmivaʼerã opredika. Che tuvakuéra ovyʼavaʼekue opredika jave. Ha upéicha rupi, ore mitã guive rohechakuaa igustoha japredika”. Ko ermána, siete áño oguerekórõ guare oikóma chugui puvlikadór ojevautisaʼỹva, ha koʼág̃a g̃uarã treinta y dos áño rasáma oservihína de tiémpo kompléto.

4. Mbaʼéichapa tuvakuéra ikatu ohekomboʼe meme ifamíliape?

⁴ Oñehekomboʼe meme vaʼerã chupekuéra. Tuvakuéra, peñehaʼãkena pene família topredika penendive. Ikatu pejerure chupekuéra ombopu hag̃ua pe tímbre, omeʼẽ hag̃ua tratádo térã olee peteĩ téysto. Pejapóramo upéicha, ovyʼáta hikuái predikasiónpe ha ipyʼaguasuvéta omosarambi hag̃ua pe marandu porã Rréino rehegua. Tuichave vove ohóvo, ikatu haʼekuéra añóntema opredika. Upévare, peipytyvõkena pene famíliape oikuaave hag̃ua Jehovápe ha oñehaʼã hag̃ua ohupyty hetave mbaʼe Ñandejára servísiope.

5. Mbaʼépa oikuaa ha ojapovaʼerã peteĩ mitã ikatu hag̃uáicha oiko chugui puvlikadór ojevautisaʼỹva?

⁵ Peñeʼẽvaʼerã umi ansiáno ndive pehecha vove pene família ikatumaha oiko chugui puvlikadór ojevautisaʼỹva, ha haʼekuéra voi heʼíramo oipotaha upéva. Oiko vove chuguikuéra puvlikadór ohechakuaavéta omombaʼeguasuvaʼerãha Jehovápe. Pehechakuaavaʼerã umi mitã natekotevẽiha oikuaa heta mbaʼe peteĩ kakuaáicha oiko hag̃ua chugui puvlikadór. Oikuaápa umi mbaʼe iñimportantevéva omboʼéva la Biblia? Oikópa Ñandejára Ñeʼẽ heʼiháicha? Osẽsépa opredika ha oipotápa ojekuaa chupe testígo de Jehová ramo? Oiméramo upéicha, umi ansiáno ohechakuaáta ikatumaha oiko chugui peteĩ puvlikadór ojevautisaʼỹva (ehecha Organizados para hacer la voluntad de Jehová, páh. 79-82).

6. Mbaʼérepa jaʼekuaa iporãitereiha tuvakuéra omboʼe ifamíliape?

⁶ Añetehápe, heta oñehaʼãvaʼerã tuvakuéra omboʼe hag̃ua ifamíliape omombaʼeguasu hag̃ua Jehovápe. Upéicharamo jepe, ombovyʼaiterei tuvakuérape ohechávo ifamília oñakãrapuʼã Ñandejára servísiope. Ha iporãveha, ombopyʼarory Jehovápe ohechávo mitãnguéra oñeʼẽ umi mbaʼe porãita haʼe ojapóvare.