Umi Aty Guasu tres diagua rupive ojekuaauka pe añetegua
1. ¿Mbaʼe mbaʼe rehépa umi isrraelíta ojepyʼamongetavaʼekue umi arete aja?
1 Yma umi isrraelíta oñembyatyvaʼekue Jerusalénpe tres vése káda áño ogueromanduʼa hag̃ua umi arete. La Bíbliape heʼi umi kuimbaʼe katuete ohovaʼerãha péicha jave, upéicharamo jepe ifamiliakuéra pyʼỹinte omoirũ avei chupekuéra ohasa hag̃ua oñondivepa umi arete (Deu. 16:15, 16). Upépe ikatu ojepyʼamongeta opa mbaʼe Ñandejára ojapóvare hesehapekuéra. Pór ehémplo, mbaʼeichaitépa Haʼe ohayhu ha omoĩmbaite isiervokuérape oikotevẽva (Deu. 15:4, 5) térã mbaʼérepa akóinte ojeroviakuaa Ñandejára ohekomboʼe porã ha oñangarekotaha hesekuéra (Deu. 32:9, 10) ha mbaʼérepa hekoporãvaʼerã Jehová oiporavo rupi chupekuéra ipuévloramo (Deu. 7:6, 11). Koʼág̃a rupi avei ñande aty guasu tres diagua ñanepytyvõ jajepyʼamongeta hag̃ua umi mbaʼe porã Jehová ojapóvare ñanderehehápe.
2. ¿Mbaʼéichapa ñanepytyvõ ñande aty guasu ñantende porã hag̃ua pe añetegua?
2 Pe prográma ñanepytyvõta ñantende porã hag̃ua pe añetegua. Umi aty guasuhápe ningo javyʼaiterei ñahendúvo umi diskúrso, jahechávo dráma, demostrasión ha entrevistakuéra ñanepytyvõva ñantende hag̃ua pe añetegua la Biblia omboʼéva (Juan 17:17). Jehová organisasión heta ombaʼapo kuri ojeprepara hag̃ua peteĩ prográma ideprovéchotava entéro tapichápe oikuaa ha omombareteve hag̃ua ijerovia Ñandejárare (Mat. 24:45-47). ¡Ajépa ñanembopyʼarory jaikuaávo ñaaprendetaha heta mbaʼe porã!
3. ¿Mbaʼépa rejapovaʼerã ideprovécho hag̃ua ndéve pe aty guasu?
3 Ikatu hag̃uáicha ideprovécho ndéve pe aty guasu, reñehaʼãvaʼerã reime upépe umi tres día ha reñatende porã. Upévare, tekotevẽramo rejerurevaʼerã permíso ne patrónpe. Ha ikatu hag̃uáicha reñatende pe aty guasu aja, reñenovaʼerã voimi repytuʼu porã hag̃ua. Hetápe avei oipytyvõ omañáramo pe ojapóvare diskúrso ha oanota umi mbaʼe iñimportantevéva. Emoĩkena ne teléfono kirirĩháme térã remboguete voi, pono nemolesta ndéve ha avei umi ótrope. Aníkena reñeʼẽterei, remondo mensáhe, rekaru térã manterei repuʼã reyʼu pe prográma aja.
4. ¿Mbaʼépa ojapokuaa tuvakuéra ideprovécho hag̃ua ifamíliape pe aty guasu?
4 Ymave káda siete áño, térã áño savátikope oiko jave pe fiésta de las kaváñas, umi isrraelíta oñembyatými vaʼekue ohendu hag̃ua Ñandejára léi heʼíva. Upérõ umi ‘mitã mimi’ jepe oho ohendu ha oaprende hag̃ua (Deu. 31:12). Koʼág̃a rupi avei ñanemokyreʼỹeterei jahechávo mbaʼéichapa umi família oguapy oñondivepa, ha umi mitã katu oñatende porã ha ndokéi pe prográma aja. Iporãta avei káda pyhare pehecháramo umi mbaʼe peanotavaʼekue ha peñemongeta pe párte pendegustavévare. La Biblia ningo heʼi voi ‘pe vyroreko ojoajuha mitãrusu pyʼapy rehe’, upévare tuvakuéra tekotevẽ oñangareko umi mitã rehe ha avei mitãrusukuérare ani hag̃ua oho oimehápe rei ojepytuʼu aja, térã peime jave pe óga pepytahápe (Pro. 22:15; 29:15).
5. ¿Mbaʼéichapa jajeporta porãramo jahechauka ñamombaʼeha pe añetegua?
5 Jajeporta porãramo jahechauka ñamombaʼeha pe añetegua. Jajeporta porãramo pe siuda ojejapohápe pe aty guasu jahechaukáta ñamombaʼeha pe añetegua (Tito 2:10). ¿Mbaʼéichapa jajeportavaʼerã jaháramo rrestauránpe térã japytáramo jake peteĩ otélpe ỹrõ ermáno rógape? Umichahápe ojehechavaʼerã ñanderehe ñandeagradesidoha, ñanepasiénsia ha ñanembaʼerechakuaaha (Col. 4:6). Pe áño ohasavaʼekuépe pe administradóra peteĩ otelpegua omombeʼu: “Rovyʼaiterei umi testígo de Jehová opyta jave ore otélpe, haʼekuéra ningo ojeporta porã ha horyeterei. Avei orrespeta umi empleádope ha oñangareko opa mbaʼe oiporúvare”.
6. ¿Mbaʼéichapa ikatu ñamombaʼeguasu Jehovápe ñañemonde lájare ñaime aja pe siuda ojejapohápe pe aty guasu?
6 Ñande jaiporu pe tarhéta de solápa ndahaʼéi ñandekuaa hag̃uánte umi ermáno térã ojehecha hag̃ua ñanderehe jahaha peteĩ aty guasúpe, síno avei ñamombaʼeguasu hag̃ua Jehovápe. Pór ehémplo, umi hénte ohechakuaáta oguerekóva guive pe tarhéta oñemondeha hekopete ha ndoiporuiha umi ao mbyky, hesakã térã ojopyetereíva chupe, ojapoháicha umi hénte mundopegua (1 Tim. 2:9, 10). Upéicharõ ñañatendevaʼerã ñañemonde lájare ñaime aja pe siuda ojejapohápe pe aty guasu, térã jaha vove japyta hag̃ua otélpe ỹrõ ermáno rógape. Naiporãmoʼãi ningo peteĩ oservíva Jehovápe og̃uahẽ umichahápe shórt ha rreméra rehe. Ñande aty guasu ojejapóramo jepe peteĩ estádiope, ñañemondevaʼerã hekopete. Ha ñakambiátaramo ñande ao opa rire pe prográma jaha hag̃ua ñasena rrestauránpe térã ambue hendápe, ñanemanduʼavaʼerã ñasẽramo jepe ñañemondevaʼerãha hekópe porã.
7. ¿Mbaʼéicha javépa ikatu jaaprovecha javyʼa ñane ermanokuérandi aty guasuhápe?
7 Arete jave umi isrraelíta ovyʼavaʼekue ojotopa haguére iñermanokuérandi oúva mombyry mbyrýgui térã ambue tetãgui, ha upéva oipytyvõvaʼekue chupekuéra oiko porã hag̃ua oñondivepa (Hech. 2:1, 5). Koʼág̃a rupi avei ojejapo jave aty guasu tres diagua, ojehecha mbaʼeichaitépa ojoayhu Jehová puévlo ha heta hénte omombaʼe ha oguerohoryeterei upéva (Sal. 133:1). Ha péicha jave ñande jaaprovecha avei jaikuaa hag̃ua ótro ermánope ha ñañemongeta hendivekuéra jaʼu aja peteĩ tembiʼu ivevuimíva, ñasẽ rangue okápe jajogua jaʼuvaʼerã.
8. ¿Mbaʼérepa iporã ñañekuaveʼẽ ñambaʼapo hag̃ua ñande aty guasuhápe ikatúma guive?
8 Umi hénte ohecharamoiterei mbaʼéichapa ñande aty guasúpe ojejapo opa mbaʼe hendaitépe ha omombaʼevéntema oikuaávo umi ombaʼapóva upépe ojapoha umi tembiapo okovraʼỹre mbaʼeve. ¿Ikatúpa nde avei kyreʼỹme ‘reñekuaveʼẽ’ rembaʼapo hag̃ua? (Sal. 110:3.) Oĩ túva oñekuaveʼẽva jepi itaʼyrakuérandi ombaʼapo hag̃ua péicha jave, ha upekuévo omboʼe chupekuéra iñimportanteha oipytyvõ umi ermánope. Avei rembaʼapo jave ikatu retopa ne amigorã neotĩramo jepe. Peteĩ ermána omombeʼu: “Che ningo aha jave umi aty guasuhápe aikuaa che rogaygua ha che amigokuérapente, péro añekuaveʼẽ rire amopotĩ hag̃ua, hetaiterei ermáno ha ermánape aikuaa, ha upéva chembovyʼaiterei”. Ñañehaʼãramo jaikuaave ótro ermánope ñambaʼapo aja aty guasuhápe katuete ñanemoñeñandu porãta (2 Cor. 6:12, 13). Oiméramo neʼĩrava rejapo ko mbaʼe reporandukuaa umi ansiánope mbaʼépa rejapovaʼerã reipytyvõ hag̃ua péicha jave.
9. ¿Mbaʼépa jajapóta ñainvita hag̃ua ñande rapichakuérape aty guasuhápe?
9 Ñainvitákena ñande rapichakuérape ohendu hag̃ua pe añetegua. Jajapo haguéicha umi áño ohasavaʼekuépe, tres semána oiko mboyve pe aty guasu ñasẽta ñainvita umi héntepe ñanemoirũ hag̃ua. Entéro kongregasión oñehaʼãvaʼerã oinvita opavave héntepe oĩva iterritório tuichakuére (ehecha pe rrekuádro “¿Mbaʼéichapa ikatu ñaporoinvita?”). Ha umi invitasión hembýva ojeguerahavaʼerã aty guasuhápe ikatu hag̃uáicha oiporu ótro ermáno opredika hag̃ua kállere térã ambue hendápe.
10. Emombeʼu umi mbaʼe porã ojehupytyvaʼekue oñeinvita rupi umi héntepe.
10 ¿Mbaʼépa ojehupyty oñeinvita rupi umi héntepe? Peteĩ aty guasúpe, og̃uahẽ ohóvo peteĩ karai ha hembireko, upémarõ pe akomodadór omeʼẽ chupekuéra iñasientorã. Haʼekuéra omombeʼu pe ermánope oñemeʼẽ hague chupekuéra peteĩ invitasión, ha oikuaasetereígui mbaʼépa oikóta upépe oviaha 300 kilómetro rasa og̃uahẽ hag̃ua. Ambue ermána katu opredikávo ogahárupi oinvita peteĩ karaípe. Ha oñatende porãiterei rupi, pe ermána omyesakã chupe umi mbaʼe oĩva pe invitasiónpe. Upe rire, ko karai oho peteĩ iñamígondi pe aty guasuhápe, upépe pe ermána ohecha chupekuéra ha ¡orekóma ipópe hikuái peteĩ puvlikasión pyahu osẽvaʼekue!
11. ¿Mbaʼérepa iñimportánte jaha káda áño umi aty guasu tres diaguápe?
11 Umi arete ningo peteĩ rregálo Jehová omeʼẽvaʼekue umi isrraelítape oservi hag̃ua chupe “pyʼapotĩ reheve ha hekoitépe” (Jos. 24:14). Upéicha avei umi aty guasu ñanepytyvõ jaiko hag̃ua Ñandejára oipotaháicha ha péicha ñamombaʼeguasu chupe (3 Juan 3). Jehová ningo katuete ohovasáta umi ohayhúvape pe añetegua ha oñehaʼãva oho káda áño aty guasuhápe oaprendeve hag̃ua heta mbaʼe.
[Komentário oĩva páhina 4-pe]
Jajeporta porãramo pe siuda ojejapohápe pe aty guasu jahechaukáta ñamombaʼeha pe añetegua
[Komentário oĩva páhina 5-pe]
Tres semána oiko mboyve pe aty guasu ñasẽta ñainvita umi héntepe ñanemoirũ hag̃ua
[Rrekuádro oĩva páhina 3 guive 5 peve]
Marandukuéra Aty Guasu tres diagua 2012-pe g̃uarã
◼ Mbaʼe órapa oñepyrũta. Pe portón ojeavríta las 8:00, ha las 9:20 oñepyrũta ñande aty guasu káda pyhareve. Ñahendu vove pe musikapu, enterove jaguapýma vaʼerã oñepyrũ hag̃ua hekoitépe pe prográma. Viernes ha sábado ñande aty guasu opáta kaʼaru 4:55, ha domingo opáta las 3:40.
◼ Moõpa jahejakuaa ñande veíkulo. Ndojekovramoʼãi estasionamiénto ermanokuéra oñatendéramo upépe, ha haʼekuéra ohechaukáta ñandéve moõpa ikatu ñamohenda ñande veíkulo. Avei ojehejáta peteĩ lugár umi orahávape hendive ermáno diskapasitádo. Sapyʼánte ndatuichái pe estasionamiénto, upévare ñañemongetakuaa ñane ermanokuérandi jaha hag̃ua ikatúva guive peteĩ áutopente. Aníkena jaheja ñande veíkulo óga ahéno renondépe térã upérupi reínte.
◼ Jaguapy hag̃ua. Ñañongatukuaa lugár ñande rogayguakuérape, umi ohóvape ñanendive ñande veíkulope térã ñane estudiántepe g̃uarãnte (1 Cor. 13:5).
◼ Hiʼupyrã. Jaguerahákena ñane rembiʼurã, ani ág̃a ñasẽ okápe jajogua hag̃ua. Upéicha jajapóramo ndaiporimoʼãi ombaʼevendéva ñande aty guasu jerére. Jaguerehakuaa ñane rembiʼurã peteĩ mbaʼyrúpe ikatu hag̃uáicha ija ñane asiénto guýpe. Ñanemanduʼavaʼerã ndovaleiha jagueraha konservadóra guasu ha mbaʼeveichagua mbaʼyru de vídrio.
◼ Kontrivusión. Ikatu jahechauka ñamombaʼeha ñande aty guasu ñamoĩvo ñane kontrivusión pe káha heʼihápe “Obra mundial”, oĩva ñande aty guasu oikohápe. Ñameʼẽtarõ chéke ñamoĩvaʼerã “Asociación Torre de Vigía de Biblias y Tratados” rérape.
◼ Oĩramo hasýva térã oñeñandu vaíva. Oĩramo peteĩ hasyetéva asambleahápe oñehenoivaʼerã peteĩ akomodadórpe ha haʼe oavisáta pyaʼe porã umi ermáno oĩva Primeros Auxilios-pe. Haʼekuéra oñatendéta upe hasývare ha tekotevẽramo ohenóita 911-pe. Upéicharõ natekotevẽmoʼãi enterove ñahenói joa emerhénsiape.
◼ Pohã. Oiméramo reguereko pohã reʼuvaʼerã, aníkena nderesarái regueraha hag̃ua ndaiporimoʼãi rupi ñande aty guasúpe. Oiméramo nderuguy asuka (diabetes) ha reiporu heringaʼi remoĩ hag̃ua pohã, nemanduʼavaʼerã ndovaleiha remombo umi vasurérope oĩva aty guasúpe téra pe otél repytahápe ipeligrosoiterei rupi.
◼ Ñande pyrehegua. Jaguerahavaʼerã ñande pyrehegua jaguata porã hag̃uáicha heseve oimehápe, ha ani umi ikatuvaʼerãichagua ñandereity ha jajegolpea.
◼ Umi nohenduporãivape g̃uarã. Ikatúta oñehedu avei pe prográma rrádio rupive (FM). Ha umi nohenduporãiva oguerahavaʼerã peteĩ rrádio ha audífono.
◼ Karríto mitãme g̃uarã ha sílla. Ndojeguerahaivaʼerã aty guasuhápe sílla ha karríto mitãme g̃uarã. Péro ikatu ojegueraha pe mitã oguapyha oñemoĩva sílla ári.
◼ Formulário Sírvase visitar (S-43). Iporãta jagueraha peteĩ térã mokõi formulário Sírvase visitar ñamyenyhẽ hag̃ua oĩramo ñanerendu porãva japredika jave upe jaikohárupi. Upéi ñameʼẽvaʼerã Departamento de Publicaciones-pe térã pe sekretário ñane kongregasionguápe jaha rire ñande aty guasuhágui (ehecha Ñane Marandu Porã mayo 2011, páhina 3).
◼ Akomodadór. Oñemokyreʼỹ umi ermáno ikatupyrývape, koʼýte umi ansiáno ha siérvo ministeriálpe, ombaʼapo hag̃ua ko departaméntope ha oipytyvõ hag̃ua ermanokuérape. Upéva ningo Jehová omombaʼetereíta.
◼ Ipotĩ hag̃ua ñande lokál. Umi ermáno ha ermána ombaʼaposéva ohovaʼerã Departamento de Servicio Voluntario-pe. Umi ndoguerekóiva gueteri 16 áño ikatu avei oipytyvõ ohóramo hendive itúva, isy, térã peteĩ enkargádo.
◼ Ñag̃uahẽkena órape. Jahupytýta heta mbaʼe porã ñañehaʼãramo ñag̃uahẽ órape ñande aty guasuhápe. Ikatúta ñañemongeta ermanokuérandi, ñahendu pe musikapu, japurahéi pe kántiko, ñahendu pe ñemboʼe ha pe ermáno omoakãva ñanemomaiteívo. Avei nañamolestamoʼãi ñane ermanokuérape ha jahechaukáta ñamombaʼe ha jarrespetaha Ñandejára Jehovápe (1 Cor. 14:40).
[Rrekuádro oĩva páhina 6-pe]
¿Mbaʼéichapa ikatu ñaporoinvita?
Ikatu hag̃uáicha ñameʼẽ umi invitasión ñande território tuichakuére mbykymínte ñañeʼẽvaʼerã, ikatu jaʼe péicha: “Mbaʼéichapa. Roinvita ningo la hentekuérape peteĩ aty guasurã ha ahejase ndéve ko invitasión oñemosarambíva ko múndo tuichakuére. Ipype omombeʼúta ndéve moõ ha arakaʼépa ojejapóta”. Nekyreʼỹkena remosarambívo pe invitasión. Ha resẽ jave reporoinvita fín de semanakue ikatu avei reikuaveʼẽ umi rrevísta, rehecháramo tekotevẽha.