Umi mbaʼe jaikuaaséva
◼ Oĩramo ohejaséva Jehová organisasión rérape opa mbaʼe oguerekóva, térã peteĩ párte jepe omano rire, ¿mbaʼépa tekotevẽ ojapo?
Ñamano rire ndajaikuaavéima mbaʼépa oikóta umi mbaʼe jaguerekóvagui (Ecl. 9:5, 6). Upévare heta oĩ ojapóva peteĩ testaménto térã kontráto eskrivanía rupive, omombeʼuhápe mbaʼépa oipota ojejapo umi mbaʼe orekóvagui omano rire (2 Rey. 20:1). Ko dokuméntope oñemoĩ jepi avei mávapa oñenkargáta oñekumpli hag̃ua pe testaménto térã kontrátope heʼíva, upe tapichápe oñehenói albacea térã administrador fiduciario (sapyʼánte ojeʼe avei chupe fideicomisario). Heta tetãme omanóramo peteĩ tapicha ojapoʼỹre ko dokuménto, umi autorida odesidi mbaʼépa ojejapóta umi mbaʼe orekóvagui. Upéicharõ, jaipotáramo opyta opa mbaʼe jaguerekóva térã peteĩ párte jepe Jehová organisasión rérape, ñamoĩvaʼerã peteĩ dokuméntope ha jaiporavo porã pe tapicha oñenkargátava oñekumpli hag̃ua pe dokuménto heʼíva.
Pe enkargádo oreko tuicha rresponsavilida. Haʼe ohechavaʼerã mbaʼe mbaʼépa oguereko pe omanovaʼekue ha upéi orreparti pe dokuméntope heʼihaichaite. Upéva oreko heta trámite ha oikotevẽ tiémpo ojapo hag̃ua, koʼýte pe omanóva ohejáramo heta mbaʼe. Hiʼarive tekotevẽ ojapo koʼã mbaʼe umi autorida ha pe léi heʼiháicha. Upéicha rupi, jaiporavovaʼerã peteĩ tapicha ontendéva mbaʼéichapa ojejapo koʼã mbaʼe ha jaikuaáva okumplitaha pe dokuméntope heʼíva. Upévare, ani ñaimoʼã ñamoĩ haguére enkargádoramo peteĩ ermánope, ojapo porãtaha katuete ko tembiapo (ehecha pe artíkulo hérava “Los beneficios de la planificación patrimonial”, osẽvaʼekue ¡Despertad! 8 de diciembre 1998-pe).
Oĩramo oipotáva reñenkarga térã rerreparti umi mbaʼe orekóva omano rire. Reñemboʼevaʼerã Ñandejárape ha ekalkula porã ikatútapa rekumpli upe rresponsavilida (Luc. 14:28-32). Avei omano vove, reavisavaʼerã umi tapicha ohejávape umi mbaʼe oguerekóva. Ha remeʼẽvaʼerã káda únope ipárte pe léi heʼiháicha ha pe testaménto térã kontrátope oĩhaichaite, saʼi térã hetáramo jepe umi mbaʼe ohejáva pe omanovaʼekue. Opa mbaʼe ñamoĩva peteĩ Asociación legál testigos de Jehová mbaʼévape, opytáma Jehová organisasiónpe g̃uarã (Luc. 16:10; 21:1-4).