Jaiporúkena umi tratádo jaikuaauka hag̃ua umi notísia porã

1. ¿Mbaʼéichapa ymaite guivéma ojeporu umi tratádo Jehová organisasiónpe?

¹ Heta áñorema Jehová organisasión oiporu umi tratádo oikuaauka hag̃ua pe marandu porã. Áño 1880-pe, C. T. Russell ha iñirũnguéra oñepyrũ ojapo umi tratádo ikatu hag̃uáicha umi oleéva pe rrevísta Watch Tower (koʼág̃a hína Ñemañaha) omeʼẽ umi héntepe. Umi tratádo iñimportantetereígui ermáno Russell oiporu áño 1884-pe pe ñeʼẽ tract (tratádo) olegalisátarõ guare pe asociación hérava Zionʼs Watch Tower Tract Society (koʼág̃a hína Watch Tower Bible and Tract Society of Pennsylvania). Ko asociación ojejapo oñepytyvõ hag̃ua umi oaprendesévape la Bíbliagui ojekovraʼỹre mbaʼevete chupekuéra. Áño 1918-pe g̃uarã umi Estudiánte de la Biblia omosarambíma 300 millones rasa umi tratádo, ha koʼág̃a peve ideprovechoiterei ñandéve predikasiónpe.

2. ¿Mbaʼérepa ideprovechoiterei umi tratádo?

² Mbaʼérepa ideprovechoiterei. Umi tratádo ojehecharamo iporã rupi. Umi héntepe ogustaiterei heʼígui hesakuaitépe heta mbaʼe iñimportánteva ojehai mbykymíramo jepe pype. Ha naiprovlemaite ojagarra hag̃ua ñandehegui peteĩ tratádo, peteĩ lívro térã rrevísta rangue. Avei umi maranduhára pyahu ha umi mitã jepe ikatu oikuaveʼẽ. Ha ndatuichái rupi ikatu jaraha oimehápe.

3. Emombeʼu peteĩ mbaʼe rehasavaʼekue térã peteĩ experiénsia oĩva ñane puvlikasionkuérape ohechaukáva iñimportantetereiha umi tratádo.

³ Heta oĩ oikuaavaʼekue la Biblia heʼíva peteĩ tratádo rupive. Pór ehémplo, peteĩ kuña oikóva Haitípe otopavaʼekue peteĩ tratádo kállepe, ohupi ha oleepa rire heʼi: “¡Kóva haʼe pe añetegua!”. Upe rire oho peteĩ Salón del Réinope, oñepyrũ ostudia la Biblia ha upéi ojevautisa. Ha upéva oiko oikuaa rupi Ñandejára Ñeʼẽ heʼíva peteĩ tratádo rupive.

4. ¿Mbaʼépa jahupytyse ñaikuaveʼẽvo umi tratádo predikasiónpe?

⁴ Japredika jave ogahárupi. Umi tratádo ideprovechoiterei rupi japredika hag̃ua, noviembre guive jaiporúta jepi avei ñaikuaveʼẽ hag̃ua predikasiónpe. Ñande ndahaʼéi jahejasénteva peteĩ tratádo umi ogajárape, síno jaiporuse ñañemongeta hag̃ua hendivekuéra. Ha oĩramo ñanerendu porãva upepete voi térã jaha jey vove hendápe, ikatu jahechauka chupe mbaʼéichapa ostudiakuaa Ñandejára Ñeʼẽ jaiporúvo pe lívro Mbaʼépa omboʼe la Biblia? térã ótro puvlikasión jaiporúva ñambostudia hag̃ua ñande rapichakuérape. ¿Mbaʼéichapa ikatu ñaikuaveʼẽ umi tratádo? Jareko rupi heta tratádo oñeʼẽva diferénte témare, ñepyrurã jaikuaa raẽ vaʼerã mávapa jaiporúta ha avei mbaʼépa heʼi káda únope.

5. ¿Mbaʼéichapa ikatu ñaikuaveʼẽ umi tratádo japredika jave ogahárupi?

⁵ Jaikuaa hag̃ua mbaʼéichapa ñaikuaveʼẽta umi tratádo odepende hína mávapa jaiporuse ha avei moõpa japredikáta. Ñañepyrũ hag̃ua ñañemongeta pe ogajárandi ñameʼẽkuaa chupe peteĩ tratádo ha jahechauka chupe oĩva ijapére, péicha ikatu oikuaase mbaʼépa heʼi pype. Avei ikatu jahechauka pe ogajárape umi tratádo jarekóva ha jaheja haʼete voi toiporavo peteĩ. Ha japredikáramo peteĩ território umi hénte ndoavriseihápe hokẽ avavépe, ikatu jajoko umi tratádo ohecha hag̃uáme, térã ñaporandu pe ogajárape ikatúpa ñamoinge hokẽguýrupi heʼi hag̃ua ñandéve mbaʼépa opensa hese. Pe tratádo orekóramo peteĩ porandu ijapére jajerurekuaa chupe tomombeʼu ñandéve mbaʼépa okalkula hese, térã ñaporandu ambue mbaʼe omopensátava chupe ikatu hag̃uáicha oñemongetase ñanendive. Upéi ikatu voi jalee peteĩ párte pe tratádogui ha ñamokyreʼỹ chupe ombohovái hag̃ua ñandéve umi porandu oĩva upépe. Iporãvéta jaleéramo umi téxto iñimportantevéva la Bíbliagui voi. Ha ñañemongetapa rire jaʼekuaa chupe arakaʼe ha mbaʼe órapa jahase jey hendápe ñañeʼẽve hag̃ua upe témare. Oiméramo pene kongregasiónpe pejepokuaa peheja puvlikasión umi óga ndaiporihápe avave, ikatu avei peheja peteĩ tratádo ndohechamoʼãihápe umi ohasáva upérupi.

6. ¿Mbaʼéichapa ikatu ñaikuaveʼẽ umi tratádo japredika jave kállere?

⁶ Japredika jave kállere. ¿Reiporúmapa umi tratádo repredikávo kállere? Sapyʼánte ningo kállere jajotopa jepi umi hénte ojapuráva ha ndopytaséiva oñemongeta ñanendive, upévare ijetuʼu jaikuaa hag̃ua oikuaasevépa la Bíbliagui térãpa nahániri. Péicha jave iporãvéta ñaikuaveʼẽramo peteĩ tratádo ñameʼẽ rangue umi rrevísta osẽ ramovéva ndajaikuaáigui oleétapa. Ohechávo iporãitereiha oĩva pe tratádo apére ha mbykymínte ojehaiha pype, ikatu hína omokyreʼỹ chupe olee hag̃ua itiempoʼimi vove. Ha opytáramo oñemongeta ñanendive katu, ñamyesakãkuaave chupe heʼíva pe tratádope.

7. Emombeʼu umi ehémplo ohechaukáva mbaʼéichapa jaiporukuaa umi tratádo japredika hag̃ua oimehápe.

⁷ Japredikávo oimehápe. Ndahasyiete jaiporu hag̃ua umi tratádo japredika hag̃ua oimehápe. Peteĩ ermáno ojepokuaa oraha ivolsíllope heta tratádo osẽta jave hógagui. Upéicharõ oñemongeta jave peteĩ tapichándi, pór ehémplo peteĩ oñatendéva negósiore, oheja chupe peteĩ tratádo olee hag̃ua. Peteĩ paréha ohovaʼekue ojepasea Nueva Yórkpe katu ogueraha pe folléto Notísia porã ha heta tratádo diferénte idiómape, oikuaa rupi upépe oĩtaha hénte heta tetãygua. Ha umi ohendúvape guive oñeʼẽha ótro idiómape, oikuaveʼẽ chupekuéra peteĩ tratádo iñeʼẽtépe, tahaʼe vendedórpe, umi opytuʼúvape plásape térã oĩva hína rrestaurántepe.

8. ¿Mbaʼérepa ikatu jaʼe umi tratádo ojoguaha umi semíllape?

⁸ Eñemitỹkena. Umi ombaʼapóva kokuépe ningo oñotỹ heta hendápe umi semílla ndoikuaáigui moõitépa heñóita. Ñande avei koʼág̃a rupi jareko heta semílla, umíva hína umi tratádo. Upévare iporãta jajapo heʼíva Eclesiastés 11:6-pe: “Pyharevete reñotỹvaʼerã ne semillakuéra, ha ani repytuʼu kaʼaruete peve; ndereikuaái ningo moõpa heñóita hína pe semílla, ápe térãpa amo, térã osẽ porãtapa hína mokõivéva”. Upéicha rupi, jasegíkena ñañemitỹ jaikuaaukávo umi héntepe umi notísia porãite oĩva ñande tratadokuérape (Prov. 15:7).

[Nóta oĩva taʼanga ndive páhina 3]

Umi tratádo ideprovechoiterei, upévare noviembre guive jaiporúta jepi avei ñaikuaveʼẽ hag̃ua predikasiónpe.