Japororresivi porãkena
1. ¿Mbaʼéicha javépa jareko peteĩ oportunida ijojahaʼỹva ñaipytyvõ hag̃ua umi héntepe oikuaa hag̃ua Jehovápe, ha mbaʼérepa?
1 Conmemoracionhápe ningo jareko peteĩ oportunida ijojahaʼỹva ñaipytyvõ hag̃ua umi héntepe oikuaa hag̃ua Jehovápe. ¿Mbaʼérepa jaʼe upéva? Ko áñope g̃uarã ojekalkula ñanemoirũtaha diez millones rasa pe día iñimportantetévape. Ko rreunión oipytyvõta hetaitereípe ohechakuaa hag̃ua mbaʼeichaitépa Jehová ha Jesús ñanderayhu ñandepeʼávo pekádo ha ñemano poguýgui (Juan 3:16; 15:13). Oikuaáta avei umi mbaʼe porã ikatúva ohupyty Jehová omeʼẽ rupi ko rregálo ijojahaʼỹva (Is. 65:21-23). Upe díape ndahaʼéi pe diskursánte añónte ikatúva oipytyvõ umi héntepe oikuaa hag̃ua Jehovápe, síno enterovéva ikatúta jajapo upéva jarresivi porãvo umi oúvape ko atýpe (Rom. 15:7).
2. ¿Mbaʼe mbaʼépa ikatu jajapo oñeñandu porã hag̃ua umi oúva Conmemoracionhápe?
2 Ñahaʼarõ rangue ñane asiéntope oñepyrũ pe rreunión, iporãitereíta jaháramo jasaluda umi ou ramóvape ha jajekuaauka chupekuéra. Haʼekuéra ningo ndoikuaái mbaʼépa ojejapóta, ha oime vaʼerã ndahaʼéi la oñeñandu porãmbáva. Péicha jave ñanderory ha ñanembaʼeporãramo hendivekuéra, tuicha oñeñandu porãvéta. Jaikuaa hag̃ua oúpa oñemeʼẽ rupi chupe pe invitasión, ñaporandukuaa chupe primera véspa ou térãpa oreko ikonosído kongregasiónpe. Ikatu voi jaʼe chupe oguapy hag̃ua ñande ykére ha jaiporu hendive ñande Biblia ha ñane kántiko. Pe Conmemoración ojejapóramo Salón del Réinope, iporãta jahechauka chupe mbaʼe mbaʼépa oĩ upépe. Opa rire pe diskúrso, ñaporandukuaa chupe ontende porãpa raʼe umi mbaʼe ojeʼe vaʼekue. Oiméramo ótra kongregasión oiporúta pe Salón ha tekotevẽta pyaʼe oñesẽ, ikatu jaʼe chupe: “Aikuaasete ningo mbaʼépa repensa ko rreuniónre, ¿mbaʼéicha piko ikatúne añekomunika nendive?”. Upéi eporandu chupe arakaʼépa ikatu pejotopa jey peñemongetave hag̃ua. Ha oúramo umi maranduhára aréma ndopredikavéiva ha ndouvéiva rreunionhápe, ansianokuéra omokyreʼỹ ha oipytyvõ vaʼerã chupekuéra.
3. ¿Mbaʼérepa iñimportánte jarresivi porã umi oúvape Conmemoracionhápe?
3 Umi ñanemoirũva apytépe, heta oĩta primera ves ohecháva mbaʼeichaitépa Jehová organisasiónpe ojevyʼa, ojeiko peteĩ ñeʼẽme, pyʼaguapýpe ha mborayhúpe (Sal. 29:11; Is. 11:6-9; 65:13, 14). ¿Mbaʼépa opensáta umi oúva Conmemoracionhápe? Upéva odependéta mbaʼéichapa jarresivi chupekuéra.