Oñemombaʼeguasúta Jehovápe opárupi
1. Mbaʼépa ikatu og̃uahẽ avei ñande rapichakuéra korasõme oĩ jave Conmemoracionhápe?
1 Arakaʼépa? Conmemoracionhápe. Upearã ñañehaʼãmbaiteñaína ñainvita opavavépe. Ha hiʼãite umi mbaʼe ohendu ha avei ohecháva og̃uahẽ ñande rapichakuéra korasõme. Peteĩ kuñakarai ohovaʼekue Conmemoracionhápe omombeʼu horyeterei hague umi oĩva upépe, ha omombaʼeterei pe Salón iporã, ipotĩ ha oñeñangareko haguére hese péicha. Mbaʼépa ñanemboʼe upéva? Opavave ikatuha ñamombaʼeguasu Jehovápe, ndahaʼéi pe ojapóva diskúrso añónte (Efe. 4:16).
2. Mbaʼépa ikatu jajapo oñemombaʼeguasu hag̃ua Ñandejára réra?
2 Erresivi porãkena umi oútavape. Repukavy ha resaluda porãramo umi og̃uahẽvape, haʼekuéra oñeʼẽ porãta ñanderehe ha péicha oñemombaʼeguasúta Ñandejára réra (Juan 13:35). Ha ndaikatúiramo jepe reñemongeta enterovéndi, ikatu reho reñeʼẽ umi oĩva ndive nde ypýpe (Heb. 13:1, 2). Reñatendevaʼerã avei og̃uahẽrõ g̃uarã peteĩ ndoikuaáiva avavépe, ikatu oime ou oñemeʼẽ rupínte chupe peteĩ invitasión. Ha ikatu ere: “Primera vés piko reju koʼápe?”. Oiméramo upéicha, ejerure chupe toguapy nde ykére ha eñemongeta hendive. Ha oĩramo ótra kongregasión oikevaʼerã peẽ pesẽmírentema, ikatu ere: “Ndegusta piko umi mbaʼe ojeʼevaʼekue ko rreuniónpe. Arakaʼe ha moõpa ikatu jajotopa jey ñañemongetave hag̃ua?”.
3. Mbaʼéichapa ikatu ñamoñeñandu porã umi ndouvéivape rreunionhápe?
3 Erresivi porãkena umi ndouvéivape rreunionhápe. Oĩne ñanendive umi ndouvéiva rreunionhápe térã nosẽvéiva opredika ha oúva káda áñonte Conmemoracionhápe. Erresivi porãkena ha eguerohory chupekuéra ou haguére ko rreunión iñimportantetévape (Rom. 15:7). Upe rire, umi ansiáno ikatu ovisita hógape koʼã ermánope ha omokyreʼỹ chupekuéra osegi hag̃ua oho rreunionhápe. Upévare, jajerurékena Jehovápe umi oúva ko rreunionhápe tomombaʼeguasu Chupe ohendu ha ohechávo ‘umi mbaʼe porãita jajapóva’ (1 Ped. 2:12).