Jaiporu hag̃ua predikasiónpe

Marandu Rréino rehegua núm. 38

“Ko informasión ningo ojerreparti hína oparupiete ko yvy ape ári, ha ameʼẽse avei ndéve nembaʼerã.”

Nóta: Ñamog̃uahẽ hag̃ua opavavépe ko tratádo iporãvéta ñañeʼẽ mbykymínte. Péro oĩramo oñatende porãva ñanderehe ha oñemongetase pe informasiónre, ikatu ñaporandu chupe mbaʼépa opensa pe título heʼívare. Upéi, jalee chupe pe tratádogui Hechos 24:15, ha omeʼẽramo ñandéve tiémpo ñahesaʼỹijove hendive ambue informasión oĩva pype. Ñamohuʼã hag̃ua ikatu ñaporandu chupe: “¿Mbaʼérepa ñandetuja ha ñamano?”, oĩva pe tratádo atukupépe. Jaha mboyve jaʼe vaʼerã chupe jaju jeytaha hendápe ñambohovái hag̃ua upe porandu.

Ñemañaha 1 de noviembre

“Koʼág̃arupi ningo hetaiterei japu ojeʼe Ñandejárare, upéicha rupi oĩ ndojeroviavéi ha ndohayhuvéiva Chupe. ¿Ndépa rehechakuaa avei upéva? [Ehaʼarõ tombohovái.] La Biblia ohechauka porã Ñandejára oipotaha yvyporakuéra ohayhu ha ojerovia Hese [elee Isaías 41:13]. Ko rrevísta omombeʼu mbohapy japu ojeʼéva Ñandejárare ha hetápe omomombyrýva Chugui.”

¡Despertad! Noviembre

“Koʼág̃arupi heta hénte ohechakuaa noñemombaʼeveiha pe tekopotĩ ha opa mbaʼe hekopeguáva. ¿Ndépa rehechakuaa avei ko múndo káda día oho vaiveha? [Ehaʼarõ tombohovái.] La Bíbliape heʼíma vaʼekue voi ñane tiémpope umi hénte oho vai vaivetaha [elee 2 Timoteo 3:1-5]. Ko rrevísta ohechauka jajapóramo la Biblia heʼíva, tuicha jaiko porãveha.”