Jaiporu porãkena umi rrevísta itujavéva
Ñande rrevistakuéra ikatu oipytyvõ peteĩ persónape oikuaaseve hag̃ua umi mbaʼe omboʼéva la Bíblia ha omombaʼe hag̃ua Ñandejára réra (Rom. 10:13, 14). Péro opytáramo ñande rógape térã ñamombóramo ndaideprovechomoʼãi avavépe, upévare ñañehaʼã vaʼerã ñameʼẽ ñande rapichakuérape. Koʼág̃a jahecháta umi mbaʼe ikatúva ñanepytyvõ jaiporu porã hag̃ua umi rrevísta itujavéva.
Jaha jave umi território saʼive ojepredikahápe, jahejakuaa umi óga ndajatopaihápe avavére, péro jaheja vaʼerã ohechaʼỹ hag̃uáme umi ohasáva upérupi.
Japredika jave umi lugár hetahápe hénte; por ehémplo umi lugár oñehaʼarõhápe tren térã kolektívo, ñaporandukuaa umi ohaʼarõvape ndoleeséipa peteĩ informasión, upéi jahechauka chupekuéra umi rrevísta itujavéva ha toiporavo hikuái pe ogustavéva.
Jaha jave umi eskuéla, vánko, kooperatíva térã ospitál oĩvape ñande territóriope, ikatu jaheja ñande rrevistakuéra umi sála de espéra térã vivliotékape. Upearã jajerure raẽ vaʼerã permíso pe enkargádope. Péro jahecháramo oĩmaha voi ñande rrevistakuéra umi lugárpe, natekotevẽvéima jaheja.
Jajeprepara jave javisita jey hag̃ua umi héntepe, ñapensa vaʼerã mbaʼépa ogustave káda únope. ¿Orekópa mitã? ¿Oviaha pyʼỹipa? ¿Ogustápa chupe plantakuéra? Jajeporekamína umi rrevísta itujavéva apytépe ha jahecha ndajatopáipa peteĩ artíkulo ogustátava ñande rrevisítape.
Oiméramo ndajatopavéi raʼe hógape peteĩ persóna ñanerendu porã vaʼekuére, ha upéi hasýpe ñañemongeta jey hendive, ikatu jahechauka pe ogajárape umi rrevísta itujavéva ndajahejái vaʼekue chupe.