Pe Eskuéla Jaiporukuaa Hag̃ua la Biblia áño 2015 ñanepytyvõta ñaporomboʼe porãve hag̃ua
1 Pe salmísta David ohai vaʼekue: “Jehová, hiʼãite ningo reguerohory umi mbaʼe haʼe ha apensáva. Nde ningo che Salvadór ha siémpre reñangareko cherehe” (Sal. 19:14). Ñande avei jaipota Jehová oguerohory umi mbaʼe jaʼéva, avei ñamombaʼeterei ikatu haguére ñañeʼẽ pe añeteguáre kongregasiónpe ha japredika jave ñande rapichakuérape. Jehová ningo ojevale heta mbaʼére ñanembokatupyry hag̃ua, umíva apytépe pe Eskuéla Jaiporukuaa Hag̃ua la Biblia. Ko eskuéla ojejapo káda semána ko yvy tuichakuére mas de 111.000 kongregasiónpe. Ha ombokatupyrýma opaichagua ermáno ha ermánape oikuaa hag̃ua mbaʼéichapa ikatu omboʼe hekoitépe Ñandejára Ñeʼẽ heʼíva. Avei oipytyvõ chupekuéra oikekuaa hag̃ua umi héntepe ha ipyʼaguasu hag̃ua omboʼévo pe marandu porã (Hech. 19:8; Col. 4:6).
2 Umi téma oĩva pe prográma 2015-pe oñeguenohẽ koʼã puvlikasióngui: folléto Reikuaave hag̃ua mbaʼépa oĩ Ñandejára Ñeʼẽme, lívro Mbaʼépa añetehápe omboʼe la Biblia?, Jajeroviave hag̃ua ha rrevísta Ñemañaha. Oñemombykyve avei pe tiémpo ojepurúva ojejapo hag̃ua asignasión número 1, ha umi púnto iñimportantevéva oñeguenohẽva la Bíbliagui. Ñahesaʼỹijomína koʼág̃a peteĩteĩ umi instruksión áño 2015-pe g̃uarã.
3 Púnto iñimportantevéva oñeguenohẽva la Bíbliagui. Umi ermáno ojapóva ko párte orekóta dos minúto oanalisa hag̃ua peteĩ púnto iñinteresánte ha ideprovéchotava oñeguenohẽva pe lektúra de la semánagui. Pe ermáno ojeprepara porã vaʼerã, péichamante ikatúta okomparti enterovéndi peteĩ púnto oipytyvõtava kongregasiónpe pe tiémpo oñemeʼẽvape chupe. Ha ojejapoháicha jepi voi, oheja vaʼerã seis minúto umi oĩva pe auditóriope okomenta hag̃ua umi púnto iñinteresánteva otopa vaʼekue. Káda komentário odura vaʼerã 30 segúndo térã saʼive. Ñameʼẽ hag̃ua peteĩ komentário porã 30 segúndope, tekotevẽ jajeprepara ha jajepokuaa ani jahasa ñane tiémpo. Jarrespetáramo pe tiémpo, ñande voi ñandekatupyryvéta ha ñameʼẽta avei oportunida ótrope okomenta hag̃ua umi mbaʼe oaprende vaʼekue.
4 Asignasión Núm. 1. Ko asignasión koʼág̃a ojejapo vaʼerã tres minúto térã saʼivépe, upearã oñemombykyve avei pe párte ojeleétava jepi. Umi ojapóva ko asignasión oñensaja vaʼerã heta vése en vos álta, oñehaʼã vaʼerã opronunsia porã umi palávra ha olee syryrýpe, péichamante oñentende porãta pe oleéva. Ñamombaʼeguasu hag̃ua Jehovápe hekoitépe, tekotevẽterei enterovéva ñañehaʼã jalee porã. Ñanemopirĩmba ningo ñahendu jave mbaʼeichaitépa umi mitã olee porã kongregasiónpe. Upévare jaguerohory vaʼerã tuvakuérape oñehaʼãmbaite haguére oipytyvõ ifamíliape oleekuaa hag̃ua.
5 Asignasión Núm. 2. Ko asignasiónpe, ermanakuéra ojapo vaʼerã peteĩ demostrasión oduráva cinco minúto. Oñehaʼãmbaite vaʼerã ani hag̃ua osẽ pe téma oñemeʼẽvagui chupekuéra. Ko demostrasión ojejapo vaʼerã ideprovécho hag̃uáicha territóriope, ojehechauka vaʼerã mbaʼéichapa ikatu jaipuru pe informasión japredika jave, jajapo jave rrevisíta, estúdio ha umícha. Ikatu ojepuru ambue téxto ohóva pe témare ndaipóriramo jepe pe informasión oñeasignávape. Pe eskuéla omoakãva oasignáta peteĩ ajudánte.
6 Asignasión Núm. 3. Ko asignasión oduráta cinco minúto ha ikatu ojapo ermáno térã ermána. Oñemeʼẽramo peteĩ ermánape ojapo vaʼerã asignasión número 2 ojejapoháicha. Oñemeʼẽramo peteĩ ermánope ha ndorekóirõ asterísko, ojapo vaʼerã peteĩ diskúrsoicha. Ojepurúramo pe lívro Jajeroviave hag̃ua kómo fuénte de informasión, pe ojapóva ko párte oñehaʼã vaʼerã odesarrolla porã pe téma otokáva chupe, upearã tekotevẽta oiporavo pe lívrogui umi téxto vívliko oipurútava, ha ohechauka mbaʼépa ikatu ñaaprende umi kuña ha kuimbaʼe ijerovia mbaretéva ehémplogui.
7 Peteĩ kámbio ojejapóva asignasión número 3-pe. Ko asignasiónpe oñemoĩ jave peteĩ asterísko (*) ikatu ojapo peteĩ ermána térã ermáno, péro otokáramo peteĩ ermánope, ndojapomoʼãi peteĩ diskúrsoicha, síno ojapo vaʼerã peteĩ demostrasión. Ko demostrasión ikatu ojejapo mokõi hendáicha: 1) ohechaukakuaa mbaʼéichapa oipuru pe informasión predikasiónpe, ojapoháicha umi ermána asignasión número 2-pe; ha 2) ikatu ohechauka mbaʼéichapa ojapo ijestúdio de família oipurúvo pe informasión oñeasignáva. Pe eskuéla omoakãva oiporavóta chupe iñajudanterã hogaygua voi térã ótro ermáno, ha oasignáta mbaʼe situasión térã márko de sirkunstánsiapepa ombaʼapóta. Ikatúta avei ojeporavo ambue téxto ohóva pe témare, ndaipóriramo jepe pe informasión oñeasignávape. Káda tánto oñeasignáta ko párte peteĩ ansiánope. Upéicha jave haʼete ikatu oiporavo mbaʼe situasiónpepa ombaʼapóta ha olehi iñajudanterã hogaygua voi térã ótro ermáno. Katuete ñanemokyreʼỹetereíta jahechávo umi ansiáno ohechauka jave ñandéve mbaʼéichapa ñaporomboʼe vaʼerã.
Aníkena ñandepochy umi konsého oñemeʼẽvare ñandéve, jaaprovecha vaʼerã umíva japrogresave hag̃ua
8 Konsého. Opa rire asignasión número 1, 2 ha 3, pe eskuéla omoakãva oipuru vaʼerã dos minúto omokyreʼỹ ha oipytyvõ hag̃ua pe ojapóvape upe párte omehora hag̃ua, upearã oipurúta lívro Eñembokatupyrýke. Pe omoakãva ndeʼíri vaʼerã mbaʼe leksiónpepa ombaʼapo hína pe ermáno térã ermána oñepyrũ mboyve ipárte. Ojapopa rire, oagradese ha oguerohory vaʼerã chupe, upépe heʼi vaʼerã mbaʼe leksiónpepa ombaʼapo hína ha omombeʼu vaʼerã mbaʼéichapa omoĩ en práktika umi mbaʼe heʼíva upe leksiónpe; térã ohechakuaáramo tekotevẽha, mborayhúpe heʼi vaʼerã chupe mbaʼépa ikatu ojapo omehorave hag̃ua ha avei mbaʼérepa iñimportánte upéva.
9 Umi leksión otokátava ñandéve ñambaʼapo hag̃ua oĩ lívro Eñembokatupyrýkepe, páhina 79 guive 81 peve. Opa rire pe rreunión, pe okondusíva eskuéla okorrehi vaʼerã pe estudiántepe ilívro, ha oporandu chupe ojapópa raʼe pe taréa oĩva pe leksión otokávape chupe. Ha ohechakuaáramo tekotevẽha, ikatu oñeʼẽ hendive upepete voi térã ótro moméntope, oguerohory térã heʼi hag̃ua chupe mbaʼépepa ikatu omehora. Umi orekóva asignasión eskuélape ndaipochýi vaʼerã oñemeʼẽ haguére chupe konsého, upéva rangue oaprovecha vaʼerã umi konsého oprogresave hag̃ua espiritualménte (1 Tim. 4:15).
10 Umi orekóva iñasignasión ohasáramo hiʼóra, pe eskuéla omoakãva térã iñajudánte ojapo vaʼerã álgo oavisa hag̃ua chupe diskretaménte. Por ehémplo, ikatu ombopu chupe peteĩ tímbre térã ombota ilápi algúna kósare opillaka hag̃ua pe estudiántepe ohasamaha hiʼóra. Pe orekóva iñasignasión opilla vove ojeavisaha chupe, otermina vaʼerã pe fráse heʼíva hína ha oguejýntema platafórmagui. (Ehecha lívro Eñembokatupyrýke páhina 282, párrafo 4.)
11 Oñemokyreʼỹ enterovépe oñanota hag̃ua ko eskuélape, okumplíma guive umi rrekisíto. (Ehecha lívro Eñembokatupyrýke páhina 282, párrafo 6.) Ko eskuéla oipytyvõ Jehová siervokuérape oñeʼẽ hag̃ua mborayhu ha pyʼaguasúpe Ñandejára Rréinore, avei ombokatupyry chupekuéra omboʼe porã hag̃ua umi héntepe. Jehová ningo omombaʼeterei ñañehaʼãmbaite haguére ñañembokatupyryve ñamombaʼeguasu hag̃ua chupe hekoitépe (Sal. 148:12, 13; Is. 50:4).