Esegíkena eñemboʼe Ñandejárape nevendesi hag̃ua

Ñandejára omeʼẽ yvyporakuérape peteĩ rregálo ndaijojaháiva: pe ñemboʼe. Upéva rupive ikatu ñañekomunika hendive ha ñamombeʼu chupe opaite mbaʼe ñañandúva. Pe proféta David heʼi vaʼekue voi peteĩ ñemboʼépe: “Ñandejára, nde ningo rehendu umi hénte ñemboʼe, ne rendápe oúta opaichagua persóna” (Salmo 65:2). Péro, ¿mbaʼéichapa ñañemboʼe vaʼerã ikatu hag̃uáicha Ñandejára ñanerendu ha ñanevendesi?

ÑANEUMÍLDE VAʼERÃ HA ÑAÑEMBOʼE ÑANDE PYʼAITE GUIVE

Reñemboʼévo Ñandejárape neañoháme ikatu ‘emombeʼupaite chupe umi mbaʼe oĩva nde pyʼapýpe’ (Salmo 62:8). Ñandejára todopoderósope g̃uarã ningo iñimportanteterei umi ñemboʼe jajapóva chupe ñande pyʼaite guive.

EIPURU ÑANDEJÁRA RÉRA EÑEMBOʼE JAVE

Ñandejára ningo oguereko heta título, péro la héra tee peteĩnte hína. Haʼe voi heʼi: “Che hína Jehová, péicha che réra” (Isaías 42:8). Ñandejára réra Jehová ningo oĩ voi amo 7.000 véserupi Iñeʼẽme. Ha heta proféta yma guare oipuru vaʼekue avei Ñandejára réra oñemboʼe jave chupe. Por ehémplo Abrahán heʼi vaʼekue: “Jehová, [...] ikatúpa aporandumi jey ndéve [peteĩ mbaʼe]” (Génesis 18:30). Ha ñande avei jaipuru vaʼerã Jehová réra ñañemboʼe jave chupe.

EÑEMBOʼE NE IDIOMAITÉPE

Ñandejára ningo ontende ñane pensamiénto ha umi mbaʼe ñañandúva tahaʼe haʼéva ñane idióma. Iñeʼẽme haʼe oasegura voi ñandéve: ‘Ñandejára otrata enterovépe peteĩchante, haʼe oguerohory entéro umi ojapóvape iporãva ha orrespetáva chupe ipyʼaite guive, tahaʼe haʼéva nasiónpe’ (Hechos 10:34, 35).

Upéicharõ jepe, jaipotáramo Ñandejára ñandeguerohory ndahaʼéi ñañemboʼénte vaʼerã, síno jajapo vaʼerã hetave mbaʼe. Umi ótro artíkulope ñahesaʼỹijóta mbaʼe mbaʼépa jajapo vaʼerã.