Ñandejára ovendesíta umi oipytyvõvape hapichápe

Ko múndo tuichakuére oĩ ndorekóiva hoʼu vaʼerã ni hogarã. Oĩ avei oikotevẽva oñemeʼẽ chupe esperánsa osegi hag̃ua oaguanta. ¿Mbaʼérepa jaʼekuaa ñaipytyvõramo chupekuéra Ñandejára ñandeguerohory ha ñanevendesitaha?

MBAʼÉPA HEʼI ÑANDEJÁRA ÑEʼẼ

“Pe imbaʼeporãva imboriahúvandi Jehovápe voi oipuruka hína, ha haʼe katuete opagáta chupe” (PROVERBIOS 19:17).

MBAʼÉPA HEʼISE ÑAIPYTYVÕ OIKOTEVẼVAPE

Peteĩ ehémplope, Jesús oñeʼẽ vaʼekue peteĩ kuimbaʼe ojeasalta vaʼekuére, ha umi mondaha oheja reíntema chupe oimoʼãgui omanomaha (Lucas 10:29-37). Peteĩ karai opyta ha okuida pe kuimbaʼe oñelastima vaipaite vaʼekue rehe. Ha hiʼarive upe karai haʼe kuri peteĩ extráño oúva ótro paísgui.

Ko karai imbaʼeporãiterei, upévare oipohãno pe kuimbaʼe erída ha opaga umi gásto orekótava okueraite peve. Péro ndahaʼéi upéva añónte la ojapóva, upéva rangue, omeʼẽ avei chupe pe konsuélo oikotevẽ vaʼekue.

¿Mbaʼépa ñaaprende upe ehémplogui? Jesús ohechauka kuri jajapo vaʼerãha ikatúva guive ñaipytyvõ hag̃ua umi oikotevẽvape (Proverbios 14:31). Ñandejára Ñeʼẽ ohechauka koʼẽrõitéma haʼe osolusionataha umi provléma ponove oĩ imboriahúva ha osufríva. Péro ikatu oiméne reñeporandu: “¿Arakaʼe piko Ñandejára ojapóta upéva?”. Pe ótro artíkulope jahecháta umi vendisión Ñandejára opreparáva ñandéve g̃uarã.