Mbaʼéichapa ikatu jaipuru umi tratádo ñañemongeta hag̃ua la héntendi

Enero 2018 guive, pe Prográma rreuniónpe g̃uarãme osẽ umi presentasión ñanepytyvõva ñañemongeta hag̃ua la héntendi. Ojeʼe kuri avei ñandéve ñañemongeta hag̃ua la héntendi predikasiónpe, jahejánte rangue chupekuéra peteĩ puvlikasión. Upéicha rupi umi vidéo de demostrasiónpe ojehechauka jepi ñandéve mbaʼéichapa ikatu jaipuru la Bíbliante ñañemongeta hag̃ua la héntendi predikasiónpe. ¿Péro heʼisépa upéva ndovaleiha jaipuru umi puvlikasión japredika jave ogahárupi? Nahániri. Por ehémplo, umi tratádo tuichaiterei ñanepytyvõ ñañepyrũ hag̃ua ñañemongeta umi héntendi. Jaipurúta jave ikatu jajapo péicha:

1. Jajapo pe porandu oĩva pe tratádo apére ha jajerure chupe toiporavo peteĩva umi rrespuésta.

2. Jahechauka chupe pe téxto oĩva pe segunda páhina oñepyrũvo. Itiémporamo pe persóna, jalee ha ñaanalisa hendive pe informasión oĩva pe tratádope.

3. Jaheja pe persónape pe tratádo ha ñamokyreʼỹ chupe oleepa hag̃ua ág̃a.

4. Ipahaitépe ikatu jahechauka chupe pe porandu oĩva pe párte heʼihápe “Mbaʼépa nde ere”, upéi jaʼe chupe jahataha ñarresponde hag̃ua chupe la Biblia rupive upe pregúnta.

Jarrevisita vove upe persónape, ñaanalisa hendive la rrespuésta ha jaheja jey peteĩ porandu ótro jahávape g̃uarã. Ikatu jaiporavo peteĩ porandu oĩva ñane páhinape Internétpe térã pe puvlikasión oñemensionávape pe tratádope. Otoka porã vove ikatu jahechauka chupe pe folléto ¡Notísia porã oúva Ñandejáragui!, térã oimeraẽ ótra puvlikasión oĩva pe kit de enseñánzape ha jaipurúva jastudia hag̃ua la héntendi.