Oñeporandúva jepi
¿Heʼise piko rakaʼe Pablo 1 Corintios 15:29-pe, oĩ hague umi kristiáno itiempopegua ojevautisa vaʼekue umi omanóva vése?
No, la Bíbliape ni umi lívro de istóriape ndajatopamoʼãi umi kristiáno ojapo hague upéva.
Ko téxto ojetradusi lája heta Bíbliape, omopensa la héntepe umi kristiáno yma guare ojevautisa hague umi omanóva vése. Por ehémplo, peteĩ Biblia heʼi: “Upeichaʼỹramo, mbaʼépa ojapóne umi ojevautisa vaʼekue umi omanóma vaʼekue rendaguépe” (Ñande Ruete Ñeʼẽ Bíblia).
Péro jahechami mbaʼépa heʼi mokõi expérto oñeʼẽva la Bíbliare. Pe profesór Gregory Lockwood heʼi la Bíbliape ni pe istóriape, ndaiporiha pruéva oĩ hague ojevautisáva umi omano vaʼekue vése. Péicha avei oskrivi vaʼekue pe profesór Gordon Fee. Haʼe heʼi ndajatopamoʼãiha ni peteĩ ehémplo la Bíbliape ni pe istóriape oĩ hague ojapóva peichagua vautísmo. Heʼi avei koʼã mbaʼe ndajatopamoʼãiha pe Nuevo Testaméntope, ha ndaiporiha avei pruéva umi kristiáno ypykue ojapo hague upéicha, ni umi iglésia oñeforma vaʼekuépe omano riremi umi apóstol.
La Biblia heʼi Jesús segidorkuéra ‘omboʼe vaʼerãha umi hénte entéro paisguápe oiko hag̃ua chuguikuéra Jesús disípulo, ha ovautisa chupekuéra. Avei omboʼe vaʼerã chupekuéra entéro mbaʼe haʼe omanda vaʼekue’ (Mat. 28:19, 20). Peteĩ persóna ojevautisa mboyve tekotevẽ oikuaa, oguerovia, ha iñeʼẽrendu Jehovápe ha Jesúspe. Peteĩ persóna omanóma vaʼekue ha oĩva pe sepultúrape, ndaikatumoʼãi ojapo upéva. Ha ndaikatumoʼãi avei peteĩ kristiáno oikovéva ojapo upéva ivése (Ecl. 9:5, 10; Juan 4:1; 1 Cor. 1:14-16).
Upéicharõ, ¿mbaʼépa heʼise vaʼekue apóstol Pablo?
Pe kongregasión de Coríntope oĩ vaʼekue heʼíva umi omanóva ndorresusitamoʼãiha (1 Cor. 15:12). Pablo ohechauka ojavyha hikuái. ¿Mbaʼéichapa? Haʼe heʼi chupekuéra: “Che ningo káda día ajapeligra”. Pablo ojapeligráramo jepe, ojerovia vaʼekue oñemoingove jeytaha chupe peteĩ espíritu poderósoicha oiko haguéicha Jesús rehe (1 Cor. 15:30-32, 42-44).
Umi Corintogua ontende vaʼerã haʼekuéra haʼe rupi unhído, káda día ohasataha heta mbaʼe ijetuʼúva, ha omano vaʼerãha oñemoingove jey mboyve chupekuéra. Upéicharõ, haʼekuéra ‘ojevautisárõ guare ha omoirũ Cristo Jesúspe, ojevautisa avei omano hag̃ua haʼe omano haguéicha’ (Rom. 6:3). Upéva heʼise haʼekuéra ombohovaitaha heta mbaʼe ijetuʼúva, ha omano vaʼerãha orresusita mboyve yvágape oiko haguéicha Jesús rehe.
Mas de 2 áño ojevautisa rire ýpe, Jesús heʼi vaʼekue mokõi ijapóstolpe: “Che ajevautisaháicha, pejevautisáta avei” (Mar. 10:38, 39). Ápe ningo Jesús noñeʼẽi kuri pe vautísmo ojejapóvare ýpe. Upéva rangue, haʼe heʼise vaʼekue añetehápe omanotaha iñeʼẽrendu rupi Ñandejárape. Pablo oskrivi vaʼekue umi unhído ohasa asy vaʼerãha Jesús ohasa asy haguéicha, ha upéi orresivi hag̃ua peteĩ puésto iñimportánteva haʼe orresivi haguéicha (Rom. 8:16, 17; 2 Cor. 4:17). Upéicharõ haʼekuéra avei omano vaʼerã kuri oñemoingove jey hag̃ua yvágape.
Jaʼekuaa upéicharõ Pablo heʼi vaʼekue ikatuha ojetradusi kóicha: “Upéicharõ, ¿mbaʼépa ojapóta umi ojevautisáva omano hag̃ua? Umi omanóvape ni mbaʼevéicharõ noñemopuʼãmoʼãirõ, ¿maʼerã piko upéicharõ ojevautisa hikuái omano hag̃uánte?”.