¿Mbaʼépa rejapo vaʼerã reiko hag̃ua pe múndo pyahúpe?

Umi ótro artíkulope jahecha koʼẽrõitéma Ñandejára ohunditaha entéro umi hénte añáme ha umi provléma oĩva. Ndajadudái vaʼerã oikotaha koʼã mbaʼe. ¿Mbaʼérepa ikatu jaguerovia oikotaha? Pórke Ñandejára Ñeʼẽ la Biblia opromete ñandéve koʼã mbaʼe:

‘Pe múndo ohasa ohóvo’ (1 JUAN 2:17).

Ikatu ñaĩ segúro oĩtaha ojesalváva pórke pe versíkulope la Biblia heʼi avei:

“Pe ojapóva Ñandejára rembipota oikovéta pára siémpre”.

Upéicharõ, jajesalvaséramo tekotevẽ jajapo Ñandejára volunta. Jaikuaa hag̃ua mbaʼépa hína ivolunta, primeroite voi jaikuaa porã vaʼerã Ñandejárape.

JAJESALVA HAG̃UA JAIKUAA VAʼERÃ ÑANDEJÁRAPE

Fotokuéra: 1. Peteĩ enferméra oguapy pe ospitál písope ikaneʼõ ha ojedesespera rupi. 2. Pe enferméra oho kafeteríape opytuʼu ha hoʼu hag̃ua álgo ha ohecha peteĩ ikompañéra de traváho oleeha peteĩ rrevísta ha opukavyha. 3. Pe ikompañéra de traváho olee chupe peteĩ téxto de la Biblia ha omeʼẽ chupe peteĩ tarhéta jw.org

Jesús heʼi vaʼekue: “Umi hénte oikove hag̃ua pára siémpre tekotevẽ ndekuaa ndéve, nde hína Ñandejára teete ha peteĩetéva” (Juan 17:3). Jajesalva hag̃ua ha jaikove hag̃ua pára siémpre tekotevẽ ‘jaikuaa Ñandejárape’. Upéva ndeʼiséi ovalemaha jagueroviánte Ñandejára oexistiha ha jaikuaa algúna kósa chugui, síno tekotevẽ oiko ñandehegui Ñandejára amígo. Ha ñapensamíntena peteĩ ñane amígore, ñakonfiave hag̃ua ojuehe jahasámante vaʼerã tiémpo hendive, ¿ajépa? Upéva avei tekotevẽ jajapo imbarete hag̃ua ñane amista Ñandejárandi. Jahechamína mbaʼépa omboʼe la Biblia, upéva ñanepytyvõta ñañemoag̃ui hag̃ua hese ha jaiko hag̃ua iñamígoramo.

Umi mbaʼe ñaaprendéva la Bíbliape

Ñandejára siémpre voi oipota kuri jaiko peteĩ paraísope.

Haʼe okrea pe primer kuimbaʼe ha kuña hérava Adán ha Eva, ha omoĩ chupekuéra peteĩ lugár neporãvape, hérava hardín de Edén. Adán ha Eva perfékto vaʼekue ha Ñandejára omeʼẽ chupekuéra la oikotevẽva guive ovyʼa hag̃ua. Haʼekuéra ikatu kuri oikove pára siémpre osegírire oiko Ñandejára amígoramo. Péro odesidi ndojapomoʼãiha hikuái peteĩ mbaʼe isensilloitereíva ojeruréva Ñandejára.

Mbaʼérepa jasufri ha ñaneprovléma.

Pe primer kuimbaʼe naiñeʼẽrendúi vaʼekue Ñandejárape. Péicha operde pe oportunida oikove hag̃ua pára siémpre ha upéva ohupyty entéro yvypórape. La Biblia heʼi: “Peteĩ kuimbaʼe rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro persónape pórke enterovéva opeka” (Romanos 5:12). Umi tuakuéra ikatuháicha ombohasa ifamíliape umi mbaʼasy orekóva, Adán ombohasa pe imperfeksión entéro ifamiliarépe. Upéicha rupi yvypóra ituja, ig̃uaig̃ui ha upéi omano.

Mbaʼépa Ñandejára ojapóma ñanderehehápe.

La Biblia heʼi: “Ñandejára ningo ohayhueterei umi héntepe, upévare ontrega Itaʼýra peteĩete orekóva, péicha entéro umi ohechaukáva ojeroviaha hese noñehundimoʼãi síno ikatúta oikove pára siémpre” (Juan 3:16). Ñandejára ombou ko yvy ape ári itaʼýra Jesucrístope omano hag̃ua ñanderehehápe. ¡Ajépa ñanderayhuete! Peteĩ karai hérava Prabhakar, orekóva 86 áño ha oikóva Índiape, ojepyʼamongeta la Ñandejára ojapo vaʼekuére ha heʼi: “Upéva ohechauka chéve mbaʼeichaitépa Jehováa cherayhu. Haʼe cherayhu rupi areko pe esperánsa aikovévo pára siémpre”.

Mbaʼéichapa ikatu jahechauka javaloraha Ñandejára ojapo vaʼekue.

La Biblia heʼi ikatuha jahechauka ñamombaʼeha la Ñandejára ojapo vaʼekue “jasegíramo ñakumpli imandamientokuéra” (1 Juan 2:3). Ñandejára Jehová ñanderayhuetéva ñanemboʼe mbaʼépa ikatu jajapo javyʼa hag̃ua koʼág̃ama voi (Isaías 48:17, 18). Haʼe ndoipotái jasufri. Upévare oasegura ñandéve jasegíramo la haʼe heʼíva jaikotaha vyʼápe koʼág̃a, ha amo gotyove jaikóta pára siémpre.

ELEE KÁDA DÍA ÑANDEJÁRA ÑEʼẼ

Opytuʼu aja pe enferméra olee la Biblia pe ospitál korapýpe ha upéi omaña yvága gotyo — Ikatu reiko pe múndo pyahúpe ejeruréramo Ñandejárape nepytyvõ hag̃ua ha ejapórõ ivolunta

Ñande ningo jakaru káda día jasegi hag̃ua jaikove. Péro Jesús heʼi vaʼekue: “Yvypóra noikotevẽi pan añónte oikove hag̃ua, síno oikotevẽ opaite mbaʼe Jehová heʼíva” (Mateo 4:4).

La Bíbliape ikatu jatopa opaite mbaʼe Jehová heʼíva. Restudiávo rehóvo ko lívro sagrádo, rehecháta umi mbaʼe Ñandejára ojapo vaʼekue yma, la ojapóva koʼág̃a ha la ojapótava amo gotyove.

EJERURE ÑANDEJÁRAPE TANEPYTYVÕ

Ikatu oime rejapose la Ñandejára volunta, péro oĩ algúna kósa ndogustáiva chupe ha ijetuʼu ndéve reheja hag̃ua. Oimérõ upéva oiko nderehe, tuichavéntema nepytyvõta la reikuaa porãramo Ñandejárape.

Jahechamína la oiko vaʼekue peteĩ kuña héravare Sakura.b Haʼe hekovai vaʼekue, péro upéi oñepyrũ ostudia la Biblia ha ohechakuaa Ñandejára heʼiha: “Pediparáke oimeraẽ mbaʼe ikatúvagui pendegueraha tekovaípe” (1 Corintios 6:18). Sakura oñemboʼe Ñandejárape oipytyvõ hag̃ua chupe ha péicha rupi haʼe okambia oiko lája. Péro koʼág̃a peve haʼe osegi oñehaʼã ani hag̃ua oity jey chupe umi tentasión. Sakura heʼi: “Añepyrũrõ apensa umi mbaʼe vaíre, añemboʼe Jehovápe ha añeʼẽ hendive sinséramente, pórke aikuaa ndaikatumoʼãiha agueropuʼaka ko situasión cheaño. Añemboʼe rupi Jehovápe añemoag̃uive hese”. Oĩ hetaiterei hénte oñepyrũva avei oikuaa Ñandejárape ha oñemoag̃ui hese. Haʼe omeʼẽ chupekuéra pe fuérsa oikotevẽva okambia hag̃ua ha oiko hag̃ua haʼe oipotaháicha (Filipenses 4:13).

Reikuaa porãvévo rehóvo Ñandejárape haʼe ndekuaáta avei ha oikóta ndehegui iñamígo (Gálatas 4:9; Salmo 25:14). Péicha ikatúta rejesalva ha reiko Ñandejára múndo pyahúpe. Péro, ¿mbaʼéichatapa pe múndo pyahu? Pe sigiénte artíkulo oñeʼẽta upévare.

a La Biblia heʼi Ñandejára heraha Jehová.

b Oñekambia héra.