Jaikuaave hag̃ua

¿Mbaʼérepa Jehová opermiti vaʼekue umi israelítape oipuru tortóla térã palóma raʼy sakrifisiorã?

PE LÉI oñemeʼẽ vaʼekue Moiséspe heʼi vaʼekue umi israelita ikatuha oipuru umi tortóla ha avei umi palóma raʼy ojapo hag̃ua ofrénda Jehovápe g̃uarã. Pe léi oñeʼẽ jave umi ofrénda ojehapývare siémpre omensiona koʼã mokõi guyraʼi oñondive, ha heʼi umi israelita ikatuha oipuru mokõivéva peteĩchante (Lev. 1:14; 12:8; 14:30). ¿Mbaʼérepa ou porãite vaʼekue ko léi umi israelítape? Pórke heta vése ijetuʼu vaʼekue chupekuéra otopa hag̃ua umi tortóla pe sóna haʼekuéra oikohárupi. ¿Mbaʼérepa upéva?

Umi tortóla ningo oiko vaʼekue Israel tuichakuére haku tiémpope, péro káda octubre roʼy tiémpope Israélpe, koʼã guyra oho ótro paíspe ha ou jey Israélpe pe primavérarupi (Cant. de Cant. 2:11, 12; Jer. 8:7). Upéva heʼise roʼy tiémpope umi israelita ndaikatumoʼãiha otopa umi tortóla ojapo hag̃ua sakrifísio.

Umi palóma raʼy katu ndohóimi vaʼekue moõve, ha upévare ikatu ojetopa chupekuéra Israélpe tódo el áño. Oĩ vaʼekue voi Israélpe heta okriáva umi palóma raʼy (ekompara Juan 2:14, 16 heʼívare). Peteĩ lívro heʼi: “Palestina tuichakuére oĩ vaʼekue heta okriáva umi palóma raʼy, ha káda ógape orekómi vaʼekue voi hikuái umi kuára ipare rehe ikatu hag̃uáicha koʼã guyra oñembohaity upépe” (ekompara Isaías 60:8 heʼívare).

Jehová heʼívo umi israelítape oaseptaha umi guyra ikatúva haʼekuéra okonsegi tódo el áño, ohechauka ohayhuetereiha chupekuéra ha avei imbaʼerechakuaaha hendivekuéra.