¿Mbaʼéichapa pene noviásgo ikatu omombaʼeguasu Jehovápe?

1, 2. ¿Mbaʼépa heʼi algúno pe noviásgore?

PE NOVIÁSGO ningo peteĩ tiémpo iporãiterei ha igustoitereíva. Ha oiméramo nde reime de nóvio, katuete pedisfrutase ko tiémpo, ha heta oĩ ojapóva upéicha. Peteĩ ermána Etiopiagua hérava Tania,a heʼi: “Avyʼaiterei vaʼekue che ména ha che roimérõ guare de nóvio. Roñemongeta heta mbaʼe iñimportantetereívare, péro heta ropuka avei. Chembovyʼaiterei ningo atopa haguére álgien cherayhúva che ahayhuháicha chupe”.

² Peteĩ ermáno Países Bajosgua hérava Alessio omombeʼu: “Igustoiterei vaʼekue che rembireko ha che roñanoviárõ guare, péro heta mbaʼe ijetuʼu vaʼekue avei”. Ko artíkulope jahecháta mbaʼe mbaʼépa ikatu hína ijetuʼu umi oĩvape de nóvio, ha mbaʼéichapa la Biblia ikatu oipytyvõ chupekuéra osẽ porã hag̃ua la inoviásgo. Avei jahecháta mbaʼépa ikatu ojapo ermanokuéra oapoja hag̃ua chupekuéra.

¿MAʼERÃPA LA NOVIÁSGO?

3. ¿Maʼerãpa peteĩ noviásgo? (Proverbios 20:25).

³ Peteĩ mbaʼe iporãitereíva ningo la oñeñepyrũ peteĩ noviásgo. Péro avei iñimportanteterei, pórke ikatu oñepyrũ hína peteĩ matrimónio. Pe omendaha díape umi nóvio opromete Jehová renondépe ojoayhu ha ojorrespetataha hikuái oikove aja entéro. Upévare pepensa porã vaʼerã pejapo mboyve ko kompromíso (elee Proverbios 20:25). Pe noviásgo ningo penepytyvõta mokõivépe pejokuaa porã hag̃ua ha pedesidi porã hag̃ua. Upe tiémpope pehecháta pemendátapa térãpa pejedeháta. Pedesidíramo pejedehataha, upéva ndeʼiséi hína osẽ vai hague la noviásgo. Penemanduʼa vaʼerã maʼerãpa pe noviásgo: Penepytyvõta pedesidi porã hag̃ua.

4. ¿Mbaʼérepa iñimportantete ñantende porã maʼerãpa hína peteĩ noviásgo?

⁴ ¿Mbaʼérepa iñimportantete umi oĩva soltéro ontende porã maʼerãpa la noviásgo? Pórke peteĩ soltéro ontende porãramo upéva, nomoñepyrũmoʼãi mbaʼeve avavéndi nopensáiramo hína omenda. Péro ndahaʼéi umi soltéro añónte ontende vaʼerã maʼerãpa peteĩ noviásgo, síno iñimportánte enterove ñantende porã upéva. Por ehémplo oĩ umi opensáva umi oĩva de nóvio omenda vaʼerãha katuete. ¿Ha mbaʼéichapa upéva ikatu oafekta umi oĩvape soltéro? Peteĩ ermána soltéra Estados Unidosgua hérava Melissa heʼi: “Oĩ ningo umi ermáno oipotaitereíva omenda umi oĩva de nóvio. Upéicha rupi oĩ algúno ndojedeháiva ohechakuaáramo jepe ndahaʼeiha ojupe g̃uarã. Ha oĩ avei umi odesidíva ndorekomoʼãiha mbaʼeve avavéndi, péicha ndoikomoʼãi ojepyʼapy mbaʼevére”.

PEÑEHAʼÃKENA PEJOKUAA PORÃ

5, 6. ¿Mbaʼépa tekotevẽ oñehaʼã oikuaa ojuehegui umi oĩva de nóvio? (1 Pedro 3:4).

⁵ Oiméramo peime hína de nóvio, ¿mbaʼépa penepytyvõta pedesidi hag̃ua pemendátapa térãpa nahániri? Upearã pejokuaa porã vaʼerã. Katuete ningo peikuaavéta álgo ojuehegui ndapeikuaái vaʼekue peñemoĩ mboyve de nóvio. Ha koʼág̃a pereko la oportunida peikuaa porã hag̃ua mbaʼépa oreko pe ótra persóna ikorasõme (elee 1 Pedro 3:4). Peime aja de nóvio ikatu eikuaave mbaʼeichagua amistápa oreko pe persóna Jehovándi, mbaʼéichapa opensa ha mbaʼeichagua persónapa haʼe. Mbeguekatúpe ikatútama rekontesta koʼã pregúnta: “¿Iporãta piko amenda hese? ¿Haʼe piko hína pe ména térã tembireko che aikotevẽva? (Prov. 31:​26, 27, 30; Efes. 5:33; 1 Tim. 5:8). ¿Ikatúta piko ahayhu ha añangareko porã hese haʼe oikotevẽháicha? ¿Aaguantátapa umi defékto haʼe orekóva?” (Rom. 3:23).b Penemanduʼákena: Umi persóna ojogueraha porãva ndahaʼéi hína umi ojojoguáva heta mbaʼépe, síno umi ojadaptáva ojuehe ndogustáiramo jepe chupekuéra la mísma kósa.

⁶ ¿Mbaʼépa avei eñehaʼã vaʼerã eikuaave pe ótra persónagui peime aja de nóvio? Ehayhueterei mboyve pe persónape, iporãta peñeʼẽramo umi mbaʼe iñimportántevare, por ehémplo mbaʼe métapa pereko. Kon el tiémpo ikatu avei eporandu chupe orekópa algún mbaʼasy, provléma ekonómiko térã ohasápa raʼe álgo ijetuʼuetereíva oafekta vaʼekue chupe. Koʼã mbaʼe natekotevẽi eporandupa chupe oñepyrũre pe noviásgo (ekompara Juan 16:12 heʼívare). Oiméramo ndéve g̃uarã pyaʼetereíma peñeʼẽ hag̃ua algúno témare, ere porãnte vaʼerã. Péro kon el tiémpo pe persóna oikuaámante vaʼerã odesidi porã hag̃ua, upéicharõ tekotevẽta peñeʼẽ en algún moménto koʼã témare.

7. ¿Mbaʼépa ikatu ojapo umi oĩva de nóvio ojokuaa porãve hag̃ua? (Ehecha pe rrekuádro “Eñanoviáramo peteĩ mombyryguándi”). (Ehecha pe taʼanga).

⁷ ¿Mbaʼépa penepytyvõta peikuaa porã hag̃ua mbaʼeichagua persónapa mokõivéva? Upearã ikatu peporandu ojupe heta mbaʼe ha pejapysaka porã ojuehe. Mokõivéva tekotevẽ pemombeʼu porã ojupe mbaʼéichapa peñeñandu ha penesinséro oñondive (Prov. 20:5; Sant. 1:19). Ikatu pejapo oñondive umi mbaʼe ifasiltahápe peẽme peñemongeta. Por ehémplo pekaru oñondive, pesẽ peguata hetahápe hénte ha pepredika oñondive. Avei penepytyvõta pejokuaa porãve hag̃ua pehasáramo tiémpo pene amigokuéra ha pene famíliandi. Ikatu peorganisa diferénte mbaʼe pejapo hag̃ua ha diferénte persónandi, péicha pehecháta mbaʼéichapa peñekomporta káda uno umícha jave. Péicha ojapo vaʼekue peteĩ ermáno Países Bajosgua hérava Albert oĩrõ guare de nóvio Alicia ndive. Haʼe heʼi: “Rohecha vaʼekue rojapo umi mbaʼe orepytyvõtava rojokuaa porã hag̃ua. Rojapo umi mbaʼe isensíllovante, por ehémplo rokosina oñondive ha rojapo umi tembiapo ogapypegua. Koʼã mbaʼe orepytyvõ rohechakuaa hag̃ua umi mbaʼe porã rorekóva ha avei umi ore defékto”.

8. ¿Mbaʼérepa oipytyvõta umi oĩva de nóvio ostudiáramo oñondive?

⁸ Avei penepytyvõta pejokuaa porãve hag̃ua pestudiáramo oñondive la Biblia. Pedesidíramo pemenda, peñemotiémpomante vaʼerã upéi pejapo hag̃ua pende estúdio de família, péicha Jehová oĩ hag̃ua pene matrimóniope (Ecl. 4:12). Upévare, ¿mbaʼérepa ndapehechái koʼág̃ama guive pestudia hag̃ua oñondive? Ñanemanduʼákena umi oĩva de nóvio ndahaʼeitiha peteĩ família, ha pe ermáno neʼĩraha gueteri omoakã pe ermánape. Upéicharõ jepe iporãta pejepokuaáramo pestudia oñondive pehechakuaa hag̃ua mbaʼeichagua amistápa pereko káda uno Jehovándi. Max ha Liza, Estados Unidosgua, omombeʼu mbaʼéichapa oipytyvõ vaʼekue avei chupekuéra ostudia oñondive. Pe ermáno omombeʼu: “Roñemoĩ guive de nóvio rostudia umi puvlikasión oñeʼẽva noviásgo, matrimónio ha famíliare. Upéicha rupi ikatu vaʼekue roñemongeta umi mbaʼe iñimportántevare, pórke péicha péichante noroñeʼẽmoʼãi kuri umívare”.

¿MBAʼÉPA AVEI IPORÃ PEREKO ENKUÉNTA?

9. Oĩramo oñemoĩva de nóvio, ¿mbaʼépa oreko vaʼerã enkuénta odesidi hag̃ua mávapepa omombeʼúta upéva?

⁹ ¿Mávapepa pemombeʼúta peĩha de nóvio? Upéva oñondivéma pedesidi vaʼerã. Oiméramo peñepyrũramo ikatu pemombeʼuse algúnopente (Prov. 17:27). Péicha noñeporandumoʼãi peẽme heta mbaʼe, ha la hénte napendejopymoʼãi pedesidíma hag̃ua álgo. ¿Péro mbaʼépa oikóta napemombeʼúiramo avavépe? Ikatu hína peñemohaʼeño ndapeipotáiguinte ojekuaa ha upéva ipeligróso. Upévare iporãta pemombeʼúramo umi ikatútavape penepytyvõ ha omeʼẽ peẽme konsého. Por ehémplo algúno pene hentekuérape, pene amígo iñakãguapývape térã umi ansianokuérape (Prov. 15:22).

10. ¿Mbaʼépa oipytyvõta umi oĩvape de nóvio hekopotĩ hag̃ua? (Proverbios 22:3).

¹⁰ ¿Mbaʼépa penepytyvõta pene noviásgo ipotĩ hag̃ua Jehová renondépe? Amedída ke ohasa la tiémpo ha pesegi oñondive, imbaretevéta avei la peñandúva ojuehe. Péro katuete ndapejaposemoʼãi mbaʼeve pendereja vaítava Jehová renondépe (1 Cor. 6:18). Upévare, aníkena peñeʼẽ mbaʼe tieʼỹre, pepyta peneañoháme ni peʼu rasa vevída oñondive (Efes. 5:3). Entéro koʼã mbaʼe ikatu hína penemoakãrakuve ha ijetuʼuve peẽme pesegi hag̃ua penderekopotĩ. Upévare iporã peñemongeta meme la pejapótavare pehechauka hag̃ua pejorrespetaha ha pemombaʼeha Jehová léi (elee Proverbios 22:3). Por ehémplo David ha Álma Etiopiagua, omombeʼu: “Siémpre roime vaʼekue ore amigokuérandi térã peteĩ lugár hetahápe hénte. Núnka noroiméi vaʼekue oreaño peteĩ áutope ni peteĩ ógape. Péicha ndorojapeligrái vaʼekue ni michĩmi”.

11. ¿Mbaʼépa oreko vaʼerã enkuénta umi oĩva de nóvio ohechauka hag̃ua ojupe ojoayhuha?

¹¹ ¿Iporãpa umi oĩva de nóvio oñomokunuʼũ? Amedída ke ohasa la tiémpo ikatu hína pedesidi pehechaukataha ojupe pejoayhuha pehasaʼỹre la rrája. Péro peneakãrakuetereíramo ojuehe ikatu hína ijetuʼuve peẽme pedesidi porã hag̃ua (Cant. de Cant. 1:2; 2:6). Pehechauka jave ojupe pejoayhuha ikatu hína ndapejejokokuaavéi ha pejapo álgo ndogustáiva Jehovápe (Prov. 6:27). Upévare peñepyrũre voi pene noviásgo peñemongetáma vaʼerã mbaʼe mbaʼépa pejapóta ha ndapejapomoʼãi ani hag̃ua pehasa la rrája. Péicha pesegíta perrespeta la Jehová heʼíva (1 Tes. 4:​3-7).c Peñeporandúkena: “¿Mbaʼépa opensa la hénte pe lugár jaikohápe umi oĩva de nóvio oñomokunuʼũramo? ¿Ñañomoakãrakuete reítapa jajapóramo upéicha?”.

12. Umi oĩva de nóvio ojoavy jave, ¿mbaʼépa oreko vaʼerã enkuénta?

¹² ¿Mbaʼépa pejapo oĩ jave provléma ha pejoavy mimi jave? Oiméramo pejoavy mimi jepi, ¿heʼisépa upéva peẽ ndahaʼeiha ojupe g̃uarã? Ndahaʼéi katuete upéicha, entéro paréha ningo ojoavy jepi voínte. Peteĩ matrimónio imbarete hag̃ua, mokõivévante ojorrespeta ha oñehaʼãmbaite vaʼerã ojadapta ojuehe. Koʼág̃a pesolusionakuaáramo peneprovléma, upéva penepytyvõta pemenda rire. Peñeporandumína: “Oĩ jave la provléma, ¿ikatúpa roñemongeta trankílo porã ha siémpre rojorrespeta? ¿Ensegídapa rorrekonose rojavy hague ha roñehaʼã romehora? ¿Roñemohatãpa la ropensávape, térãpa rojerure diskúlpa ha roñoperdona?” (Efes. 4:​31, 32). Péro pereko vaʼerã enkuénta ko mbaʼe: Oiméramo pyʼỹieterei pejoavy ha pejodiskuti peime aja de nóvio, aníkena peimoʼã pemenda rire iporãvetaha la situasión. Pehechakuaáramo peẽ ndahaʼeiha ojupe g̃uarã, iporãvéta hína mokõivépe g̃uarã opáramo pene noviásgo.d

13. ¿Mboy tiémpopa ipuku vaʼerã peteĩ noviásgo?

¹³ ¿Mboy tiémpopa ipuku vaʼerã peteĩ noviásgo? Jajapuraitereírõ jadesidi hag̃ua peteĩ mbaʼe, osẽ vai jepi (Prov. 21:5). Upévare iporãta peñemotiémpo pejokuaa porã hag̃ua, péro natekotevẽi avei pembopuku rei. La Biblia ningo heʼi voi: “Ñanemokorasõ rasy ningo otarda jave álgo ñahaʼarõitereíva” (Prov. 13:12). Avei amáske ipuku pe noviásgo ijetuʼuvéta peẽme pejejokokuaa hag̃ua, ha ikatu hína peju penderekovai (1 Cor. 7:9). Peiko rangue pejepyʼapy mboy tiémpopa ipuku vaʼerã pene noviásgo, iporãta peñeporandúramo: “¿Mbaʼépa tekotevẽ roikuaave ojuehegui rodesidi hag̃ua mbaʼépa rojapóta?”.

¿MBAʼÉICHAPA IKATU JAAPOJA UMI OĨVAPE DE NÓVIO?

14. ¿Mbaʼe mbaʼépa ikatu jajapo jaapoja hag̃ua umi oĩvape de nóvio? (Ehecha pe taʼanga).

¹⁴ Oiméramo oĩ oñanoviáva, ¿mbaʼéichapa ikatu jaapoja chupekuéra? Ikatu ñainvita chupekuéra okaru hag̃ua ñanendive, oĩ hag̃ua ñande estúdio de famíliape térã jaha hag̃ua de paséo. Péicha haʼekuéra ikatúta ojokuaa porãve (Rom. 12:13). Ifáltaramo ikatu jajofrese ñaakompaña hag̃ua umi oĩvape de nóvio. Ikatu jagueraha chupekuéra algún ládo áutope, térã ñainvita chupekuéra ou hag̃ua ñande rógape oñemongeta hag̃ua oĩʼỹre haʼekuéra año (Gál. 6:10). Alicia, pe ermána ñamensiona vaʼekue párrafo 7-pe, heʼi: “Albert ha che roagradeseterei vaʼekue oĩramo umi ermáno heʼíva oréve ikatuha roho rovisita chupekuéra roikotevẽramo peteĩ lugár roñemongeta hag̃ua roĩʼỹre oreaño”. Ha umi oĩva de nóvio ojeruréramo ñandéve ñaakompaña hag̃ua chupekuéra, javyʼákena jareko haguére la oportunida jaapoja hag̃ua umi oĩvape de nóvio. Péicha jave ñañatendékena ani jaheja chupekuéra haʼeñoite, péro avei ñanembaʼerechakuaa vaʼerã ñameʼẽ hag̃ua chupekuéra tiémpo ha lugár oñemongeta hag̃ua haʼekuérante (Filip. 2:4).

15. ¿Mbaʼépa avei ikatu jajapo jaapoja hag̃ua umi oĩvape de nóvio? (Proverbios 12:18).

¹⁵ Ikatu avei jaapoja umi oĩvape de nóvio, ñañatendévo la jaʼétavare. Ha sapyʼánte tekotevẽta voi jajejokokuaa ha ndajaʼéi mbaʼevete (elee Proverbios 12:18). Por ehémplo ikatu ñandetavyete voi ñamombeʼuse ótrope álgien oñemoĩ hague de nóvio, péro ikatu hína haʼekueraite voi omombeʼuse la notísia. Aníkena jaiko pérupi ñañeʼẽ rei hesekuéra ni jakritika umi mbaʼe odesidívare hikuái (Prov. 20:19; Rom. 14:10; 1 Tes. 4:11). Avei aníkena ñahenduka umi oĩvape de nóvio omendáma vaʼerãha hikuái ni ñaporandu chupekuéra: “¿Arakaʼépa jaʼúta la sópa?”. Peteĩ ermána hérava Elise ha iména omombeʼu: “Ndaigustoieterei vaʼekue ningo oñeporandúrõ guare oréve mbaʼetekópa oho hese la kasamientorã, ha ore katu ni noroñeʼẽiti hína upévare”.

16. ¿Mbaʼéichapa ñarreaksiona vaʼerã opáramo peteĩ noviásgo?

¹⁶ ¿Mbaʼéichapa ñarreaksiona vaʼerã opáramo la noviásgo? Aníkena jaiko jaikuaase mbaʼérepa ojedeha hikuái ni ñasẽ avave ládope (1 Ped. 4:15). Peteĩ ermána hérava Lea heʼi: “Aikuaárõ guare oĩha oikóva okalkula mbaʼérepa rojedeha kuri che nóviondi. Hasyeterei kuri chéve upéva”. Jahecháma haguéicha umi oĩva de nóvio ojuejáramo ndeʼiséi upe noviásgo opa vai hague. Upéva rangue heʼise pe noviásgo oipytyvõ hague chupekuéra odesidi hag̃ua la iporãvéva mokõivévape g̃uarã. Péro upéva ndeʼiséi hína ndahasymoʼãiha chupekuéra la oikóva ha ikatu voi oñeñandu hikuái haʼeño. Péicha jave jahecha vaʼerã mbaʼéichapa ikatu jaapoja chupekuéra (Prov. 17:17).

17. ¿Mbaʼépa osegi vaʼerã ojapo umi oĩva de nóvio?

¹⁷ Jahecháma haguéicha heta mbaʼe ikatu ijetuʼu peteĩ noviásgo aja, péro avei ikatu ojedisfruta heta mbaʼe upe tiémpope. Jessica omombeʼu: “Legálmente heta roñehaʼã vaʼekue roimérõ guare de nóvio, ha roipuru vaʼekue heta tiémpo upearã. Péro nambyasýi ni michĩmi”. Oiméramo peime de nóvio, pesegíkena peñehaʼã pejokuaa porã. Péicha katuete osẽ porãta pene noviásgo, pórke penepytyvõta pedesidi porã hag̃ua.