Pe violénsia ndahaʼéi la solusión

Koʼág̃arupi amás día hetave hénte oimoʼã ivioléntomante vaʼerãha osolusiona hag̃ua umi provléma. Péro upéva ndahaʼéi la Jesús omboʼe vaʼekue. Jahechamína unas kuánta kósa haʼe heʼi ha ojapo vaʼekue.

¿Mbaʼépa Jesús heʼi vaʼekue?

Jesús ningo ojapo vaʼekue peteĩ diskúrso ikonosidoitereíva, oñehenóiva Sermón del Mónte. Ha upépe haʼe omboʼe vaʼekue nañasolusionamoʼãiha mbaʼeve oiméramo ñandepochy, ñaneviolénto térã jajahéi ñande rapicháre. Jahechamína unos kuánto ehémplo ohechaukáva upéva.

• “Entéro mbaʼe peẽ peipotáva pende rapichakuéra ojapo penderehehápe, peẽ pejapo vaʼerã avei hesehapekuéra” (Mateo 7:12; Lucas 6:31). Ko konsého ohechauka ñande jatrata vaʼerãha ñande rapichakuérape ñande jaipotaháicha haʼekuéra ñandetrata. Ha ajépa ñande ndajaipotái avave ñanemaltrata ni ojahéi ñanderehe, al kontrário, jaipota katu ñanderrespeta ha ñandetrata porã hikuái, jepe noĩri de akuérdo ñanendive.a

• “Oĩramo nderovapetéva un ládo, emoĩ avei chupe pe ótro ládo nde rova” (Mateo 5:38, 39; Lucas 6:29). Koʼápe Jesús nomboʼéi hína kuri jaheja vaʼerãha ojehugapa ñanderehe. Upéva rangue, haʼe okorrehisénte kuri álgo umi judío orovia vaʼekue upe tiémpope. Upérõ amalisia haʼekuéra omboʼe vaʼekue álgien ojapóramo nderehe álgo, nde ekovra vaʼerãha chupe upe haguére eñevenga hag̃ua. Péro Jesús omboʼe kuri idisipulokuérape ani hag̃ua ojapo upéva. Oĩ mbaʼéramo algúno otrata vaíva chupekuéra, haʼekuéra osegínte vaʼerã kuri itrankílo ha ndovaléi orreaksiona vai.b

• “Pesegi vaʼerã pehayhu pene enemigokuérape” (Mateo 5:43, 44; Lucas 6:27). Sapyʼánte ningo oĩ hénte ñandetrata vaíva térã ndochaʼéiva ñanderehe, péro Jesús ñanemboʼe vaʼekue hendivekuéra entéro ñandekalida vaʼerãha. Upéva ndeʼiséi ñandéve g̃uarã oĩ porãha la péicha ñandetrata hikuái, péro ñandekalidáramo hendivekuéra ikatu hína oñetrankilisa hikuái ha ñandetrata porãvéma upéi.c

¿Mbaʼépa Jesús ojapo vaʼekue ha mbaʼépa ojapóta koʼẽrõite?

Jesús ñanemboʼe vaʼekue pe violénsia ndahaʼeiha la solusión, ha upéva ojekuaa vaʼekue avei umi mbaʼe ojapóvare. Pe pyhare ojejagarrárõ guare chupe, peteĩva umi idisípulo iviolentoʼimi kuri odefendesehárupi chupe. Péro Jesús heʼi vaʼekue upe idisípulope: “Eñongatu jey nde espáda, pórke entéro umi oipurúva pe espáda hapicha kóntrape, ojejukáta espádape” (Mateo 26:52). Jesús ohechauka vaʼekue ohayhuha iñenemigokuérape pórke operdona vaʼekue chupekuéra otrata vaírõ guare chupe, inklúso oñemboʼe voi katu hesekuéra (Lucas 23:33, 34; 1 Pedro 2:23).

La Biblia opromete Jesús, pe Prínsipe de Paz, koʼẽrõitéma oipeʼaitetaha pe violénsia ko múndogui (Isaías 9:6, 7). Eikuaasevéramo mbaʼéichapa oñekumplíta ko promésa porãite, elee pe artíkulo hérava “Mbaʼéichapa opaitéta umi gérra”.