Jajogueraha porã ñande rapichakuérandi

Ñaporoperdona

“Pesegíkena [...] peñoperdona pende pyʼaite guive, oĩramo jepe penembopochýva peteĩ mbaʼére” (COLOSENSES 3:13).

Entéronte ningo jajavy, ha sapyʼánte ñamoñeñandu vai ótrope térã haʼekuéra ñandéve. Upévare heta vése tekotevẽta ñaperdona ñande rapichakuérape, ha ñaikotevẽta avei haʼekuéra ñaneperdona. Ñaperdona jave ndajapytái ñandepyʼaro. Upévare oĩramo ojapóva ivaíva ñanderehe ‘ndajajapói hese la mísma kósa’, ha ndajaikói ñamomanduʼa chupe umi defékto orekóva ni ofalla hague ñanendive (Romanos 12:17). Péro, ¿mbaʼépa ikatu jajapo oiméramo ñanemoñeñandu vaieterei upe oikóva ha ndaikatúi ñambohasa reínte? Upéicharõ iporãta ñañeʼẽramo hendive trankílo porãnte ha ñaneañoháme. Péro jajapo vaʼerã upéva ñaimeségui pyʼaguapýpe hendive, ndahaʼéi jahechauka hag̃ua jarekoha la rrasón (Romanos 12:18).

Ñaneumílde ha ñanderrespetuóso

“Peneumílde vaʼerã ha pepensa umi ótro tuichaveha pendehegui” (FILIPENSES 2:3).

Umi hénte ovyʼáta ñanendive oiméramo ñaneumílde ha ñanderrespetuóso. Haʼekuéra oñeñandu porãta ñanendive pórke oikuaa ñaneamávle ha ñanembaʼerechakuaataha hendivekuéra. Ha ndajajapomoʼãi a propósito mbaʼeve omoñeñandu vaítava chupekuéra. Péro ñapensáramo ñandevaleveha umi ótrogui térã siémpre ñañemohatã ñande ñapensávapente, ñamonerviósota ñande rapichápe ha ikatu voi jaiko vai hendive. Ha upéva ningo ivaietereíta, pórke amo ipahápe la hénte odiparapáta ñandehegui.

Ani ñamboyke avavépe

‘Ñandejára otrata enterovépe peteĩchante, haʼe oguerohory entéro umi ojapóvape iporãva ha orrespetáva chupe ipyʼaite guive, tahaʼe haʼéva nasiónpe’ (HECHOS 10:34, 35).

Ñande Apohare ñandetrata entérope peteĩchante, tahaʼe haʼéva ñande país, ñane idióma, ñande pire kolór ha nodependéi avei ñande plátare. “Haʼe ojapo vaʼekue peteĩ kuimbaʼéguinte entéro nasión” (Hechos 17:26). Upéva heʼise enterovéva ñande haʼeha oñoermáno. Jatrata porãramo enterovépe ha ñaneamávleramo ikatúta javyʼa ñande voi, ñambovyʼáta ñande rapichápe ha ñande Apohare ñandeguerohorýta.

Ani ñandepochypa rei

“Pehechaukákena [...] peikoha pyʼaguapýpe” (COLOSENSES 3:12).

Ñañehaʼãramo jaiko pyʼaguapýpe ha nañandepochypareíri, umi hénte oñeñandu porãta ñanendive. Avei ifásilta chupekuéra oñeʼẽ ñandéve ha ñandekorrehi jepe, pórke oikuaa ndajajagarravaimoʼãiha chuguikuéra. Ha ñarreaksiona porãramo oĩrõ ipochýva ñanendive, upéva ikatu oipytyvõ upe persónape ipochyjera hag̃ua. Proverbios 15:1 heʼi voi: “Pe persóna orrespondéva pyʼaguapýpe ombohasaite pe pochy, péro pe orresponde vaíva ombopochyve rei hapichápe”.

Ñandepojera ha ñandeagradesído

“Javyʼaiteve ñameʼẽvo, ñandéve oñemeʼẽ rangue” (HECHOS 20:35).

Heta hénte koʼág̃arupi opensa ijehénte ha oipota potave la kósa. Péro ikatu hag̃uáicha añetehápe javyʼa ñandepojerámante vaʼerã (Lucas 6:38). Umi ipojeráva ovyʼa pórke haʼekuéra ohayhuve la héntepe, ohayhu rangue ikosakuéra. Ha péicha ohayhu rupi hapichakuérape, siémpre ohechauka ijagradesidoha oĩ jave ipojeráva hendivekuéra (Colosenses 3:15). Eñeporandumína: “¿Mávandipa igustovéne aime: peteĩ ijopy ha imalagradesídovandi, térãpa peteĩ ipojera ha ijagradesídovandi?”. ¿Mbaʼépa ñaaprende? Jatrata vaʼerãha ñande rapichakuérape jaipotaháicha haʼekuéra ñandetrata (Mateo 7:12).