Kuimbaʼe ha kuña oĩ ypy vaʼekue

MBAʼÉPA nde rehecha ipyahúva ko taʼangápe? Upéicha, umi hénte rehecháva. Koʼãva haʼe umi kuimbaʼe ha kuña oĩ ypy vaʼekue. Mávapa ojapo chupekuéra? Ñandejára. Ndépa reikuaa mbaʼéichapa héra Ñandejára? Héra Jehová. Ha pe kuimbaʼépe oñehenói Adán ha pe kuñáme Eva.

Ñandejára Jehová ojapo kóicha Adánpe: ojagarra pe yvy ha upévagui ojapo chupe heterã iperféktova. Upéi oipeju chupe itĩme, ha Adán oñepyrũ oikove.

Ñandejára oguerekovaʼekue peteĩ tembiapo Adánpe g̃uarã. Heʼi chupe ombohéra hag̃ua opaichagua animalkuérape. Oiméne Adán heta omaña raẽ umi animalkuérare ombohéra porã hag̃ua enterovépe. Upéva ojapo aja, Adán oñepyrũ ohecha peteĩ mbaʼe. Ndépa reikuaa mbaʼépa rakaʼe upéva?

Umi animál oiko mokõi mokõi. Oĩ elefánte mácho ha kuña, ha oĩ león ha leóna. Péro Adán ndoguerekói iñirũrã. Upévare, Jehová omonge hatã Adánpe, ha oipeʼa chugui peteĩ ikostílla. Jehová oiporu pe kostílla ojapo hag̃ua chugui Adánpe hembirekorã.

Mbaʼeichaitépa ovyʼa koʼág̃a Adán! Ha oiménepa Eva ovyʼaite avei oikohaguére peteĩ hardín iporãitévape! Koʼág̃a ikatúta ifamília hikuái ha oiko vyʼápe oñondivepa.

Jehová oipotavaʼekue Adán ha Eva oikove opa ára g̃uarã. Oipotavaʼekue ojapo hikuái ko Yvy tuichakuégui peteĩ lugár iporãitereíva ojoguáva pe hardín de Edénpe. Ovyʼaiteneparakaʼe Adán ha Eva opensávo upe ojapótavare! Ndépa rejaposenerakaʼe avei ko Yvýgui peteĩ hardín iporãva? Péro Adán ha Eva ndovyʼaʼaréi. Jahechamíta mbaʼérepa.