Oñeporandúva jepi
Adán ningo perfektovaʼekue, mbaʼérepa upéicharõ opekáraʼe?
Ñandejára ningo ojapovaʼekue Adánpe ikatu hag̃uáicha odesidi ijehegui mbaʼépa ojapóta. Upévare haʼe perféktoramo jepe ikatu odesidi vai. Jehová añoite ningo perfékto opaite mbaʼépe (Deuteronomio 32:3, 4; Salmo 18:30; Marcos 10:18). Ndaikatúi jaʼe ambue mbaʼére perfektoha opaite mbaʼépe. Pór ehémplo peteĩ kyse ningo perfékto ñaikytĩ hag̃ua soʼo, péro ndaikatúi jaʼu pype káldo ajépa? Odepende maʼerãpa ojejapóraʼe ikatu hag̃uáicha ojeporu porã.
Maʼerãpa Ñandejára ojaporakaʼe Adánpe? Haʼe oipota Adán ifamília ha omyenyhẽ ko yvy yvypóra iñarandúvagui ikatúva odesidi ijehegui mbaʼépa ojapóta. Haʼekuéra ohechaukáta ohayhuha Ñandejárape iñeʼẽrendúramo Chupe. Ñandejára ndojapói yvyporakuérape umi mákinaicha. Haʼe oipota haʼekuéra iñeʼẽrendu ohayhúgui chupe (Deuteronomio 10:12, 13; 30:19, 20). Adán ndaikatúirire oiporavo iñeʼẽrendútapa Ñandejárape, ndahaʼeivaʼerãmoʼã peteĩ kuimbaʼe perfékto. Mbaʼépa oiporavóraʼe Adán? La Biblia ohechauka haʼe omoirũ hague hembirekópe ha naiñeʼẽrendúi Ñandejárape. Haʼe ningo omanda chupekuéra ani hag̃ua hoʼu “upe yva oikuaaukáva iporãva ha ivaíva” (Génesis 2:17; 3:1-6).
Heʼisépa upéva Ñandejára ndojapoporãi hague Adánpe ha upévare haʼe ndaikatúi odesidi porã térã omboyke umi tentasión? Nahániri. Adán opeka mboyve Ñandejára Jehová ohecha opa hembiapokue ha heʼi “iporãha”. Ijapytépe oĩvaʼekue upe kuimbaʼe ha hembireko (Génesis 1:31). Upévare, Adán opekávo Ñandejára nopensái ojapo vai hague yvypórape. Adán añoite ikúlpa opeka haguére (Génesis 3:17-19). Haʼe ndohayhúi Jehovápe ha upévare naiñeʼẽrendúi chupe.
Ñapensamína avei Jesús rehe, haʼe perfektovaʼekue. Ojeguerováramo jepe hekove isy retepýpe espíritu sánto rupi, haʼe ikatu hoʼa tentasiónpe (Lucas 1:30, 31; 2:21; 3:23, 38). Péro jepe heta ojejopy chupe, Jesús odesidi akóinte ojepytaso Jehová ykére. Upéicharõ Adán añoite ikúlpa opeka haguére, haʼe ningo odesidi naiñeʼẽrenduseiha Ñandejárape.
Mbaʼérepa Adán ojapo upéva? Opensa piko osẽ porãvetaha mbaʼe? Nahániri, apóstol Pablo ningo heʼi ‘noñembotavýi hague Adánpe’ (1 Timoteo 2:14). Haʼe ojaposeve hembireko oipotáva, iñeʼẽrendu rangue ijapoharépe. Eva hoʼu rire upe yva oikuaveʼẽ avei iménape. Ojagarra mboyve Adán opensavaʼerãmoʼã upéva omoĩ vaitaha chupe Jehovándi. Péro haʼe ndohayhúi ijapoharépe, upévare ndahasyiete hoʼa hag̃ua upe tentasiónpe.
Adán opeka ifamília mboyve, upévare enterove ñanase guive ñaneimperfékto. Péro ñande ikatu avei jadesidi jajapótava, Adán ikatu haguéicha. Upévare tekotevẽ jajepyʼamongeta umi mbaʼe porã Jehová omeʼẽvare ñandéve ha ñañehaʼã jahayhu chupe ñande pyʼaite guive. Jehovápe añoite ñaneñeʼẽrendu ha jaservivaʼerã (Salmo 63:6; Mateo 22:36, 37).