Oñepyrũ pe jeikove asy

OÑEMOSẼ rire hardín de Edéngui, Adán ha Eva heta iprovléma. Haʼekuéra heta ombaʼapo jejopy vaʼerã okaru hag̃ua. Ha ohecharangue umi yvyra máta hiʼa porã porãva, ohecha hikuái okakuaa opárupi opaichagua ñuatĩ. Kóva oiko Adán ha Eva omboykérõ guare Ñandejárape ha ndahaʼevéimarõ guare Ñandejára amígo.

Ha ivaive hag̃ua, Adán ha Eva oñepyrũ omano. Nemanduʼápa: Ñandejára heʼivaʼekue chupekuéra omanovaʼerãha hoʼúramo yva peteĩ yvyra mátagui. Ha upéicha, hoʼu ypy guive oñepyrũma omano hikuái. Ajépa ivyroite hikuái nohenduihaguére Ñandejárape!

Enterove Adán ha Eva raʼykuéra onase Ñandejára omosẽ rire ituvakuérape pe hardín de Edéngui. Upéva heʼise itaʼyrakuéra ituja ha omanovaʼerãha avei.

Adán ha Eva iñeʼẽrendúrire Jehovápe, oikovaʼerãmoʼã vyʼápe itaʼyrakuéra ndive. Ikatuvaʼerãmoʼã oikove opa ára g̃uarã vyʼápe ko Yvy ape ári. Avave ndaitujái, ndahasýi ha nomanoivaʼerãmoʼã.

Ñandejára oipota la hénte oikove opa ára g̃uarã vyʼápe, ha opromete upéva upeichataha peteĩ árape. Ndahaʼéi ko Yvy añónte iporãtava, enterove tapichakuéra hesãita avei. Ha enterove oiko porãmbáta oñondive ha Ñandejára ndive.

Péro Eva ndahaʼevéima Ñandejára amíga. Upévare, ijetuʼuvaʼekue hendive imemby hag̃ua. Hasy chupe. Upeichaite, naiñeʼẽrendúigui Jehovápe heta ohasa asy, ajépa?

Adán ha Eva ifamília reta vaʼekue, oguerekovaʼekue kuñáva ha kuimbaʼéva. Onasérõ guare chupekuéra itaʼýra ypykue, ombohéra Caín. Pe segundo onasévape ombohéra Abel. Reikuaápa nde mbaʼépa ojehu koʼãvape?