Adán ha Eva naiñeʼẽrendúi Ñandejárape

Peteĩ día Eva oĩ jave haʼeño, oñeʼẽ chupe peteĩ mbói ha heʼi chupe: “¿Añetéiko Ñandejára heʼi peẽme ndovaleiha peʼu umi frúta oĩva guive ko hardínpe?”. Eva heʼi chupe: “Japu upéva. Ore ikatu roʼu oimeraẽ frúta oĩva ko hardínpe, peteĩ frútante la Ñandejára oproivíva orehegui ha heʼi oréve roʼúramo romanotaha”. Péro pe mbói heʼi chupe: “Peẽ ningo ni mbaʼevéicharõ napemanomoʼãi peʼúramo pe frúta, síno pejoguáta Ñandejárape”. ¿Siértoiko la pe mbói heʼíva Évape? Nahániri. Tuichaiterei ijapu chupe. Péro Eva oguerovia pe mbóipe, ha amáske omaña pe frútare, oñantohavéntema chupe ha upémarõ oipoʼo ha hoʼu ha omeʼẽ avei iménape. Adán oikuaa porã kuri omanotaha odesovedeséramo Ñandejárape, upéicharõ jepe ojagarra avei ha hoʼu.

Upe díape kaʼaruete Jehová oñeʼẽ Adán ha Évape ha oporandu chupekuéra mbaʼérepa odesovedese chupe hikuái. Upépe Eva okulpa pe mbóipe ha Adán katu okulpa Évape. Péro Jehová omosẽ Adán ha Évape pe hardíngui naiñeʼẽrendúi haguére. Ha anive hag̃ua oike hikuái, Jehová omoĩ umi ánhelpe ovihila hag̃ua pe hardín entráda ha omoĩ avei upépe peteĩ espáda hendýva.

Jehová heʼi avei okastigataha upe ombotavy vaʼekuépe Évape. Péro legálmente ndahaʼéi kuri pe mbói la oñeʼẽ vaʼekue Évape, pórke Jehová ndojapói vaʼekue peteĩ mbói oñeʼẽva. Peteĩ ánhel iñañaitereíva la oñeʼẽ vaʼekue Évape pe mbói rupive ombotavy hag̃ua chupe. Upe ánhel aña haʼe hína Satanás. Koʼẽrõitéma Jehová ohundíta Satanáspe, upéicha nombotavymoʼãvéima la héntepe ojapo hag̃ua ivaíva.