Jeikove peteĩ mundo pyahúpe oĩháme pyʼaguapy
Remañávo taʼanga ojehechaukáva ko kuatia apére, mbaʼépa reñandu? Nahiʼãipa ne korasõme pe pyʼaguapy, vyʼa ha jeiko porã ojehechaukáva ipype? Katuetei. Ha katu, ndahaʼéipa ñande képente jahecháva ha ñaimoʼãva ikatuha oiko ã mbaʼe porã?
Oimevaʼerã heta yvypóra oimoʼã upéicha. Koʼág̃a jahecha oiko heta mbaʼe vai. Umíva apytépe oĩ: ñorairõ guasu, tembiapo vai, ñembyahýi, mbaʼasy ha avei pyaʼe ñande tuja, jaʼe hag̃ua michĩmínte. Upeichavére, oĩ mbaʼérepa ikatu jaguereko esperanza. Biblia omombeʼu oĩtaha “peteĩ yvága ha yvy ipyahúva, Tupã heʼi vaekue omeʼẽtaha. Ha upépe opaite mbaʼe oikóta Tupã oipotaháicha”. (2 Pedro 3:13; Isaías 65:17.)
Biblia ohechauka koʼã “yvága” ha “yvy ipyahúva” ndahaʼeiha katuete peteĩ yvága térã yvy pyahu jahecháva ha ñapyrũva. Ko Yvy ha yvága jahecháva ojejapovaʼekue hekopete ha Biblia ohechauka opytataha upéicha opa ára peve. (Salmo 89:37, 38 (36, 37, NM); 104:5.) Pe “yvy pyahu” ojeʼe umi yvypóra hekojojávare oikótava ko Yvy apeʼári, ha “yvága pyahu” katu heʼise peteĩ reino térã mburuvicha yvagapegua iporãitereíva omotenondétava yvypóra kuérape. Ikatúnepa jaguerovia oĩtaha peteĩ mundo pyahu ojajaipáva?
Ha néi, umi mbaʼe iporãva haʼémaʼakue iñepyrũ guive Ñandejára rembipota ko Yvýpe g̃uarã. Iñepyrũme Haʼe omoĩvaʼekue peteĩ kuña ha peteĩ kuimbaʼe upe paraíso opytavaʼekue Edén-pe, ha omeʼẽ chupekuéra hembiaporã iporãitereíva: “Peñemoña ha peñemboheta ha pemyenyhẽ yvy ha peguereko pende poguýpe”. (Génesis 1:28. NM) Upéicha, Ñandejára oipotavaʼekue haʼekuéra itaʼýra heta ha oipyso pe paraíso Yvy tuichakuérehe. Jepe upe rire oñembopyʼa peteĩ hikuái omboykévo Ñandejára Ñeʼẽ, ha upéicha ohechauka nomombaʼeiha pe jeikove opaʼỹva, Ñandejára rembipota ojejapovaʼerã. ¡Pe hembipota oikovaʼerã gueteri peteĩ mundo pyahúpe! (Isaías 55:11.)
Upévare, reñemboʼévo pe Padrenuestro ha rejerurévo ou hag̃ua Ñandejára Reino, reñemboʼehína sambyhy yvagapeguáre, oipeʼa hag̃ua ko Yvýgui umi mbaʼe vai ha omoĩ hag̃ua ipoguýpe pe mundo pyahu. (Mateo 6:9.) Ha ikatu jaguerovia Ñandejára ohendutaha ñane ñemboʼe, heʼígui Iñeʼẽ: “Heko potĩvape opytapáne ko yvy, ha upépe haʼe kuéra oikóne opa árape”. (Salmo 37:29.)
Jeikove Ñandejára mundo pyahúpe
Ñandejára Reino omeʼẽta yvypórape mbaʼe porã ijojahaʼỹva ha upéicha ojehupytýta opaichagua vyʼa Ñandejára oipotavaʼekue hembiguáipe g̃uarã. Pyʼaro ha joayhuʼỹ ojeipáta, ha ipahápe opavave yvypóra oikóta joayhupápe. Ñandejára opromete Iñeʼẽme ojokotaha “opáichagua ñorairõ ko yvy ári”. “Nopuʼã moʼãvéi tetã nguéra ojuehe, noñembosakoʼi moʼãvéi ñorairõrã.” (Salmo 46:10 (46:9 NM); Isaías 2:4.)
Ipahaitépe ko yvy tuichakue iporãitereíta ojogua peve peteĩ yvotytýpe. Biblia heʼi: “Tahory yvy ojeikoʼỹha ha yvy iñapekãmbáva, tovyʼa ha tahory yvy perõ! [...] hetátagui pe y yvy ojeikoʼỹháme ha y osyry hatãva yvy perõme. Yvy ndahiʼýivagui ojapóta y renda ha yvy ijyuhéivape ombohetáta yvu”. (Isaías 35:1, 6, 7.)
Pe yvy iporãitereívape oĩta opa mbaʼe ñanembovyʼa hag̃ua. Ndaiporimoʼãvéima ohasáva vareʼa ndaipórigui hiʼupy. ‘Yvy omeʼẽta hiʼa’, heʼi Biblia. (Salmo 67:7 (67:6 NM); 72:16.) Opavave ovyʼáta hembiapokuére, heʼiháicha ñande Apohare: “Opavave ojogapóta ha oikóta imbaʼe teépe, oñotỹta parralty ha hoʼúta hiʼa. Ndaipóri moʼãi [...] peteĩ oñemitỹva ha ambue chugui hoʼúva”. (Isaías 65:21, 22.)
Ñandejára mundo pyahúpe tapichakuéra ndoiko- moʼãvéima umi oga guasúpe ojoʼaripa térã umi jeikoha kyʼápe. Ñandejárama heʼi: “Opavave ojogapóta ha oikóta imbaʼe teépe, [...] Ndaipóri moʼãi peteĩ ojogapóva ha ambue pype oikóva”. Biblia avei heʼi: “Nombaʼapo rei moʼãi”. (Isaías 65:21-23.) Upévare tapichakuéra oguerekóta tembiapo heñóiva ha ombovyʼáva. Ndaipórimoʼãi ikaiguéva hekovégui.
Upe rire, Ñandejára Reino omoĩ jeýta pyʼaguapy oĩvaʼekue jardín de Edén-pe mymbakuéra apytépe, ha mymbakuéra yvypóra ndive. Biblia heʼi: “Aguara guasu ovecha raʼy ndive oikóta, jaguarete ha kavara raʼy ojoykére oñenóta, vaka raʼy ha león okarúta oñondive, ha mitãʼíta herekua”. (Isaías 11:6-9; Oseas 2:20 (2:18. NM)
¡Eimoʼãmína, Yvy iporãitereívape oñe- mongueráta avei opaite mbaʼe vai oñeñandúva! Ñandejára Ñeʼẽ omo- añete ñandéve: “Avave ndeʼi moʼãi: Che rasy hína”. (Isaías 33:24.) “Ñandeyára omokã vaerã hesay kuéra, ha ndaiporivéima vaerã mano, terã tasẽ, terã yaheʼo, terã mbaʼasy, opa umi mbaʼe yma oĩ vaʼekue ohasapáma rehe”. (Apocalipsis [Revelación] 21:4. VP)
Mbaʼéicha ikatu rehupyty upe mundo pyahu
Oiméne omopirĩ ne korasõ Ñandejára promesa heʼíva mbaʼéichapa ojeikóta pe mundo pyahúpe tekojoja apytépe. Ha oĩramo jepe umi oimoʼãva ã mbaʼe iporãitereiha oiko hag̃ua añetehápe, ndahaʼéi iporãitereímava ikatuʼỹ hag̃uáicha ou ñande Apohare ñanderayhúva pógui. (Salmo 145:16; Miqueas 4:4.)
Upévare, jaikótarõ Yvy ári opa ára peve pe paraíso oútavape, jajapovaʼerã haʼe ojeruréva ñandehegui. Jesús ohechauka peteĩ mbaʼe ñamotenondevaʼerã oñemboʼérõ guare Ñandejárape: “Ha upe jeikove opaʼỹva niko kóva: Ta nde kuaa ndéve Tupã añete ha peteĩetéva, ha Jesucrístope, upe nde rembou vaekuépe”. (Juan 17:3.)
Upéicharõ, jaikoserõ añetete Ñandejára mundo pyahúpe, jaikuaa raẽ vaʼerã mbaʼépa Ñandejára oipota ha upéi jajapo, jaikuaágui añeteha pe “Yvypóra reko katu opa ohóvo opa hembipota vai reheve. Upe Túva rembipota ojapóva katu oikove opa árape guarã”. Jajaporõ upéicha, ikatúta jahupyty vyʼa opaʼỹva omeʼẽtava ñande Apohare ñanderayhúva. ( 1 Juan 2:17.)
Ñandejára Ñeʼẽ ojeporúva oñerenohẽ Sociedad Bíblica Paraguaya traducción-gui. Upeichaʼỹramo oñemombeʼu texto bíblico ykére mbaʼe traducción-pa ojeporu.