Párte 10
Pe múndo pyahu iporãmba jepéva ojapótava Ñandejára
1, 2. Mbaʼépa oikóta pe Armagedón omopotĩmba rire ko Yvy?
OÑEMOPOTĨMBA rire ko Yvy, pe Armagedón rupive, mbaʼépa ikatu ñahaʼarõ? Upépe oñepyrũta peteĩ múndo pyahu iporãitereíva. Ohasáva guive pe Armagedón, ohechaukágui ojeroviaha Ñandejára sãmbyhýre, oikéta peteĩ múndo pyahúpe. Mbaʼeichaitépa oporombovyʼáta pe múndo pyahu, ha umi mbaʼe iporãmba jepéva Ñandejára omboútava yvypórape g̃uarã!
2 Ñandejára ogoverna vove, umi yvypóra oikovéva oñepyrũta ojapo peteĩ paraíso. Ombaʼapóta hikuái hapichakuéra rehehápe, ojapo hag̃ua umi mbaʼe ou porãtava opavavépe. Ojejapóta ko Yvýgui peteĩ lugár neporãva, oĩtahápe pyʼaguapy ha vyʼa.
Oĩta tekojoja tembiapo vai rekovia
3. Mbaʼéichapa ojepytuʼúta pe Armagedón ohasa rire?
3 Koʼã mbaʼe oikóta oñehundi rire pe múndo Satanás oisãmbyhýva. Ndaiporimoʼãvéima umi rrelihión japu, umi tapicha aty oporombojoavýva, ni umi goviérno; umíva ndohejái tapichakuéra oiko porã oñondive. Ndaiporimoʼãvéi umi ñeʼẽ Satanás omosarambíva oporombotavy hag̃ua; umi omoheñóiva umichagua ñeʼẽ oñehundíta Satanás múndo ndive. Ejepyʼamongetamína upéva rehe: oñehundietéta pe espíritu oporombyaipáva oĩva Satanás múndope! Mbaʼeichaitépa ojepytuʼúta upérõ!
4. Emombeʼu mbaʼéichapa oñekambiáta umi mbaʼe oñemboʼéva.
4 Upérõ, oĩrangue umi mbaʼe vai ojaposéva umi yvypóra goviérno, oñemboʼéta umi mbaʼe iporãva oúva Ñandejáragui. Ñandejára Jehová heʼi: “Che ahekomboʼéta ne membykuérape” (Isaías 54:13). Péicha oñemboʼévo koʼã mbaʼe porã heta áñore, ko yvy henyhẽta umi “Ñandejárape oikuaávagui, y omyenyhẽháicha yguasu” (Isaías 11:9). Tapichakuéra ndoikuaamoʼãvéima pe ivaíva, “yvypóra oikuaáta mbaʼépa heʼise tekojoja” (Isaías 26:9). Oñepensa ha ojejapóta umi mbaʼe iporãvante (Hechos 17:31; Filipenses 4:8).
5. Mbaʼépa oikóta umi mbaʼe vai apohágui ha hembiapokuéragui?
5 Ha péicha ndaiporimoʼãvéi jejuka, ñorairõ, ñemonda, umi orairõva hapichápe, ni mbaʼeveichagua tembiapo vai. Avave ndohasaʼasymoʼãi tapicha rembiapo vaikuére. Proverbios 10:30 heʼi: “Hekojojáva ndokyhyjéi mbaʼevégui, iñañáva katu ndoikoveichéne yvy ári”.
Oĩ jeýta tesãi porã
6, 7. a) Mbaʼeichagua jehasa asýpa oipeʼáta Ñandejára goviérno? b) Mbaʼéichapa Jesús ohechauka upéva oĩ aja ko yvy ape ári?
6 Pe múndo pyahúpe opaitéta umi mbaʼe vai oñepyrũvaʼekue pe hardín de Edénpe. Ñandejára sãmbyhy oipeʼaitéta mbaʼasy ha tuja. Koʼág̃a rupi, ñaneresãiʼimíramo jepe, ñandetujávo ndajahechaporãvéi jahávo, ñane rãinguéra oñembyai, nañahenduporãvéi, ñande pire ichaʼĩ, ñanderasy ñande retepýpe, ha amo ipahápe ñamano.
7 Upéicharõ jepe, koʼẽrõite opáta umi mbaʼe vai ombohasavaʼekue ñandéve ñande tuvakuéra ypykue. Umíva opytáta tapykuépe. Nemanduʼápa mbaʼe Jesús ohechauka ikatuha ojapo umi mbaʼasýgui oĩrõ guare ko Yvy ape ári? Ñandejára Ñeʼẽ omombeʼu: “Ha heta umi og̃uahẽva hendápe, ogueraháva hendivekuéra umi ikarẽva, ohechaʼỹva, iñeʼẽngúva, ijypíva ha opaichagua hasývape. Umívape omoĩjoa hikuái Jesús renondépe, ha haʼe omonguera chupekuéra. Ha opavave ohecharamoite mbaʼéichapa umi iñeʼẽngúva oñeʼẽ jey, ijypíva okuera, ikarẽva oguata porã, ha ohechaʼỹva ohecha jey” (Mateo 15:30, 31).
8, 9. Emombeʼu mbaʼéichapa ojevyʼáta pe múndo pyahúpe ojehupyty jey vove tesãi porã.
8 Mbaʼeichaitépa javyʼáne pe múndo pyahúpe ndaiporivéivo mbaʼeveichagua mbaʼasy! Arakaʼeve ndajahasaʼasymoʼãvéi oĩ rupi mbaʼasy. “Avave ndeʼimoʼãi: ‘Cherasyʼaína’.” “Upéramo umi ohechaʼỹva ohecháta, ha umi ohenduʼỹva ohendúta. Upéramo ijapáva, guasúicha oñaníta ha iñeʼẽngúva vyʼágui osapukáita” (Isaías 33:24; 35:5, 6).
9 Ajépa javyʼaitevaʼerã japáyvo koʼẽ koʼẽre ha ñañandu ñaneresãi porãha ñaína! Ovyʼaiténepa umi itujáva oikuaávo imbarete jeyha imitãrõ guaréicha ha ohupytyha pe perfeksión oreko ypy vaʼekue Adán ha Eva! “Upépe hete hesãi jeýne, ha oiko jey imitãramo guaréicha” (Job 33:25). Ojevyʼaitétapa ndojeporuvéivo umi lénte térã umi aparáto oñehendu porãve hag̃ua, umi muléta térã umi sílla irruédava ha umi pohã! Noñekotevẽmoʼãvéima ospitál, pohãnohára ni dentísta.
10. Mbaʼépa oikóta pe ñemanógui?
10 Umi tapicha hesãi porãva nomanosemoʼãi. Ha upéva ndoikomoʼãi hesekuéra noĩmoʼãvéigui pe imperfeksión ni ñemano. “Cristo oisãmbyhyvaʼerã opa ijaʼeʼỹva hese oñemoĩmba peve ipy guýpe. Ha pe ipahaite oñehundítava, upéva hína pe ñemano.” Ñandejára jopói katu ‘jeikove opa ára gũarã’ (1 Corintios 15:25, 26; Romanos 6:23; elee avei Isaías 25:8).
11. Mbaʼéichapa Revelación heʼi mbykymi umi mbaʼe porã oĩtava pe múndo pyahúpe?
11 Ñandejára oguerúta heta mbaʼe porã pe Paraísope ojepyʼapýgui yvyporakuérare. Pe último lívro oĩva la Bíbliape omombyky heʼívo: “Omokãta hesaykuéra, ndaiporimoʼãvéima ñemano, tasẽ, jaheʼo ha temimbyasy; opa oĩvaʼekue yma niko ndaiporivéima” (Revelación 21:3, 4).
Opuʼã jeýta umi omanóva
12. Mbaʼéichapa Jesús ohechauka Ñandejára omeʼẽhague chupe pe puʼaka oporomoingove jey hag̃ua?
12 Ndahaʼéi Jesús omonguerantevaʼekue hasývape ha omboguatavaʼekue ikarẽvape; haʼe ojapove upévagui. Avei omopuʼã jey umi omanovaʼekuépe. Péicha ohechauka Ñandejára omeʼẽhague chupe pe puʼaka ijojahaʼỹva oporomoingove jey hag̃ua. Nemanduʼápa Jesús ohórõ guare pe karai itajýra omanovaʼekue rógape? Jesús heʼi pe omanóvape: “Mitãkuña, ndéve haʼe: Epuʼã!”. Mbaʼépepa osẽ upéva? “Upe vove pe mitãkuña [...] opuʼã ha oñemoĩ oguata.” Umi ohechavaʼekue upéva “ijurujái opytávo” ovyʼaitereígui. Ndaikatúi omokañy ovyʼaha hikuái! (Marcos 5:41, 42; elee avei Lucas 7:11-16; Juan 11:1-45.)
13. Mbaʼeichagua tapichápepa oñemoingove jeýta?
13 Pe múndo pyahúpe ‘omanóva oikove jey vaʼerã, imarangatúva ha imarangatuʼỹva upéichante avei’ (Hechos 24:15, VP). Upérõ Jesús oiporúta pe puʼaka Ñandejára omeʼẽvaʼekue chupe omopuʼã jey hag̃ua umi omanovaʼekuépe, haʼe heʼihaguéicha: “Che hína pe aporomoingovéva, ha aporomoingove jeýva. Cherehe ojeroviáva, omanóramo jepe oikovéta” (Juan 11:25). Avei heʼi: ‘Umi omanóva oĩva oñeñotyhaguépe [oĩva Ñandejára manduʼápe], ohenduvaʼerã avei [Jesús] ohenóivo chupekuéra ha osẽvaʼerã pe oñeñotyhaguégui’ (Juan 5:28, 29, VP).
14. Pe ñemano ndaiporivéivo, mbaʼe mbaʼépa noñekotevẽmoʼãvéi?
14 Ojevyʼaitétapa opárupi oñemoingove jeývo umi tapichápe ojotopa hag̃ua umi ohayhúva ndive! Ndojehaimoʼãvéi umi lísta oĩhápe omanóva rerakuéra omoñembyasýva umi oikovévape. Upéva rangue, ikatu oñemombeʼu máva mávapa oikove jey ramo, ovyʼa hag̃ua umi ohayhuvaʼekue chupekuéra. Upévare, ndaiporimoʼãvéi funerál ojejapóva umi omanóvare, krematório ojehapyha omanóva, ni sementério!
Peteĩ múndo oĩháme pyʼaguapy añetéva
15. Mbaʼéichapa oñekumplipaitéta Miqueas profesía?
15 Opa mbaʼépe ñañandúta pyʼaguapy añete. Opátama umi gérra, ndojejapomoʼãvéima árma, ha ndaiporimoʼãvéima omotenondevaʼerã ñorairõ. Mbaʼérepa? Ndaiporimoʼãvéigui umi omombaʼevéva peteĩ tetã, trívu térã pire kolór. Upéramo, añetehápe “ndaiporimoʼãvéima ñorairõ, [ha] avavépe noñemboʼemoʼãi mbaʼéichapa oñorairõvaʼerã” (Miqueas 4:3).
16. Mbaʼépa Ñandejára ojapóta anive hag̃ua oñeñorairõ?
16 Ikatu haʼete ñandéve upéva hasyha oiko hag̃ua. Hetaitéma yvyporakuéra oñorairõ oikove pukukue javeve. Umíva oiko yvyporakuéra oĩ rupi hapicha ha demoniokuéra poguýpe. Pe múndo pyahúpe, Ñandejára oisãmbyhývo, kóichata: “Pejúke pehecha Ñandejára rembiapokue [...] Haʼe ojoko opaichagua ñorairõ ko yvy ári, huʼy ha kyse yvuku omopẽmba, ha ohapy umi tete moʼãha” (Salmo 46:9, 10).
17, 18. Pe múndo pyahúpe, mbaʼéichapa ojogueraháta yvypóra ha mymbakuéra?
17 Avei oiko porãta oñondive yvypóra ha mymba, ojeikohaguéicha Edénpe (Génesis 1:28; 2:19). Ñandejára heʼi oñeʼẽmeʼẽtaha umi ‘mymba ñarõ, guyrakuéra ha umi mbói rehe [...], opytuʼu hag̃ua umi hetãygua pyʼaguapýpe’ (Oseas 2:20).
18 Mbaʼeichaite pevépa oĩta pe pyʼaguapy? “Aguara guasu ovecharaʼy ndive oikóta, jaguarete ha kavararaʼy ojoykére oñenóta, vakaraʼy ha león okarúta oñondive, ha mitãʼíta herekua.” Umi mymba ndahaʼemoʼãvéima kyhyjerã yvyporakuérape térã ótro mymbápe g̃uarã. “León ha guéi hoʼúta kapiʼi”! (Isaías 11:6-9; 65:25.)
Oikóta ko yvýgui peteĩ paraíso
19. Mbaʼépa oikóta ko Yvýgui?
19 Ko Yvy tuichakuégui oikóta peteĩ lugár iporãmba jepéva yvyporakuérape g̃uarã. Pe kuimbaʼe hese ojeroviavaʼekuépe Jesús heʼi: ‘Reiméta chendive pe Paraísope’. Ñandejára Ñeʼẽ heʼi: “Tahory yvy ojeikoʼỹha ha yvy iñapekãmbáva, tovyʼa ha taipoty yvy perõ! [...] Hetátagui pe y yvy ojeikoʼỹháme ha y osyry hatãva yvy perõme”. (Lucas 23:43, VP; Isaías 35:1, 6).
20. Mbaʼérepa ndohasamoʼãvéima ñembyahýi yvyporakuéra?
20 Ñandejára Goviérno poguýpe ndaiporimoʼãvéima pe ñembyahýi ombohasa asýva hetaiterei tapichápe. ‘Umi trigoty omyenyhẽta ko yvy, umi yvyty toñuvãmba.’ “Umi yvyra rakã hiʼa joáta; yvy omeʼẽ porãta kóga ha haʼekuéra oikovéta pyʼaguapýpe ijyvy teépe” (Salmo 72:16; Ezequiel 34:27).
21. Mbaʼépa oikóta umi hogaʼỹvagui, umi oikóva várrio vaípe ha oĩha rupi umi hembiapo vaíva?
21 Ndaiporimoʼãvéi mboriahu, tapicha ndahógaiva, umi várrio vai térã óga jere hetahápe tembiapo vai. “Opavave ojogapóta ha oikóta imbaʼe teépe, oñotỹta parralty ha hoʼúta hiʼa. Ndaiporimoʼãi peteĩ ojogapóva ha ambue pype oikóva, térã peteĩ oñemitỹva ha ambue chugui hoʼúva.” “Kyhyjeʼỹre opárupi ojeikóta, maymáva ikatúta opytuʼu iparrál ha hiʼígo máta guýpe” (Isaías 65:21, 22; Miqueas 4:4).
22. La Biblia omombeʼuháicha, mbaʼe mbaʼe iporãvapa ojehupytýta Ñandejára oisãmbyhy vove ko Yvy?
22 Pe Paraísope yvyporakuéra ohupytýta koʼã mbaʼe porãita, ha hetave mbaʼe. Salmo 145:16 heʼi: “[Nde, Ñandejára, reavri] nde po, ha nembaʼeporãme remohyvatã opa mbaʼe oikovévape”. Ndareíri Ñandejára Ñeʼẽ heʼi: “Imboriahúvape [imarangatúva] opytapáne ko yvy, ha pyʼaguapýpe oikóne hikuái. [...] Heko potĩvape opytapáne ko yvy, ha upépe haʼekuéra oikóne opa árape” (Salmo 37:11, 29).
Oñemyatyrõta umi mbaʼe vai oikovaʼekue
23. Mbaʼéichapa Ñandejára Sãmbyhy omyatyrõta opaichagua jeiko asy jahasavaʼekue?
23 Ñandejára Goviérno omyatyrõmbaitéta opa mbaʼe vai oikovaʼekue yvyporakuérare umi 6.000 áño ohasavaʼekuépe. Pe vyʼa oĩtava upépe omyengoviapaitéta opaichagua jeiko asy ohasavaʼekue yvypóra. Avave naimanduʼamoʼãvéi umi mbaʼe vai ohasavaʼekuére. Maymáva opensa ha hembiapo porãta opa árape, ha upéva oipeʼáta mbeguekatúpe opa mbaʼe vai oúva iñakãme, ikatúva hasy chupekuéra imanduʼa jave.
24, 25. a) Mbaʼépa heʼi Isaías oikotaha? b) Mbaʼérepa ikatu jaguerovia ñanderesaraitaha mbeguekatúpe umi jehasa asýgui?
24 Ñandejára, ojepyʼapýva ñanderehe, heʼi: ‘Péina ajapóta yvága pyahu [peteĩ goviérno pyahu yvága guive ko yvy ape ári g̃uarã] ha yvy pyahu [yvyporakuéra imarangatúva]. Umi mbaʼe yma guare opytáta tesaráipe, avave naimanduʼamoʼãi hese. Tahenyhẽ tory ha vyʼágui opa árape g̃uarã upe ajapótava rehe’. “Yvy tuichakue oiko pyʼaguapýpe ha kyhyjeʼỹre, ha osapukái vyʼágui” (Isaías 14:7; 65:17, 18).
25 Péicha Ñandejára, Igoviérno rupive, okambiapaitéta umi mbaʼe vai hiʼaretémava. Opa árape ohechaukáta mbaʼeichaitépa ojepyʼapy ñanderehe omboúvo heta mbaʼe porãita umi mbaʼe vai jahasavaʼekue rekovia. Umi mbaʼe ñanembohasa asy vaʼekue, upérõ g̃uarã ndahaʼemoʼãvéi mbaʼeve, sapyʼa rei ñanemanduʼaséramo umívare.
26. Mbaʼérepa Ñandejára omyengoviáta ñandéve umi jeiko asy jahasavaʼekue?
26 Upéicha Ñandejára omyengoviáta ñandéve mbaʼe porãme opa jeiko asy jahasavaʼekue ko múndope. Haʼe oikuaa ndahaʼeiha jaipotágui ñanasehague imperfékto; upéva ñanderupyty ñande tuvakuéra ypykuégui. Ndahaʼéi ñande jaipotágui ñanaséva ko múndope oĩva Satanás poguýpe. Adán ha Eva iñeʼẽrendúrire Ñandejárape, ñande nañanaseivaʼerãmoʼã koichagua múndope, ñanasevaʼerãmoʼa peteĩ paraísope. Upévare Ñandejára, ñandeporiahuverekógui, omyengoviáta heta vése mbaʼe porãme umi mbaʼe vai oñemoĩvaʼekue ñande ári.
27. Mbaʼe mbaʼe profesíapa oñekumplíta pe múndo pyahúpe?
27 Pe múndo pyahúpe opavave yvypóra oñandúta pe liverta oñeñeʼẽha Romanos 8:21, 22-pe: ‘Ko múndo Ñandejára ojapovaʼekue ojeivaʼerã pe tembiguái reko ha ñembyai poguýgui ohupyty hag̃ua umi Ñandejára raʼykuéra reko sãʼỹ [liverta] ojajaipáva. Jaikuaa opa umi Ñandejára ojapovaʼekue ipyahẽ ha hasyha koʼág̃a peve’, [VP]. Opa tapicha ohecháta upérõ mbaʼéichapa oñekumplipaite pe ñemboʼe: “Tou ne rréino. Tojejapo ne rembipota yvy ári yvagapeguáicha” (Mateo 6:10, VP). Umi mbaʼe porãita oĩtava pe Yvy iporãmba jepévape ohechaukáta mbaʼéichapa ojeiko amo yvágape.
[Nóta oĩva taʼanga ndive páhina 23]
Pe múndo pyahúpe umi itujáva imbarete jeýta imitãrõ guaréicha
[Nóta oĩva taʼanga ndive páhina 24]
Pe múndo pyahúpe ndaiporimoʼãvéima umi ndojevaléiva ijehe ni mbaʼeveichagua mbaʼasy
[Nóta oĩva taʼanga ndive páhina 25]
Pe múndo pyahúpe umi omanóva oikove jeýta
[Nóta oĩva taʼanga ndive páhina 26]
“Avavépe noñemboʼemoʼãi mbaʼéichapa oñorairõvaʼerã”
[Nóta oĩva taʼanga ndive páhina 27]
Yvypóra ha mymbakuéra oikóta pyʼaguapýpe oñondive pe Paraísope
Ñandejára oavri ‘ipo, ha omohyvatã opa mbaʼe oikovévape’
[Nóta oĩva taʼanga ndive páhina 28]
Ñandejára Sãmbyhy omyengoviáta heta vése opaichagua jeiko asy jahasavaʼekue