Párte 5

Peteĩ jopói iporãitereíva: pe liverta jaiporavo hag̃ua

1, 2. Mbaʼépa pe jopói iporãitereíva omeʼẽva ñandéve Ñandejára?

JAHECHA porã hag̃ua mbaʼérepa Ñandejára oheja oĩ pe jehasa asy, ha mbaʼépa haʼe ojapóta opa hag̃ua, tekotevẽ jaikuaa raẽ mbaʼéichapa Haʼe ñandeaporakaʼe. Haʼe ojapo ñande rete ha ñane apytuʼũ, péro avei ñandeapo ñapensa ha ñañandu hag̃uáicha.

² Ñandeapo ikatu hag̃uáicha ñapensa ha ñañandu, péro omeʼẽ avei ñandéve peteĩ mbaʼe: Liverta jaiporavo hag̃ua. Ñanembokatupyry jaiporavo hag̃ua pe jaipotáva. Upéva peteĩ jopói iporãitereíva Ñandejára omeʼẽvaʼekue ñandéve.

Mbaʼéichapa ñandeapo Ñandejára

3-5. Mbaʼérepa jaguerohory pe liverta jaiporavo hag̃ua?

³ Jahechamína mbaʼéichapa pe liverta jaiporavo hag̃ua ñanepytyvõ jahecha hag̃ua mbaʼérepa Ñandejára oheja jahasa asy. Epensamína: Ndépa revyʼa ikatu haguére reiporavo pe rejapótava, pe erétava, mbaʼépa reʼúta, pe remondétava, mbaʼépepa rembaʼapóta ha moõ ha mbaʼéichapa reikóta? Térãpa reipotáta ótro heʼi jepi ndéve mbaʼépa eréta ha mbaʼépa rejapóta?

⁴ Peteĩ tapicha oĩ porãva ndoipotamoʼãi ótro ogoverna chupe upeichaite peve. Ha mbaʼérepa? Pórke Ñandejára nañandeapói upéicha jaiko hag̃ua. La Biblia heʼi ñandéve Ñandejára ñandeapohague ‘ijoguaháramo’, ha ohechauka Ñandejára voi oguerekoha liverta oiporavo hag̃ua (Génesis 1:26; Deuteronomio 7:6). Ojapóvo yvypórape, omeʼẽ avei chupe pe katupyry porãite haʼe oguerekóva,...pe liverta oiporavo hag̃ua. Upévare ñañeñandu vai umi mburuvicha ipyʼahatãva ojaposéramo ñandehegui peteĩ tembiguái.

⁵ Upéicha jahecha pe liverta ndahaʼeiha jaipota reínteva. Ou Ñandejáragui. La Biblia heʼi: “Pe Ñandejára Espíritu oĩháme, upépe oĩ liverta” (2 Corintios 3:17, VP). Ñandejára omoĩ ñande pype pe liverta jaiporavo hag̃ua; upéicha ñandeapovaʼekue. Haʼe oikuaa mbaʼéichapa ombaʼapo ñane apytuʼũ ha mbaʼépa ñañandu, ha upévare oikuaa javyʼavetaha omeʼẽramo ñandéve pe liverta jaiporavo hag̃ua.

6. Mbaʼéichapa Ñandejára ñandeapo ikatu hag̃uáicha ñane apytuʼũ ombaʼapo jaiporu porã hag̃ua pe liverta omeʼẽva ñandéve?

⁶ Ñandejára omeʼẽ ñandéve pe liverta, péro ñanembokatupyry avei ñapensakuaa hag̃ua, ñamaʼẽkuaa hag̃ua ñande raperãre, jaiporavokuaa hag̃ua pe jajapótava, ha jahechakuaa hag̃ua mbaʼépa iporã ha mbaʼépa ivai (Hebreos 5:14). Ha upéicha, ñande ñanearandu jaiporavokuaa hag̃ua. Ñandejára nañandeapói peteĩ mákinaicha, ikatuʼỹva opensa, ha ikatuʼỹva oiporavo ijehegui mbaʼépa ojapóta. Ni nañandeapói jaiko hag̃ua instíntore, oikoháicha umi mymba. Ñandeapo uvei ikatu hag̃uáicha pe ñane apytuʼũ ombaʼapo jaiporu porã hag̃ua pe liverta.

Oñepyrũ porãiterei vaʼekue

7, 8. Mbaʼépa ojapo Ñandejára ikatu hag̃uáicha ñande ru ha ñande sy ypykue oñepyrũ porã?

⁷ Ñandejára ojepyʼapyvaʼekue ñande ru ha ñande sy ypykue Adán ha Évare. Upévare omeʼẽ chupekuéra pe liverta oiporavo hag̃ua ha omeʼẽ avei opa mbaʼe ikatútava oipota. Omoĩ avei chupekuéra peteĩ paraíso tuichaitereívape, peteĩ hardínpe. Oguereko hikuái hetaiterei mbaʼe. Iñakã ha hete perfektovaʼekue. Ndaitujái, ndahasýi ni nomanoivaʼerãmoʼã... oikovaʼerãmoʼã opa ára g̃uarã. Ifamiliakuéra avei perfékto ha oikovaʼerãmoʼã vyʼápe omanoʼỹre. Oñembohetavévo ifamiliakuéra, ombaʼapovaʼerãmoʼã vyʼápe ombotuichave hag̃ua pe paraíso, omyenyhẽ meve ko Yvy (Génesis 1:26-30; 2:15).

⁸ Umi mbaʼe yvypórape omeʼẽvaʼekuégui, la Biblia heʼi: “Omaʼẽ opa mbaʼe ojapovaʼekuére ha ojuhu iporãha” (Génesis 1:31). Ha heʼi avei Ñandejárare: “Hembiapokue ndaijojahái” (Deuteronomio 32:4). Upéicha, Ñandejára omeʼẽvaʼekue yvyporakuérape opa mbaʼe oñepyrũ porã hag̃ua. Ndaikatúi upévagui iporãve. Ajépa imbaʼeporãite Ñandejára!

Liverta, péro ndahaʼéi jajapo hag̃ua jajaposéva

9, 10. Mbaʼérepa oĩmantevaʼerã umi léi heʼíva mbaʼéichapa jaiporuvaʼerã pe liverta jaiporavo hag̃ua?

⁹ Upéicharõ jepe, oipotaparakaʼe Ñandejára jajapo oimeraẽ mbaʼe jajaposéva? Omeʼẽpa ñandéve upearã pe liverta jaiporavo hag̃ua? Peteĩ siudápe, ndaipóriramo ni peteĩ léi umi áuto ha kamionkuérape g̃uarã, ikatúramo ojeho ojehoseha gotyo, ha ojeiko hatã ojeikoseháicha, reikosénepa upépe peteĩ mbaʼyrúpe? Nahániri. Oimeraẽva ikatúramo ojapo ojaposéva oikokuaa heta aksidénte.

¹⁰ Upéicha avei pe liverta jaiporavo hag̃ua omeʼẽvaʼekue ñandéve Ñandejára. Jajapóramo oimeraẽ mbaʼe jajaposéva mbaʼeve ndoikoporãmoʼãi. Oĩmantevaʼerã umi léi oñekotevẽva yvyporakuéra oiko porã hag̃ua. Ñandejára Ñeʼẽ heʼi: “Peiko oikoʼỹva avave poguýpeicha, opáichavo, upe haguére ani pejapo mbaʼeve ivaíva” (1 Pedro 2:16, VP). Ñandejára oipota oĩ umi léi heʼíva mbaʼéichapa jaiporuvaʼerã pe liverta jaiporavo hag̃ua, ikatu hag̃uáicha jaiko porã oñondivepa. Oipota jaiporu pe liverta oñekotevẽháicha, heʼiháicha umi léi, ndahaʼéi jajapo hag̃ua opa mbaʼe jajaposéva.

Máva léipepa ñaneñeʼẽrenduvaʼerã?

11. Máva léipe ñaneñeʼẽrendu hag̃uápa ñandeapovaʼekue Ñandejára?

¹¹ Máva léipe ñaneñeʼẽrendu hag̃uápa ñandeapovaʼekue Ñandejára? Pe 1 Pedro 2:16-pe heʼi avei: “Peiko uvei [...] Ñandejára rembiguái oikovaʼerãháicha”, [VP]. Upéva ndeʼiséi oikotaha ñandehegui peteĩ tembiguái oiko asýva. Heʼise uvei jajejapohague javyʼave hag̃ua jajapóramo Ñandejára heʼíva (Mateo 22:35-40). Umi léi Ñandejára omoĩva iporãve oimeraẽ yvypóra léigui. “Che, [...] [Jehová, NM] nde Jára, romboʼe ndéve ou porãtava rehe ha ahechauka ndéve nde raperã” (Isaías 48:17).

12. Mbaʼeichagua livertápa omeʼẽ ñandéve Ñandejára léi?

¹² Péro Ñandejára léi omeʼẽ ñandéve liverta jaiporavo hag̃ua hetaiterei mbaʼépe. Ha upévare ikatu jajapo hetaiterei mbaʼe ñanembovyʼáva. Epensamína umi tembiʼu, ao, músika, árte, ha óga opaichagua oĩvare. Ajépa jaiporavose ñande umi mbaʼépe, jahejarangue ótro oiporavo ñanderehe.

13. Mbaʼe léi físikapa jaiporuvaʼerã jaiko porãséramo?

¹³ Jahechaháicha, Ñandejára ñandeapovaʼekue javyʼave hag̃ua ñakumplíramo umi léi haʼe omoĩvaʼekue yvypórape g̃uarã. Upéicha avei umi léi físika. Ñamoĩ chupe nañapenaseiha pe ley de la gravedad rehe. Japóramo yvatégui ikatu ñapẽ térã ñamano. Ha nañapenáiramo umi léi ñande rete ogovernávare, ndajakarúi, ndajayʼúi térã ndajarrespirasevéiramo, ñamanóta.

14. Mbaʼéichapa jaikuaa yvypóra ndojejapoihague oiko hag̃ua Ñandejaraʼỹre?

¹⁴ Jajapomantevaʼerã heʼiháicha umi léi físika omoĩvaʼekue Ñandejára. Upéicha avei, jajapovaʼerã heʼiháicha umi léi teko potĩ rehegua ha umi heʼíva mbaʼéichapa jaikovaʼerã ñande rapichándi (Mateo 4:4). Ñandejára nañandeapói jaiko porã hag̃ua heseʼỹ. Pe proféta Jeremías heʼi: “Aikuaa yvypóra ndahaʼeiha hekove jára” (Jeremías 10:23, 24). Upéva ohechauka Ñandejára ñandeapohague haʼe ñanegoverna hag̃ua, ndahaʼéi yvypóra ñanegoverna hag̃ua.

15. Hasyvaʼerãmoʼãpa Adán ha Évape iñeʼẽrendu hag̃ua Ñandejárape?

¹⁵ Ñande ru ha ñande sy ypykuépe ndahasyivaʼeramoʼã iñeʼẽrendu hag̃ua Ñandejárape. Ojapo porã vaʼerãmoʼã katu hesekuéra, ha iñemoñarekuérare avei. Ojapórire Ñandejára heʼíva, osẽ porã vaʼerãmoʼã hikuái. Opavave jaiko porã vaʼerãmoʼã vyʼápe peteĩ paraísope! Ndaiporivaʼerãmoʼã tembiapo vai, jehasa asy ni ñemano.

[Nóta oĩva taʼanga ndive páhina 11]

Ñandejára ojapovaʼekue opa mbaʼe yvyporakuéra oñepyrũ porã hag̃ua

[Nóta oĩva taʼanga ndive páhina 12]

Jaikosénepa peteĩ mbaʼyrúpe ndaipóriramo ni peteĩ léi umi mbaʼyruguatápe g̃uarã?