Párte 6

Mbaʼérepa Ñandejára oheja jahasa asy

1, 2. Mbaʼéichapa ñande ru ha ñande sy ypykue ohundi pe ñepyrũ porãite Ñandejára omeʼẽvaʼekue chupekuéra?

MBAʼÉPA oikorakaʼe? Mbaʼépa oiko ajeve oñehundi pe ñepyrũ porãite Ñandejára omeʼẽvaʼekue ñande ru ha ñande sy ypykuépe? Mbaʼérepa oĩrangue pyʼaguapy ha jeiko porã, oĩhaguéicha pe Paraísope, aretéma oĩ pe jehasa asy ha mbaʼe vai apo?

² Péva oiko Adán ha Eva oiporu vaígui pe liverta oñemeʼẽvaʼekue chupekuéra oiporavo hag̃ua. Ndohechakuaái hikuái ndaikatuiha oho porãvo omboykéramo Ñandejára ha Iñeʼẽ. Adán ha Eva omboyke Ñandejárape, oimoʼãgui upéicha oiko porãvetaha hikuái. Ha upéicha oiporu vai pe liverta Ñandejára omeʼẽvaʼekue chupekuéra (Génesis, kapítulo 3).

Mávapa oisãmbyhyvaʼerã opa mbaʼe?

3-5. Mbaʼérepa Ñandejára nohundíri Adán ha Évape ha oñepyrũ jeýnte?

³ Mbaʼére piko Ñandejára nohundírinte Adán ha Évape ha ndojapói jeýnte ótro kuimbaʼe ha ótro kuña? Oĩgui oñemoĩva igoviérnore, pe derécho oguerekóva oisãmbyhy hag̃ua opa mbaʼe.

⁴ Oĩ koʼã porandu tekotevẽva oñembohovái: Mávapa iderécho oisãmbyhy hag̃ua ha mávapa ogoverna porã? Ñandejára oguereko pe derécho, haʼégui opa mbaʼe Apohare ha ipuʼakapágui opa mbaʼére. Avei, Ñandejára goviérno iporãve opavavépe g̃uarã haʼe oikuaágui opa mbaʼe. Péro oĩ pe opuʼãva Ñandejára sãmbyhýre. Avei, ojapo vaípa rakaʼe Ñandejára pe yvypórape? Upéi jahecháta upéva ha avei ikatúpa peteĩ yvypóra oservi porã Ñandejárape ohejaʼỹre chupe.

⁵ Yvyporakuéra omboyke rire Ñandejárape ojehechavaʼerã avei ko mbaʼe: Oiko porãvénepa hikuái Ñandejára goviernoʼỹre? Ñandejára oikuaa porã mbaʼéichapa oñembohovái ko porandu. Péro yvyporakuéra oikuaa hag̃ua ijehegui, Ñandejára omeʼẽmbaite chupekuéra pe liverta oipotáva. Yvyporakuéra oiporavo upéva, ha Ñandejára oheja chupekuéra.

6, 7. Mbaʼérepa Ñandejára omeʼẽmbaite yvyporakuérape liverta koʼág̃a peve?

⁶ Omeʼẽvo yvyporakuérape pe tiémpo oikotevẽva ojapo hag̃ua ojaposéva, Ñandejára ohechauka porãta mbaʼépa iporãve: Ñandejára goviérnopa térãpa yvyporakuéra goviérno. Ha pe tiémpo omeʼẽva ipukuvaʼerã oñekotevẽháicha, yvyporakuéra ohupyty hag̃ua pe iporãvéva hembiapokuérape, pe polítika, indústria, siénsia ha medisínape.

⁷ Upévare Ñandejára oheja koʼag̃aite peve yvyporakuérape ohechauka hag̃ua hikuái añetehápepa ikatu oisãmbyhy porã Ñandejaraʼỹre. Ha upéicha yvyporakuéra ikatu oiporavo ipyʼaporãtapa térã ipyʼahatãta, oporohayhútapa térã iñañáta, oiporútapa tekojoja térã tekojojaʼỹ. Péro, oiporavo rire, ombohovaivaʼerã avei pe oúva chupekuéra hembiapokuégui: pyʼaporã ha pyʼaguapy ỹrõ mbaʼe vai ha jehasa asy.

Umi ánhel opuʼãva Ñandejárare

8, 9. a) Mbaʼéichapa umi ánhel oñepyrũ opuʼã Ñandejárare? b) Mávapepa omokyreʼỹ avei Satanás opuʼã hag̃ua Ñandejárare, ojapohaguéicha Adán ha Évare?

⁸ Oĩve peteĩ mbaʼe jahechavaʼerã. Ndahaʼéi ñande ru ha ñande sy ypykuénte umi opuʼãvaʼekue Ñandejára sãmbyhýre. Oĩpa avei oikovéva upérõ? Oĩ umi ánhel. Ojapo mboyve yvyporakuérape, Ñandejára ojapo heta ánhel oiko hag̃ua amo yvágape. Chupekuéra avei oñemeʼẽ pe liverta oiporavo hag̃ua, ha oikotevẽ avei hikuái Ñandejára sãmbyhýre (Job 38:7; Salmo 104:4; Revelación 5:11).

⁹ La Biblia ohechauka amo yvágape oñepyrũhague umi oñemoĩva Ñandejárare. Peteĩ ánhel oipota oñemeʼẽmbaite chupe iliverta. Ha hiʼarive oipota opaite yvyporakuéra oadora chupe (Mateo 4:8, 9). Ko ánhel rrevélde omokyreʼỹ Adán ha Évape opuʼã hag̃ua Ñandejárare. Upearã omoĩ vai Ñandejárape heʼívo ojokoha chuguikuéra peteĩ mbaʼe iporãva (Génesis 3:1-5). Upévare oñehenói chupe Diablo (peteĩ otakýva hapicháre) ha Satanás (peteĩ oñemoĩva hapicháre). Upe rire ko ánhel omokyreʼỹ ótro anhelkuérape opuʼã hag̃ua avei Ñandejárare. Koʼãvape upéi oñehenói demónio (Deuteronomio 32:17; Revelación 12:9; 16:14).

10. Mbaʼépepa opa umi yvypóra ha anhelkuéra oñemoĩvaʼekue Ñandejárare?

¹⁰ Umi yvypóra opuʼãvo Ñandejárare oñemoĩ Satanás ha idemoniokuéra poguýpe. Upévare la Biblia heʼi Satanás haʼeha “ko múndo ruvicha”, ‘omoakãypytũva’ umi ndogueroviáivape. Ha heʼi avei “ko múndo oĩmbaha aña poguýpe.” Jesús voi heʼivaʼekue Satanás haʼeha “ko múndo ruvicha” (2 Corintios 4:4; 1 Juan 5:19; Juan 12:31).

Mokõi mbaʼe ojehechavaʼerã

11. Mbaʼéichapa oñemoĩ avei Satanás Ñandejárare?

¹¹ Oĩve peteĩ mbaʼe Satanás heʼivaʼekue oñemoĩvo Ñandejárare. Heʼi Ñandejára ojapo vai hague yvyporakuérape, ha avave ndojapomoʼãiha pe iporãva ojejopy vai jave. Ha hiʼarive heʼi yvyporakuéra omaldesitaha Ñandejárape ojejopy vai jave (Job 2:1-5). Upéicha Satanás heʼi yvyporakuéra ndoserviporãmoʼãiha Ñandejárape opaite mbaʼépe.

12-14. Mbaʼéichapa pe tiémpo ohasáva ohechaukáta Satanás ijapuhague?

¹² Upévare Ñandejára omeʼẽmbaite pe tiémpo oñekotevẽva, opavave ohecha hag̃ua mbaʼépepa osẽ ko ñembohovái ha ojehecha hag̃ua mávapa oguereko pe derécho oisãmbyhy hag̃ua (Embojoja Éxodo 9:16 rehe). Umi mbaʼe oikóva yvyporakuérare ohasa rire heta tiémpo ohechaukáta mbaʼeichaitépa hína añetehápe umi mokõi mbaʼe oñembohovaivaʼekue.

¹³ Ñepyrũrã, mbaʼéichapa ohechaukáta pe tiémpo mávapa oguereko derécho oisãmbyhy hag̃ua opa mbaʼe, ha iporãpa Ñandejára goviérno? Ikatúnepa yvyporakuéra oñesãmbyhy porãve, ogovernarangue hesekuéra Ñandejára? Ikatúnepa peteĩ yvypóra goviérno omboykéva Ñandejárape ogueru peteĩ múndo oĩháme vyʼa ha ndaiporihápe ñorairõ, mbaʼe vai apo ha tekojojaʼỹ? Oipeʼánepa pe goviérno pe mboriahu ha omoingo porãvénepa opavavépe? Ipuʼakánepa pe mbaʼasy, tuja ha ñemanóre? Ñandejára goviérno ikatu ojapopaite koʼã mbaʼe (Génesis 1:26-31).

¹⁴ Ha pe porandu mokõihágui, mbaʼépa pe tiémpo ohechaukáta yvyporakuéragui? Ojapo vaípa rakaʼe Ñandejára chupekuéra? Ojapónepa hikuái pe oĩ porãva ojejopy vai jave? Oĩnepa oipotavéva Ñandejára oisãmbyhy chupekuéra, yvypóra oisãmbyhyrangue Ñandejaraʼỹre?

[Nóta oĩva taʼanga ndive páhina 13]

Ñandejára omeʼẽmbaite yvyporakuérape pe tiémpo oikotevẽva ohupyty hag̃ua opa mbaʼe ojaposéva

[Roagradese]

Transbordador: Ojeporu fóto onohẽvaʼekue NASA