Párte 8

Oñembohape ohóvo oikopa hag̃ua pe Ñandejára oipotáva

1, 2. Mbaʼe mbaʼépa ojapóma Ñandejára oipeʼa hag̃ua pe jehasa asy?

HETA síglorema yvypóra ha demoniokuéra goviérno oñemoĩva Ñandejárare, mbaʼe vaípemante ñandegueraha. Upéicharamo jepe Ñandejára ndohejareíri ñande jehasa asy. Upéva rangue, ko tiémpo ohasa aja, ombohape ohóvo oipeʼa hag̃ua yvyporakuéragui pe mbaʼe vai ha jehasa asy.

² Oñepuʼãvo Ñandejárare pe Edénpe, haʼe oñepyrũma oikuaauka omoĩseha peteĩ goviérno ojapótava ko yvýgui peteĩ paraíso yvyporakuérape g̃uarã (Génesis 3:15). Upéi Jesús, pe oñeʼẽva Ñandejára rérape, omboʼe pe rréino oútavagui. Heʼi upévare añoite ikatuha ojerovia yvyporakuéra (Daniel 2:44; Mateo 6:9, 10; 12:21).

3. Mbaʼéichapa Jesús ohenoivaʼekue pe goviérno oisãmbyhýtava ko yvy ape ári, ha mbaʼérepa?

³ Jesús ohenói pe rréino oútavape ‘sãmbyhy yvágagui oúva’, oisãmbyhýtagui yvága guive (Mateo 4:17). Avei ohenói chupe “Ñandejára rréino”, ouhaguére Ñandejáragui (Lucas 17:20, VP). Umi síglo ohasavaʼekuépe Ñandejára ohaiuka heta kuimbaʼe rupi umi profesía oikuaaukáva máva mávapa oisãmbyhýta pe rréinope ha mbaʼépa ojapóta hikuái.

Pe Rréi pyahu ko Yvýpe g̃uarã

4, 5. Mbaʼéichapa Ñandejára ohechauka Jesús haʼeha pe Rréi oiporavovaʼekue?

⁴ Ojapóma 2.000 áño rupi Jesús okumplipahague umi profesía heʼíva mávapa oisãmbyhýta Ñandejára Rréinope. Ñandejára oiporavovaʼekue chupe ogoverna hag̃ua pe rréino yvagapeguápe, oisãmbyhýtava yvyporakuérape. Omano rire Jesús, Ñandejára omoingove jey chupe oiko hag̃ua yvágape. Oiko chugui peteĩ ánhel, ipoderósova ha ikatuʼỹva omano. Oĩ heta ohechavaʼekue haʼe oikove jey hague (Hechos 4:10; 9:1-9; Romanos 1:1-4; 1 Corintios 15:3-8).

⁵ Jesús upérõ ‘oguapy Ñandejára akatúape’ (Hebreos 10:12, VP). Upépe ohaʼarõ Ñandejára omeʼẽ peve chupe pe puʼaka oiko hag̃ua chugui Rréi Ñandejára Rréinope. Péicha oñekumpli pe heʼíva Salmo 110:1-pe, Ñandejára heʼihápe chupe: “Eguapy che akatúa gotyo, tamoĩ ne pyendáramo umi nderayhuʼỹva”.

6. Mbaʼéichapa Jesús ohechauka ikatuha oiko chugui Rréi Ñandejára Rréinope?

⁶ Oikórõ guare ko yvy ape ári, Jesús ohechauka ikatuha oiko chugui rréi. Ojepersegíramo jepe, haʼe ni mbaʼevéicharõ ndohejái Ñandejárape. Upéicha ojapóvo, ohechauka Satanás ijapuhague heʼírõ guare ni peteĩ yvypóra ndoserviporãmoʼãiha Ñandejárape ojejopy vai jave. Jesús, peteĩ kuimbaʼe perfékto, pe ‘segundo Adán’, ohechauka Ñandejára ndojavyihague ojapóvo umi yvypóra perféktope (1 Corintios 15:22, 45; Mateo 4:1-11).

7, 8. Mbaʼe mbaʼe iporãvapa ojapovaʼekue Jesús oĩrõ guare ko yvy ape ári, ha mbaʼépa ohechauka?

⁷ Oĩnepa peteĩ goviérno ikatúva ojapo michĩmi jepe umi mbaʼe Jesús ojapovaʼekue yma oikórõ guare ko yvy ape ári? Ñandejára espíritu sánto rupive, Jesús omonguera umi hasývape, lisiádope, ndohecháivape, nohendúivape ha umi iñeʼẽngúvape. Omanóvape jepe omoingove jey! Haʼe ohechauka michĩmi mbaʼépa ojapóta ko yvy ape ári oisãmbyhy vove (Mateo 15:30, 31; Lucas 7:11-16).

⁸ Ojapógui hetaite mbaʼe porã Jesús oĩrõ guare ko yvy ape ári, pe idisípulo hérava Juan heʼi: “Hetaiteve mbaʼe Jesús ojapovaʼekue. Ha ñamoĩmbátaramo kuatiáre opa umi mbaʼe haʼe ojapovaʼekue, ko yvy ári ndaijapamoʼãi umi kuatia omombeʼútava hembiapokue”a (Juan 21:25).

9. Mbaʼérepa heta tapicha ipyʼaporãva oñemboja Jesús rendápe?

⁹ Jesús ipyʼaporã, iporiahuvereko, ha ohayhueterei tapichakuérape. Haʼe oipytyvõ umi imboriahúvape ha umi ojejopývape, péro upéva ndeʼiséi omboykeha umi iplatáva térã oiko porãvape. Umi tapicha ipyʼaporãva ohendu ko invitasión Jesús ojapovaʼekue: “Pejupa cherendápe peẽ penekaneʼõ ha pembaʼapo pohýiva, ha che pomombytuʼúta. Peñemoĩ pe júgo che ameʼẽva peẽme guýpe ha peikuaa chehegui, che chepyʼaporãha ha ndajejapoiha, ha pene ánga pytuʼúta. Pe júgo che ameʼẽva peẽme ndahasýi peraha ha ivevúi pe arahaukáva peẽme” (Mateo 11:28-30, VP). Hetaiterei tapicha ohayhúva Ñandejárape oñembojavaʼekue hendápe ha oipotavaʼekue igoviérno (Juan 12:19).

Umi oisãmbyhýtava avei Jesús ndive

10, 11. Máva mávandipa oisãmbyhýta Jesús ko Yvy?

¹⁰ Umi yvypóra goviérnope oĩháicha umi oñomoirũva ogoverna hag̃ua, upéichata avei pe Rréino yvagapeguápe. Oĩta umi oisãmbyhýva ko Yvy Jesús ndive, pórke haʼe heʼivaʼekue iñirũnguérape oisãmbyhytaha hendive (Juan 14:2, 3; Revelación 5:10; 20:6).

¹¹ Ha upéicha, Jesús ndive oñemoingove jey umi yvyporakuéra oikótava yvágape. Koʼãva ogoverna avei Ñandejára goviérnope. Ko goviérno oguerúta heta mbaʼe porã yvyporakuérape g̃uarã (2 Corintios 4:14; Revelación 14:1-3). Jahechaháicha, pe tiémpo ohasa aja Jehová omoĩ ohóvo pe simiénto peteĩ goviérno pyahúpe g̃uarã, oguerútava heta mbaʼe porã opaʼỹva maymávape g̃uarã.

Opátama yvypóra goviérno omboykéva Ñandejárape

12, 13. Mbaʼépa ojapopotaite Ñandejára Rréino?

¹² Pe síglo véintepe Ñandejára ojapóma heta mbaʼe ko yvy ape ári. Jahechataháicha Párte 9-pe, pe profesía oĩva la Bíbliape ohechauka Ñandejára Rréino, oĩva Cristo poguýpe, oñepyrũhague 1914-pe ha koʼág̃a ohundipotaiteha ko Satanás goviérno. Ko Rréino oĩma ‘omoĩ hag̃ua ipoguýpe’ umi Jesucrístope ndohayhúivape (Salmo 110:2).

¹³ Koʼã mbaʼégui Daniel 2:44 heʼi: ‘Ha umi rréi árape [umi oisãmbyhýva koʼág̃a], Ñandejára yvagapegua omoĩta [yvágape] peteĩ rréino arakaʼeve noñehundimoʼãiva. Ha pe rréino noñembohasamoʼãi mbaʼeveichagua tetãme [arakaʼeve noisãmbyhymoʼãvéima yvyporakuéra]. [Ñandejára goviérno] omonguʼíta ha ohundipáta koʼã rréino, ha opytáta opa ára peve’ (NM).

14. Mbaʼe iporãvapa ojehupytýta opa vove yvyporakuéra goviérno?

¹⁴ Ojepeʼapávo opa yvypóra goviérno, Ñandejára Rréino oisãmbyhýta ko Yvy tuichakue javeve. Ha oisãmbyhýgui yvága guive, ndaikatumoʼãi yvyporakuéra ombyai arakaʼeve. Pe goviérno oĩ jeýta pe oĩ ypy haguépe, yvágape Ñandejára ndive. Ha Ñandejára ogovernáta rupi ko Yvy tuichakue, nombotavymoʼãvéima avavépe umi rrelihión japu, ni umi yvypóra arandu ni umi polítika. Umi mbaʼe ndaiporimoʼãvéima (Mateo 7:15-23; Revelación, kapítulo 17 guive 19 peve).

[Nóta]

[Nóta oĩva taʼanga ndive páhina 18]

Oĩrõ guare ko yvy ape ári, Jesús omonguera hasývape ha omoingove jey umi omanóvape ohechauka hag̃ua mbaʼépa ojapóta pe múndo pyahúpe

[Nóta oĩva taʼanga ndive páhina 19]

Ñandejára Rréino yvagapegua ohundíta opaichagua yvypóra goviérno omboykéva chupe