Kapítulo 10
Peteĩ rréino “noñehundimoʼãiva arakaʼeve”
1. Mbaʼépa ohechauka umi mbaʼe oikóva ko múndope ymaiterei guive?
KOʼẼ koʼẽre, umi mbaʼe oikóva ko múndope ohechauka yvyporakuéra ndaikatuiha oiko vyʼápe omboyke rupi Jehovápe ha oñehaʼãgui oñegoverna ijupe voi. Ndaipóri peteĩ goviérno ovenefisiáva opavavépe. Ojekuaáramo jepe koʼág̃a hetaiterei mbaʼe, ndaikatúi gueteri avave ipuʼaka mbaʼasy térã ñemanóre. Yvyporakuéra goviérno ndojokói umi ñorairõ guasu, violénsia, jejuka, mboriahu térã monda. Ha heta tetã rupi umi mburuvichakuéra oguereko asy tapichakuérape (Eclesiastés 8:9). Pe teknolohía, taryrýi ha tavy ojuaju oñembyaipa hag̃ua ko yvy, y ha yvytu. Ha ndoiporuporãi rupi umi goviérno pe viru, heta tapicha ohasa asy. Hetaiterei árarema ojehecha “yvypóra ndahaʼeiha hekove jára, ndoikuaaiha mbaʼépa oikóta chugui” (Jeremías 10:23).
2. Mbaʼéicha añoitépa oñemyatyrõta umi provléma oĩva ko múndope?
2 Mbaʼéichapa oñemyatyrõta koʼã mbaʼe? Ñandejára Rréino rupive, pe goviérno Jesús omboʼevaʼekue jajerure hag̃ua heʼírõ guare: “Tou ne rréino, tojejapo ne rembipota yvy ári yvagapeguáicha” (Mateo 6:9, 10, BNP). Ko goviérno yvagapeguápe 2 Pedro 3:13-pe oñehenói ‘yvága pyahu’, oisãmbyhýtava pe ‘yvy pyahu’, térã umi tapichakuéra heko porãva oikótava ko Yvy ape ári. Tuichaiterei mbaʼe ko Rréino yvagapegua, upévare Jesús oñeʼẽ meme vaʼekue hese (Mateo 4:17). Ha ikatu hag̃ua ñande avei jahecha upéicha, heʼivaʼekue: “Peheka raẽ [...] Ñandejára rréino ha pe teko marangatu haʼe oipotáva” (Mateo 6:33, BNP).
3. Mbaʼérepa iñimportanteterei jaikuaave koʼág̃a Ñandejára Rréinogui?
3 Koʼág̃a rupi iñimportanteterei jaikuaave Ñandejára Rréinogui. Upéva upéicha koʼẽrõite oipeʼapátagui umi goviernokuérape. Daniel 2:44 heʼi: “Oisãmbyhy aja koʼã mburuvichakuéra [koʼag̃agua], [Ñandejára] yvagapegua omopuʼãta peteĩ [goviérno yvágape] noñehundimoʼãiva arakaʼeve. [Pe goviérno] ndoʼamoʼãi avaveichagua tetã poguýpe [yvyporakuéra nogovernamoʼãvéima ko Yvy arakaʼeve]. Ohundietéta uvei ambue tetãnguéra [oĩva koʼág̃a] ha [pe goviérno] ndopamoʼãi arakaʼeve”. Jahechaháicha, koʼã ára paha oñemohuʼãta pe goviérno yvagapegua ohundipaitévo ko múndo aña. Upéicha ndaiporimoʼãvéima oñemoĩva hese ogoverna hag̃ua ko Yvy. Javyʼaitereivaʼerã jaikuaágui opapotaitemaha pe jehasa asy.
4. Mbaʼépa oiko yvágape 1914-pe, ha mbaʼérepa iñimportánte ñandéve g̃uarã?
4 Pe áño 1914-pe, Jehová omeʼẽ puʼaka Jesucrístope ‘oisãmbyhy hag̃ua ohóvo iñenemígo paʼũme’ (Salmo 110:1, 2, NM). Avei, upe áñope ko múndo aña oike pe ára pahápe (2 Timoteo 3:1-5, 13). Upe jave oñekumpli avei yvágape umi mbaʼe ohechavaʼekue proféta Daniel peteĩ visiónpe. Peteĩ ‘Karai itujámava’, ojeʼéva Ñandejára Jehováre, omeʼẽ pe kuimbaʼe Raʼýpe, haʼéva Jesucristo, rréino, ñemombaʼeguasu ha autorida ogoverna hag̃ua. Ikatu hag̃ua opaichagua tapicha, tetãnguéra ha opa ñeʼẽmegua oservi chupe. Oñeʼẽvo pe ohechavaʼekuére, Daniel heʼi igovernasión ndopamoʼãiha, ha irréino noñehundimoʼãiha arakaʼeve (Daniel 7:13, 14). Ko Rréino yvagapegua rupive, oĩtava Jesucristo pópe, Ñandejára omeʼẽta hetaiterei mbaʼe porã umi tapichápe omombaʼéva hustísia, ojapomoʼãhaguéicha pe Paraísope umi ñande ru ypykue ndive.
5. Mbaʼe mbaʼépa jaikuaaséta pe Rréinogui, ha mbaʼérepa?
5 Hiʼãpa ñandéve jaiko Ñandejára Rréino poguýpe? Upéicharamo, jaikuaasevaʼerã mbaʼeichaguápa ko goviérno oĩva yvágape ha mbaʼéichapa ombaʼapo. Jaikuaaséta mbaʼépa ojapo koʼág̃a, mbaʼépa ojapóta tenonderã ha mbaʼépa ojerure ñandehegui. Ñahesaʼỹijo porãramo koʼã mbaʼe, ñamombaʼevéta ko goviérno. Ha ñañemoĩramo ipoguýpe, ñaime porãvéta ñamombeʼu hag̃ua ñande rapichápe umi mbaʼe porãita ojapótava Ñandejára Rréino entéro iñeʼẽrendúva rehehápe (Salmo 48:12, 13).
Umi oisãmbyhýtava Ñandejára Rréino
6. a) Mbaʼéichapa ohechauka la Biblia máva mbaʼépa pe Rréino oĩva Jesucristo pópe? b) Mbaʼépa ñanemomyivaʼerã jajapo hag̃ua umi mbaʼe jaikuaáva jahávo Ñandejára Rréinogui?
6 Ñahesaʼỹijóvo mbaʼépa pe Rréino, jahechakuaa ouha Jehovágui voi. Haʼe voi omeʼẽvaʼekue Itaʼýrape rréino, ñemombaʼeguasu ha autorida ogoverna hag̃ua. Upéicha, oñemeʼẽvo Ñandejára Raʼýpe podér oñepyrũ hag̃ua oisãmbyhy, oñehendu ojeʼéramo yvága guive: “Pe yvy ñesãmbyhy [Ñandejára] ha Hemimbou [Jesucristo] mbaʼéma, ha [Jehová] oisãmbyhýta opa ára g̃uarã” (Apocalipsis [Revelación] 11:15). Upévare, entéro mbaʼe jahecháva ko Rréinogui ha umi mbaʼe ojapótavagui, ñanemoag̃uive Jehováre. Umi mbaʼe jaikuaáva jahávo ñanemokyreʼỹvaʼerã ñañemoĩ hag̃ua ipoguýpe opa ára g̃uarã.
7. Mbaʼérepa iñimportánte ñandéve g̃uarã jaikuaa Jesucristo ogovernaha Jehová rérape?
7 Ñapensami, avei, Jehová ojapovaʼekuére omoĩvo Jesucrístope ogoverna hag̃ua Hérape. Oñehenoivaʼekue chupe pe Mbaʼapohára Ikatupyrýva, Ñandejára oiporuvaʼekue ojapo hag̃ua ko Yvy ha yvyporakuérape, upévare Jesús oikuaa porãve ñandehegui mbaʼépa ñaikotevẽ. Avei, iñepyrũmby guive haʼe ohechauka ‘ovyʼaha yvyporakuéra ndive’ (Proverbios 8:30, 31; Colosenses 1:15-17). Ohayhuetereígui yvyporakuérape, ouvaʼekue ko Yvy ape ári omano hag̃ua ñanderehehápe (Juan 3:16). Upéicha, ikatu jajei pekádo ha ñemano poguýgui ha jahupyty pe jeikove opaʼỹva (Mateo 20:28).
8. a) Mbaʼérepa Ñandejára Rréino ndopamoʼãi arakaʼeve, ndojoguamoʼãi yvyporakuéra goviérnope? b) Mbaʼépa ojapo pe ‘tembiguái jeroviaha ha iñarandúva’ Ñandejára Rréinore?
8 Ñandejára Rréino haʼe peteĩ goviérno ndopamoʼãiva arakaʼeve. Upéva upéicha jaikuaágui Jehová nomanoiha (Habacuc 1:12). Ha Jesucristo Ñandejára omoĩvaʼekue oisãmbyhy hag̃ua, ndaikatúi avei omano, ndahaʼéi yvypóra mburuvichakuéraicha (Romanos 6:9; 1 Timoteo 6:15, 16). Oĩ avei 144.000 oservíva Ñandejárape oúva ‘opaichagua trívu, ñeʼẽ, ha tetãgui’ ogovernátava Jesucristo ndive yvágape. Koʼãvape avei oñemeʼẽ pe tekove ikatuʼỹva oñehundi (Apocalipsis [Revelación] 5:9, 10; 14:1-4; 1 Corintios 15:42-44, 53). Opavave nunga koʼãva oĩma yvágape, ha umi opytávape gueteri ko Yvy ape ári oñehenói ‘tembiguái jeroviaha ha iñarandúva’ [esclavo fiel y discreto], omotenondéva umi tembiapo Ñandejára Rréino rehegua ko Yvy tuichakue (Mateo 24:45-47).
9, 10. a) Mbaʼe mbaʼépa ohundipáta pe Rréino? b) Mbaʼe rehépa ndajajeheʼaivaʼerã ani hag̃ua ñañemoĩ Ñandejára Rréinore?
9 Koʼẽrõite, og̃uahẽ vove Jehová ára, haʼe oiporúta umi ehérsito yvagapegua oĩva ipoguýpe omopotĩ hag̃ua ko Yvy. Koʼãva ohundipaitéta umi yvypóra noñemoĩséiva Jehová goviérno poguýpe, ha omboykéva umi mbaʼe porãita omeʼẽva ñandéve Jesucristo rupive (2 Tesalonicenses 1:6-9). Upéva hína Jehová ára, hiʼãitémava ou ojehecha hag̃ua haʼe añoiteha Mburuvicha Guasu yvágape ha Yvy ape ári. “Og̃uahẽma Ñandejára ára, ára ñarõ, pochy guasu ha pochy rendýgui henyhẽva, [...] ha hembiapo vaívape ohundíta.” (Isaías 13:9.) “Upe árape hendýta pochy, vyʼaʼỹ ha angata, oikóta ñehundi opytaʼỹre mbaʼeve, opa mbaʼe iñypytũta, arai ha pytũme ojejahoʼíta.” (Sofonías 1:15.)
10 Upe jave oñehundietéta opaichagua rrelihión japu ha umi yvypóra goviérno ijehérsito reheve, ojapovaʼekue oikóvo ko múndo ruvicha oipotáva. Upéicha avei, oñehundíta opavave tapicha ojepyʼapýva ijehénte, heko vai ha itieʼỹva, ko múndope ojeikoháicha. Ha ipahápe, ojepeʼáta ko Yvýgui mil áñore Satanás ha idemoniokuérape, anive hag̃ua ombyai yvyporakuérape. Upéva ohasa rire, Ñandejára Rréino omoĩta ipoguýpe opa mbaʼe oĩva ko Yvy ape ári. Mbaʼeichaitépa ipiroʼýta umi tapicha omombaʼéva pe hustísia! (Apocalipsis [Revelación] 18:21, 24; 19:11-16, 19-21; 20:1, 2.)
Mbaʼéichapa ojejapóta Ñandejára Rréino oipotáva
11. a) Mbaʼéichapa pe Rréino oĩtava Jesucristo pópe ojapopaitéta Ñandejára oipotáva? b) Mbaʼépa ojapóta Ñandejára goviérno umi oikótavare ko Yvy ape ári?
11 Pe Rréino oĩtava Jesucristo pópe ojapopaitéta Ñandejára oipotáva ko Yvýpe g̃uarã (Génesis 1:28; 2:8, 9, 15). Koʼág̃a peve, yvyporakuéra ndojapói mbaʼeve oiko hag̃ua upéva. Upevére, pe yvy ojeikotaha oñemoĩta Jesucristo poguýpe. Enterove umi ohasátava pe huísio oguerútava Jehová ko múndo añáre, ombaʼapovaʼerã oñondivepa pe rréi Jesucristo poguýpe. Upearã ojapovaʼerã kyreʼỹme opa mbaʼe haʼe heʼíva, oiko hag̃ua ko Yvýgui peteĩ paraíso (Hebreos 2:5-9). Opavave tapichakuéra ovyʼáta hembiapo reheve ha oiporupaitéta umi mbaʼe porã ko Yvy omoheñóitava (Salmo 72:1, 7, 8, 16-19; Isaías 65:21, 22).
12. Mbaʼéichapa umi tapicha oikótava Ñandejára Rréino poguýpe ohupytýta perfeksión?
12 Ñandejára ojapo porãiterei vaʼekue Adán ha Évape, ha oipotavaʼekue avei ifamiliakuéra upéicha iperféktova omyenyhẽ ko Yvy. Ko mbaʼe ojehupytýta Ñandejára Rréino poguýpe. Upearã tekotevẽ oñerenohẽmbaite umi mbaʼe vai pekádo ogueruvaʼekue, ha upévare Cristo ndahaʼéi Rréi añónte, haʼe avei Saserdóte Guasu. Mbeguekatúpe oipytyvõta umi tapichakuéra iñeʼẽrendúvape oñevenefisia hag̃ua pe sakrifísio ojapovaʼekuégui.
13. Mbaʼeichagua vendisiónpa ohupytýta umi oikótava Ñandejára Rréino poguýpe?
13 Pe goviérno poguýpe, yvyporakuérape oñemeʼẽta hetaiterei mbaʼe porã. “Upéramo umi ohechaʼỹva ohecháta, ha umi ohenduʼỹva ohendúta. Upéramo ijapáva [térã ikarẽva], guasúicha oñaníta ha iñeʼẽngúva vyʼágui osapukáita.” (Isaías 35:5, 6.) Ñande rete oñembyaíva ituja térã hasýgui oñembopyahu jeýta mitãicha, ha umi hasy mantéva hesãi ha imbarete jeýta. “Upépe hete hesãi jevýne, ha oiko jevy imitãramo guaréicha.” (Job 33:25.) Og̃uahẽta pe ára avave ndeʼimoʼãveitaha: ‘Che rasyʼaína’. Mbaʼérepa upéva? Ojepeʼáta rupi yvyporakuéragui pekádo ha opaichagua mbaʼe vai oguerúva hendive (Isaías 33:24; Lucas 13:11-13). Añetehápe, Ñandejára “omokãta hesaykuéra, ndaiporimoʼãvéima ñemano, tasẽ, jaheʼo ha temimbyasy; opa oĩvaʼekue yma niko ndaiporivéima” (Apocalipsis [Revelación] 21:4).
14. Mbaʼépa heʼise jahupyty perfeksión?
14 Upéicharamo jepe, perfeksión ndeʼiséi ñaneresãi ñande retépe añónte. Heʼise avei ojehechaha ñanderehe umi mbaʼe porã oguerekóva Jehová, ñande apo rupi ‘ijoguahárõ’ (Génesis 1:26). Upearã tekotevẽ heta ñañehekomboʼe. Jaikuaa pe múndo pyahúpe oĩtaha hustísia. Upéicha avei, Isaías heʼivaʼekue: “Yvypóra oikuaáta mbaʼépa heʼise tekojoja [térã hustísia]” (2 Pedro 3:13; Isaías 26:9). Pe hustísia ñanepytyvõ jaiko hag̃ua pyʼaguapýpe opaichagua tetãmegua ndive, ñane amígo, ñane família ha koʼýte Ñandejára ndive (Salmo 85:10-13; Isaías 32:17). Umi tapicha oñehekomboʼéva hustísiape mbeguekatúpe oikuaáta mbaʼépa oipota Ñandejára chuguikuéra. Ohayhuvévo Jehovápe, oñepyrũta oguata hikuái haʼe oipotahaichaite. Jesús heʼihaguéicha, haʼekuéra avei ikatúta heʼi ombovyʼaha Ñandejárape ojapo memégui “umi mbaʼe chupe ombovyʼáva” (Juan 8:29). Javyʼaitétapa opavave tapicha ojapo vove upéicha!
Umi mbaʼe jahechámava koʼág̃a
15. Eiporu umi porandu oĩva ko párrafo rire rehechauka hag̃ua mbaʼépa ojapóma pe Rréino, ha mbaʼépa ñande jajapovaʼerã koʼág̃a.
15 Heta mbaʼéma ojapo Ñandejára Rréino ha umi tapicha oñemoĩva ipoguýpe, ha koʼãva ojehechakuaa opárupi. Umi porandu oúva koʼág̃a ha umi téysto Bibliapegua ñanemomanduʼáta umi mbaʼére, ha avei mbaʼépa tekotevẽ ojapo oimeraẽ tapicha oñemoĩva pe goviérno poguýpe.
Mávare raẽpa oñemoĩ Ñandejára Rréino, ha mbaʼéichapa osẽ? (Apocalipsis [Revelación] 12:7-10, 12.)
Mávape raẽpa oñembyaty Cristo oñepyrũ guive ogoverna? (Apocalipsis [Revelación] 14:1-3.)
Mbaʼépa heʼivaʼekue Jesús ojapotaha oñepyrũ vove pe jehasa asy guasu, jahechaháicha Mateo 25:31-33-pe?
Mbaʼe tembiapópa ojejapo raẽ koʼág̃a? Máva mávapa ombaʼapojoa ko mbaʼépe? (Salmo 110:3, NM; Mateo 24:14; Apocalipsis [Revelación] 14:6, 7.)
Mbaʼérepa umi polítiko ha rrelihióso ndaikatúi ojoko ko predikasión oñehaʼãramo jepe? (Zacarías 4:6; Hechos 5:38, 39.)
Mbaʼépa ojapóma umi oñemoĩva Ñandejára Rréino poguýpe? (Isaías 2:4; 1 Corintios 6:9-11.)
Pe goviérno oĩtava mil áño
16. a) Mboy tiémpopa Cristo ogovernáta? b) Mbaʼeichagua mbaʼe porãitápa ojejapóta upe tiémpope ha upe rire avei?
16 Ojejagarra rire Satanás ha idemoniokuérape, Jesucristo ha umi 144.000 opytáta rréi ha saserdóteramo mil áño pukukue (Apocalipsis [Revelación] 20:6). Upe tiémpope oipeʼaitéta hikuái pekádo ha ñemano oúva Adángui, ha yvyporakuéra ohupytýta perfeksión. Oñemohuʼãvo pe mil áño, ha ojapopa rire Jesús hembiapo Rréi ha Saserdóteramo, omoĩta “Túva poguýpe pe rréino”, “Ñandejára haʼepa hag̃ua opa mbaʼépe” (1 Corintios 15:24-28, BNP). Upémaramo ojepoíta Satanásgui sapyʼami ojehecha hag̃ua oñemoĩtapa Jehová Goviérno ykére umi tapichakuéra oĩva. Ko pruéva og̃uahẽ vove huʼãme, Ñandejára ohundíta Satanáspe ha umi hendive oĩvape (Apocalipsis [Revelación] 20:7-10). Umi omombaʼéva pe derécho oguerekóva Jehová ogoverna hag̃ua, ohechaukátama nomboykemoʼãiha chupe arakaʼeve. Upéicha ikatúta oĩ porã hikuái Jehová ndive; Ñandejára oguerekóta chupekuéra itaʼýra ha itajýraramo ha omeʼẽta chupekuéra jeikove opaʼỹva (Romanos 8:21).
17 Upéicha, pe tembiapo oñemeʼẽvaʼekue Jesús ha umi 144.000-pe og̃uahẽtama huʼãme. Mbaʼépa ojapóta hikuái upe rire? La Biblia nomombeʼúi. Péro ñañemoĩramo Jehová goviérno ykére, jahecháta pe Rréino oĩtava mil áño og̃uahẽ vove huʼãme. Ha jaikuaáta avei mbaʼépa Jehová ojapoukáta chupekuéra ha avei ojapótava ko múndo tuichaitégui. Péro, mbaʼérepa ojeʼe Cristo goviérno oĩtaha “opa árape g̃uarã” ha Irréino ‘noñehundimoʼãiha arakaʼeve’? (Daniel 7:14.) Ñañepyrũ hag̃ua, igoviérno ndohasamoʼãi avave mbaʼe vai ojaposévape, Jehová voi ogovernátagui. Avei, pe goviérno ‘noñehundimoʼãi arakaʼeve’ ojapótagui heta mbaʼe opytátava opa ára g̃uarã (Daniel 2:44). Upéicha avei, Crístope, haʼéva Rréi ha Saserdóte, ha umi rréi ha saserdóte hendive oĩtavape, oñemombaʼéta opa árare oservi porã haguére Jehovápe.
Ñanemanduʼa hag̃ua
• Mbaʼérepa Ñandejára Rréino añoite ikatu omyatyrõ umi provléma oĩva ko múndope? Arakaʼépa oñepyrũ oisãmbyhy pe Rréi Ñandejára Rreinopegua?
• Mbaʼépa nde remombaʼeve pe Rréinogui ha umi mbaʼe ojapótavagui?
• Mbaʼe mbaʼépa ojapóma koʼág̃a pe Rréino, ha mbaʼépa ñande jajapovaʼerã?
17. a) Mbaʼépa oikóta pe Rréinogui opa rire pe mil áño? b) Mbaʼérepa ikatu ojeʼe pe Rréino ‘noñehundimoʼãiha arakaʼeve’?
[Nóta oĩva taʼanga ndive páhina 92 ha 93]
Ñandejára Rréino poguýpe enterove oñehekomboʼéta hustísiape