Lección 3

Mávapa Jesucristo?

Mbaʼérepa Jesúspe oñehenói Ñandejára raʼy “ypykue”? (1)

Mbaʼérepa oñehenói chupe “pe Ñeʼẽ”? (1)

Mbaʼérepa ouvaʼekue Jesús ko Yvy ári kuimbaʼéicha? (2-4)

Mbaʼérepa ojapo heta milagro? (5)

Mbaʼépa ojapóta Jesús koʼẽrõite? (6)

1. Ou mboyve ko Yvy ári Jesús haʼevaʼekue peteĩ persona espiritual oikóva yvágape. Chupe raẽ ojapovaʼekue Ñandejára; upévare oñehenói chupe Ñandejára Raʼy “ypykue”. (Colosenses 1:15; Revelación 3:14.) Jesús añoite haʼe Taʼýra Ñandejára ojapovaʼekue oiporuʼỹre avavépe. Jehová oiporu Jesúspe ou mboyve ko Yvy ári “ipytyvõha ramo”, ojapo hag̃ua opa mbaʼe oĩva yvága ha Yvýpe (Proverbios 8:22-31; Colosenses 1:16, 17.) Ñandejára avei oiporu chupe oñeʼẽ hag̃ua hérape. Upévare Jesúspe oñehenói “pe Ñeʼẽ”. (Juan 1:1-3; Revelación 19:13.)

2. Ñandejára ombou Itaʼýra ko Yvýpe oguerovávo hekove María retepýpe. Upéicha rupi Jesús ndoguerekói peteĩ túva haʼéva yvypóra; upévare ndoguerúi ijehe pecado ha imperfección. Ñandejára ombou Jesús ko Yvy ári mbohapy mbaʼére: 1) Ñanemboʼe hag̃ua añetegua Ñandejáragui (Juan 18:37), 2) ojapopaite hag̃ua Ñandejára oipotáva ha omoĩ upéicha peteĩ modelo jaguata hag̃ua (1 Pedro 2:21) ha 3) omeʼẽ hag̃ua hekove ñande rehehápe ha ñandepeʼa upéicha pecado ha ñemanógui. Mbaʼérepa oñekotevẽraʼe haʼe omano? (Mateo 20:28.)

3. Omboykévo Ñandejára ñeʼẽ, ñande ypykue, Adán, ojapo pe Biblia ombohérava “pecado”. Upévare Ñandejára heʼi chupe omanovaʼerãha. (Génesis 3:17- 19.) Ndoikovéima haguére Ñandejára oipotaháicha, ojei chugui perfección oguerekovaʼekue. Mbeguekatúpe ituja ohóvo, ha upéi omano. Adán ombohasa pecado opavave itaʼyrakuérare. Upévare ñande avei ñande tuja, ñande rasy ha ñamano. Mbaʼéichapa ikatútaraʼe ojesalva yvyporakuérape? (Romanos 3:23; 5:12.)

4. Jesús iperfectovaʼekue, Adán iperfectohaguéicha. Jesús katu iñeʼẽrendu Ñandejárape ijetuʼuvehápe jepe, ndojoguái Adánpe. Upéicha rupi ikatu omeʼẽ hekove perfecto opaga hag̃ua Adán pecádore. La Biblia ohenói upévape “rescate”. Ha upéicha Adán raʼykuéra ikatúta ojehekýi ñemanógui. Opavave omoĩva fe Jesucrístore ikatu oguereko perdón hembiapo vaíre ha ohupyty jeikove opaʼỹva. (1 Timoteo 2:5, 6; Juan 3:16; Romanos 5:18, 19.)

5. Oĩrõ guare ko Yvy ári, Jesús omonguera umi hasýva, omongaru ivareʼávape ha ojoko ára pochy. Omanoʼakue jepe omoingove. Mbaʼérepa ojapo ã milagro? 1) Oiporiahuverekógui umi ohasa asývape ha oipytyvõségui chupekuéra. 2) Ã milagro ojapovaʼekue ohechauka haʼeha Ñandejára Raʼy. 3) Ohechauka ojapótava umi yvypóra ineʼẽrendúvare ogoberna vove ko Yvy ári. (Mateo 14:14; Marcos 2:10-12; Juan 5:28, 29.)

6. Omanóvo Jesús, Ñandejára omoingove jey chupe, oiko chugui peteĩ tekove espiritual, ha oho jey yvágape

(1 Pedro 3:18.) Upe rire Ñandejára ojapo chugui Rey. Koʼẽrõite Jesús oipeʼapáta opaichagua mbaʼe vai ha sufrimiento oĩva ko Yvy ári. (Salmo 37:9-11; Proverbios 2:21, 22.)

[Nóta oĩva taʼanga ndive páhina 7]

Ombaʼapórõ guare ko Yvy ári, Jesús oporomboʼe, ojapo milagro ha omeʼẽ hekove ñanderehe