¿Mávapa hína Jesucristo?

1. ¿Moõguipa ou Jesús?

Ñandejára ojapo vaʼekue Jesúspe raẽvete. Jesús idiferénte umi ótro umánogui pórke onase mboyve ko yvy ape ári haʼe vaʼekue peteĩ ánhel oikóva yvágape (Juan 8:23). Jehová añoite okrea vaʼekue chupe, upévare oñehenói Jesúspe Ñandejára Raʼy “peteĩetéva”. Haʼe oñeʼẽ vaʼekue Ñandejára rérape, upévare oñehenói avei chupe “pe Ñeʼẽ” (Juan 1:14). Jesús oipytyvõ vaʼekue Itúape okrea hag̃ua entéro umi ótra kósa.​—Elee Proverbios 8:22, 23, 30 ha Colosenses 1:15, 16.

2. ¿Maʼerãpa ou vaʼekue Jesús ko yvy ape ári?

Ñandejára ombou vaʼekue Itaʼýrape ko yvy ape ári, upearã oguerova Itaʼýra rekove peteĩ vírhen judía retepýpe, hérava María. Upévare Jesús ndorekói peteĩ túa umáno (Lucas 1:30-35). Jesús ou vaʼekue ko yvy ape ári ojapo hag̃ua koʼã mbaʼe: 1) omboʼe hag̃ua pe añetegua Ñandejáragui, 2) omoĩ hag̃ua peteĩ ehémplo ohechaukáva mbaʼéichapa jajapo vaʼerã Ñandejára oipotáva, ijetuʼúramo jepe sapyʼánte, ha 3) omeʼẽ hag̃ua hekove perfékto ñanderehehápe ha péicha opaga pe “rreskáte”.​—Elee Mateo 20:28.

3. ¿Mbaʼérepa ñaikotevẽ ojepaga peteĩ rreskáte?

Peteĩ rreskáte ningo pe présio ojepagáva ojesalva hag̃ua peteĩ persónape, ani hag̃ua omano (Éxodo 21:29, 30). Ñandejára ndoipotái vaʼekue yvyporakuéra ijeda ha upéi omano. ¿Mbaʼéichapa jaikuaa upéva? Ñandejára heʼi vaʼekue pe primer kuimbaʼe, Adánpe, opekárõ omanotaha. Upéicharõ, Adán ndopekáirire haʼe núnka nomanomoʼãi kuri (Génesis 2:16, 17; 5:5). La Biblia ohechauka pe ñemano “oike” hague ko múndope Adán rupive. Upéi Adán ombohasa entéro ifamiliarépe pe pekádo ha upéicha rupi entéro omano. Upévare ñaikotevẽ peteĩ rreskáte jajesalva hag̃ua pe ñemano oúvagui Adán káusare.​—Elee Romanos 5:12 ha 6:23.

¿Mávapa ikatu opaga ñandesalva hag̃ua ñemanógui? Ñamano vove japaga ñande pekádore. Ni peteĩ persóna ndaikatúi opaga hapicha pekádore.​—Elee Salmo 49:7-9.

4. ¿Mbaʼérepa omano Jesús?

Jesús ningo perfékto vaʼekue, ndahaʼéi ñandéicha. Haʼe núnka ndopekái, upévare natekotevẽi omano opaga hag̃ua ipekádore. Upéva rangue Jesús omano ñande pekádore. Ñandejára ohechauka mbaʼeichaitépa ñanderayhu omboúvo Itaʼýrape omano hag̃ua ñanderehehápe. Jesús avei ohechauka ñanderayhuha iñeʼẽrendúvo Itúape ha omanóvo ñande pekádore.​—Elee Juan 3:16 ha Romanos 5:18, 19.

Ehecha pe vidéo ¿Mbaʼérepa omano Jesús?

5. ¿Mbaʼépa ojapo Jesús koʼág̃a?

Jesús oĩrõ guare ko yvy ape ári omonguera vaʼekue umi hasývape, omoingove jey umi omano vaʼekuépe ha oipytyvõ umi hénte osufrívape. Péicha ohechauka mbaʼépa ojapóta amo gotyove umi hénte iñeʼẽrendúva rehehápe (Mateo 15:30, 31; Juan 5:28). Jesús omano rire Ñandejára omoingove jey chupe peteĩ ánhel poderósoicha (1 Pedro 3:18). Upéi Jesús ohaʼarõ vaʼekue Ñandejára deréchape Jehová omeʼẽ peve chupe podér ogoverna hag̃ua ko yvy tuichakuére (Hebreos 10:12, 13). Koʼág̃a Jesús haʼéma peteĩ rréi ha ogoverna yvágape, ha isegidorkuéra omombeʼu upe notísia porã ko yvy tuichakuére.​—Elee Daniel 7:13, 14 ha Mateo 24:14.

Koʼẽrõitéma Jesús oipurúta ipodér oipeʼa hag̃ua pe sufrimiénto ha ohundi hag̃ua entéro umi ombosufrívape ótrope. Umi ojeroviáva Jesúsre ha iñeʼẽrendúva chupe oikóta vyʼápe peteĩ paraísope ko yvy ape ári.​—Elee Salmo 37:9-11.