Lección 10

Umi mbaʼe Ñandejára ohayhuʼỹva

Mbaʼéichapa rehechavaʼerã umi mbaʼe Ñandejára heʼíva naiporãiha? (1)

Mbaʼeichagua conducta sexuálpa naiporãi? (2)

Mbaʼéichapa ohechavaʼerã cristianokuéra pe japu? (3) Ha juego ojejapóva virúre? (3) Ha ñemonda? (3) Ha pe violencia oiporúva? (4) Ha espiritismo? (5) Ha kaʼu? (6)

Mbaʼéichapa ikatu oñesẽ ã mbaʼe vaígui? (7)

1. Ñandejárape oservíva ohayhu umi mbaʼe iporãva, upéicha avei ndaijaʼéi mbaʼe vaíre. (Salmo 97:10.) Upéva heʼise omboykevaʼerãha umi mbaʼe naiporãiva Ñandejárape. Mbaʼe mbaʼépa oĩ umíva apytépe?

2. Fornicación: Kuña ha kuimbaʼe oguerekóva sexo oñondive omenda mboyve, ñemoakãratĩ omendáva apytépe, mymbándi oikóva, oñenóva itajýrandi térã oimeraẽ hogayguándi ha kuimbaʼe oñenóva kuimbaʼéndi térã kuña oñenóva kuñándi, umíva haʼe tuicha pecado Ñandejára rovake. (Levítico 18:6; Romanos 1:26, 27; 1 Corintios 6:9, 10.) Kuimbaʼe ha kuña oikórõ oñondive omendaʼỹre, tekotevẽ ojueja, ỹramo, omendavaʼerã ley heʼiháicha. (Hebreos 13:4.)

3. Japu, juego ojejapóva virúre, ñemonda: Ñandejára Jehová ndaikatúi ijapu. (Tito 1:2.) Upévare umi oiko porãséva hendive ndaijapuivaʼerã. (Proverbios 6:16-19; Colosenses 3:9, 10.) Opaichagua juego ojejapóva virúre omongakuaa taryrýi pirapirére. Upévare cristianokuéra nohaʼãi lotería, bingo, kavaju ñani ha mbaʼeve oĩva umichagua. (Efesios 5:3-5.) Naimondái ha ndojoguái mbaʼeve oñemondavaʼekue, ha ndoguerahái hógape imbaʼeʼỹva. (Éxodo 20:15; Efesios 4:28.)

4. Pochy ndojejokóiva, violencia: Pochy ndojejokóirõ ikatu ogueru violencia. (Génesis 4:5-8.) Pe violencia oiporúva ndaikatúi oiko porã Ñandejárandi. (Salmo 11:5; Proverbios 22:24, 25.) Naiporãi ñañevenga umi mbaʼe vai ojejapórõ ñande rehe. (Proverbios 24:29; Romanos 12:17-21.)

5. Paje ha espiritismo: Oĩ tapicha ohenóiva espiritukuérape oipytyvõ hag̃ua chupekuéra mbaʼasy ñemonguerápe. Oĩ katu oiporúva paje ohayhuʼỹvare ombohasy térã ojuka hag̃ua. Koʼã mbaʼe rapykuéri oĩ Satanás. Upévare cristianokuéra ndojapoivaʼerã mbaʼeve ãichagua. (Deuteronomio 18:9-13.) Ñañemoĩrõ Jehová ykére jaguerekóta protección iporãvéva ñepohano vai térã pajégui (Proverbios 18:10.)

6. Kaʼu: Pe vino, cerveza térã ambue bebida ndaivaíri jaʼu michĩmi. (Salmo 104:15; 1 Timoteo 5:23.) Pero Ñandejára ndohechaporãi ojeʼu rasa térã ojekaʼúrõ. (1 Corintios 5:11-13; 1 Timoteo 3:8.) Reʼuetereírõ bebida ikatu nembohasy ha ombyaipa ne familia. Avei, ikatu nemokangy ha reñemeʼẽ rei heta mbaʼe vaípe. (Proverbios 23:20, 21, 29-35.)

7. Tapichakuéra ojapóva umi mbaʼe Ñandejára heʼíva ivaiha “ndoike moʼãi[...] Tupã Nandeyára réinope”. (Gálatas 5:19-21, VP.) Rehayhúramo añete Ñandejárape ha rembovyʼasérõ chupe, ikatúta reheja umi mbaʼe vai. (1 Juan 5:3.) Reñehaʼãvaʼerã rehecha umi mbaʼe vai Ñandejára ohechaháicha, ha rejei chugui. (Romanos 12:9.) Rejeheʼavaʼerã umi heko porãvandi. (Proverbios 13:20.) Ñane irũnguéra cristiano iñakãguapýva ikatu tuicha ñanepytyvõ. (Santiago 5:14.) Ha hiʼariete, ikatúta reguereko Ñandejára pytyvõ rejerurérõ chupe ñemboʼépe. (Filipenses 4:6, 7, 13.)

[Nóta oĩva taʼanga ndive páhina 20]

Ñandejára ndohayhúi jekaʼu, ñemonda, juego ojejapóva virúre ha violencia