Lección 14

Mbaʼéichapa oñeorganiza testigos de Jehová

Arakaʼépa oñepyrũ testigos de Jehová historia ag̃agua? (1)

Mbaʼéichapa ojejapo umi reunión oguerekóva testigos de Jehová? (2)

Mbaʼéichapa ojepaga umi gasto ojeguerekóva? (3)

Mávapa omotenonde congregacionkuéra? (4)

Mbaʼe reunión tuichavévapa ojejapo cada año? (5)

Mbaʼépa ojejapo umi oficina central ha sucursal oĩha rupi? (6)

1. Testigos de Jehová historia ag̃agua oñepyrũ 1870 riremi. Iñepyrũme oñehenoivaʼekue Estudiantes de la Biblia, ha 1931 guive oiporu téra oĩva Bíbliape, testigos de Jehová. (Isaías 43:10.) Peteĩ ñepyrũ pokãmígui, pe organización okakuaa ohupyty peve heta millón opredicáva Ñandejáragui 230 tetã rupi.

2. Testigo de Jehová congregacionkuéra ijaty jepi tres veces cada semana. Nde avei ikatu reho umi reunionhápe. (Hebreos 10:24, 25.) Enseñanza oñemeʼẽva upépe oñeguenohẽ Bíbliagui. Oñepyrũ ha opa umi reunionkuéra peteĩ oraciónpe, ha upépe   opurahéi   jepi  hikuái  “purahéi  Ñandejára rehegua” isincérova. (Efesios 5:18, 19, NM.) Upépe ikatu oike oimeraẽva ha ndojejapói colecta. (Mateo 10:8.)

3. Opavavenunga congregacionkuéra oguereko reunión Salón del Réinope. Umi Salón del Reino haʼe jepi peteĩ construcción isencíllova Testigokuéra voi omopuʼãva ojehepymeʼẽʼỹre hembiapóre. Upépe nderehechamoʼãi taʼanga, kurusu ni mbaʼeve umichagua. Umi gasto ojeguerekóva ojepaga voluntariamente. Omeʼẽséva viru omoĩkuaa peteĩ caja de contribuciónpe. (2 Corintios 9:7.)

4. Oĩháme congregación oĩ avei ancianos, térã superintendentes, omotenondéva enseñanza oñemeʼẽva upépe. (1 Timoteo 3:1-7; 5:17.) Chupekuéra oipytyvõ umi siervos ministeriales. (1 Timoteo 3:8-10, 12, 13.)  Haʼekuéra noñemombaʼeguasúi congregación ári. (2 Corintios 1:24.) Noñemeʼẽi chupekuéra mbaʼeveichagua título. (Mateo 23:8-10.) Haʼekuéra oñemonde hapichakuéra oñemondeháichante avei. Noñemeʼẽi avei chupekuéra viru hembiapóre. Ancianokuéra oñangareko kyreʼỹme pe necesidad espiritual oguerekóva congregacionkuéra. Omeʼẽ hikuái consuelo ha dirección oĩ jave problema. (Santiago 5:14-16; 1 Pedro 5:2, 3.)

5. Testigos de Jehová oguereko avei cada año heta asamblea tuicháva. Umi asambléape ijaty heta congregacionkuéra ohendu hag̃ua peteĩ programa especial oñerenohẽva Bíbliagui. Umi asamblea jave ojebautiza avei temimboʼekuéra pyahu. (Mateo 3:13-17; 28:19, 20.)

6. Central oguerekóva testigos de Jehová oĩ Nueva Yórkpe. Upépe oĩ Cuerpo Gobernante, kóva haʼe peteĩ grupo de ancianos oisambyhýva heta árama congregacionkuéra oparupigua. Avei, ko Yvy jerére oĩ cien rasami sucursalkuéra. Umi voluntario ombaʼapóva upe rupi oipytyvõ ojejapo ha oñemondo hag̃ua kuatiañeʼẽ Biblia rehegua. Upégui avei oñeorganiza predicación ojejapóva opárupi. Mbaʼérepa nereg̃uahẽmíri reikuaa hag̃ua peteĩ sucursal hiʼag̃uivéva nde rógagui?