Mbaʼéichapa ikatu jatopa religión añetegua

Jaikosérõ Ñandejára amigo ramo, jaguatavaʼerã religión Ñandejára oipotávare. Jesús heʼi “umi omombaʼe guasúva” Ñandejárape omeʼẽvaʼerã chupe adoración “añetehápe” (Juan 4:23, 24). Peteĩ tape porãnte oĩ ñameʼẽ hag̃ua adoración Ñandejárape (Efesios 4:4-6). Religión añetegua oporogueraha jeikove opaʼỹvape, ha religión falsa katu oporogueraha ñehundípe (Mateo 7:13, 14).

Ikatu jaikuaa mávapa religión añetegua ñamañárõ umi tapichakuéra ojapóvare. Jehová ibuenoháicha, umi adorador añeteguáva ibuéno vaʼerã avei. Peteĩ naranja máta hesãiva hiʼa porãháicha, upéicha avei religión añetegua ojapo tapicha hekopotĩva (Mateo 7:15-20).

Jehová amigokuéra omombaʼeguasu Biblia heʼíva. Oikuaa Biblia ouha Ñandejáragui. Upévare, oiporu pe heʼíva oñesambyhy hag̃ua hese, omyatyrõ hag̃ua umi problema oguerekóva ha oipytyvõ avei chupekuéra oikuaa porãve hag̃ua Ñandejárape (2 Timoteo 3:16). Avei, oñehaʼã ojapo pe haʼekuéra opredicáva.

Jehová amigokuéra ojoayhu oñondive. Jesús ohechaukavaʼekue ohayhuha tapichápe omboʼévo chupekuéra Ñandejáragui ha omonguerávo umi hasývape. Umi oguatáva religión añeteguáre ohayhu avei hapichakuérape. Jesús ojapohaguéicha, haʼekuéra nomboykéi imboriahúvape térã umi ndahaʼéivape irráza rehegua. Jesús heʼivaʼekue ojekuaavaʼerãha mávapa haʼe hemimboʼekuéra oguerekógui mborayhu ojuehe (Juan 13:35).

Ñandejára amigokuéra omombaʼeguasu héra: Jehová. Oimérõ peteĩ ndoiporuséiva ñande réra, jarekónepa chupe ñane amigoite ramo? Nahániri. Jaguereko vove peteĩ amigo, ñahenói héra rupi ha ñañeʼẽ porã hese ambuekuérape. Upévare, oikoséva Ñandejára amigo ramo oiporuvaʼerã héra ha oñeʼẽ chugui ambue tapichakuérape. Jehová oipota jajapo upéicha (Mateo 6:9; Romanos 10:13, 14).

Jesús ojapohaguéicha, Ñandejára amigokuéra omboʼe hapichápe Ñandejára Réinogui. Ñandejára Reino haʼe pe gobierno yvagapegua ojapótava ko Yvýgui peteĩ paraíso. Ñandejára amigokuéra oikuaauka hapichápe koʼã noticia porã Ñandejára Reino rehegua (Mateo 24:14).

Testigos de Jehová oñehaʼã oiko Ñandejára amigo ramo. Omombaʼeguasu la Biblia ha oiko joayhúpe. Avei oiporu ha omombaʼeguasu Ñandejára réra ha omboʼe hapichakuérape Ñandejára Reino rehegua. Testigos de Jehová opractica koʼág̃a pe religión añetegua oĩva ko Yvy ape ári.