LEKSIÓN 10
¿Mbaʼéichapa reikuaáta mávapa pe rrelihión verdadéra?
1. ¿Oĩ piko peteĩ rrelihión verdadéra añoite?
“Peñangarekóke pendejehe, cháke oĩta proféta japu” (MATEO 7:15).
Jesús omboʼe idisipulokuérape oĩha sólamente peteĩ rrelihión verdadéra. Upéva haʼete peteĩ tape oporogueraháva jeikove opaveʼỹvape. Jesús heʼi vaʼekue: “Saʼi umi ojuhúva upe tape” (Mateo 7:14). Ñandejára oasepta pe adorasión ojejapóva la Biblia heʼiháicha añoite. Enterove oadoráva Ñandejárape haʼe oipotaháicha oiko peteĩ ñeʼẽme, pórke orresivi la mísma enseñánsa ha opensa lájape oĩ unído avei.—Elee Juan 4:23, 24; 14:6 ha Efesios 4:4, 5.
Ehecha pe vidéo ¿Oguerohorýpa Ñandejára entéro rrelihión?
2. ¿Mbaʼépa heʼi vaʼekue Jesús umi kristiáno guaʼúre?
“Haʼekuéra heʼi enterove renondépe oikuaaha Ñandejárape, péro umi mbaʼe ojapóva rupive omotĩ chupe” (TITO 1:16).
Jesús heʼi vaʼekue oĩtaha proféta japu omoingéva enseñánsa fálsa umi kristiáno apytépe. Haʼekuéra heʼíta ijehe haʼeha kristiáno ha haʼetéta voi pe rrelihión verdadéra. Péro nde ikatúta repilla mávapa pe rrelihión verdadéra, ¿mbaʼéichapa? Pe rrelihión verdadérape añoite oĩ umi kristiáno ohechaukáva umi mbaʼe porã oiko lájape.—Elee Mateo 7:13-23.
3. ¿Mbaʼéicha ikatu reikuaa mávapa umi kristiáno verdadéro?
Jahechami 5 mbaʼe nepytyvõtava:
Orrespeta la Biblia pórke oguerovia haʼeha Ñandejára Ñeʼẽ. Umi kristiáno verdadéro ojesegi rangue hapicha umáno heʼívare, oñehaʼãmbaite osegi umi konsého oĩva la Bíbliape (Mateo 15:7-9). Umi kristiáno verdadéro ndahaʼéi opredikánteva umi mbaʼe oĩva la Bíbliape, síno ojapo avei umi mbaʼe omboʼéva hikuái.—Elee Juan 17:17 ha 2 Timoteo 3:16, 17.
Umi kristiáno verdadéro omombaʼe Ñandejára réra Jehová. Jesús ojapo vaʼekue upéva oikuaaukávo umi héntepe Ñandejára réra. Haʼe oipytyvõ umi héntepe oikuaa hag̃ua Ñandejárape, avei omboʼe chupekuéra ojerure hag̃ua toñembotuicha Jehová réra (Mateo 6:9). Pe lugár nde reikohápe, ¿mbaʼe rrelihiónpa oikuaauka Ñandejára réra?—Elee Juan 17:26 ha Romanos 10:13, 14.
Umi kristiáno verdadéro oñeʼẽ Ñandejára Rréinore. Ñandejára ombou vaʼekue Jesúspe opredika hag̃ua umi notísia porã oñeʼẽva Ñandejára Rréinore. Upe Rréino añoite omeʼẽ ñandéve esperánsa. Jesús oñeʼẽ upe Rréinore omano meve (Lucas 4:43; 8:1; 23:42, 43). Ha heʼi avei idisipulokuéra oñeʼẽ vaʼerãha upe Rréinore. ¿Mbaʼe rrelihionguápa hína umi oñeʼẽ meméva upe Rréinore?—Elee Mateo 24:14.
Jesús segidorkuéra ndojeheʼái ko múndore. Nde ikatu repilla mávapa umi kristiáno verdadéro pórke haʼekuéra ndoikéi polítikape ni ndoapojái umi protésta ojejapóva (Juan 17:16; 18:36). Avei haʼekuéra ndojapói umi mbaʼe vai ojapóva umi hénte aña oĩva ko múndope ha nopensái haʼekuéraicha.—Elee Santiago 4:4.
Umi kristiáno verdadéro ojoayhu. Haʼekuéra oaprende la Biblia rupive orrespeta vaʼerãha enterove persónape, tahaʼe haʼéva itrívu térã ipaís. Umi rrelihión fálsa pyʼỹinte oapoja umi gérra, péro umi kristiáno verdadéro ndojapoiete upéva (Miqueas 4:1-3). Upéva rangue, haʼekuéra oipuru itiémpo ha umi mbaʼe orekóva oipytyvõ ha omokyreʼỹ hag̃ua hapichakuérape.—Elee Juan 13:34, 35 ha 1 Juan 4:20.
4. ¿Reikuaámapa mávapa pe rrelihión verdadéra?
¿Mbaʼe rrelihiónpa omboʼe la Biblia heʼíva, omombaʼe Ñandejára réra ha heʼi Ñandejára Rréino añoite omeʼẽha ñandéve esperánsa? ¿Mbaʼe rrelihionpeguápa ojoayhu ha ndohói gerrahápe? ¿Mbaʼépa nde repensa?—Elee 1 Juan 3:10-12.