Erresalta mbaʼépepa ideprovécho pe informasión

JAPREDIKA jave térã jajapo jave peteĩ párte kongregasiónpe, ikatu ñandegustaiterei pe informasión, péro péva ndeʼiséi ogustataha umi ñanerendúvape. Iñimportánteramo jepe umi mbaʼe jaʼéva, umi hénte ndohecháiramo ideprovechotaha chupekuéra, pyaʼeterei ojedistraéta.

Umi ermánope katuete igustovéta la nde diskúrso reiporúramo peteĩ ehémplo térã peteĩ experiénsia. Koʼýte reñeʼẽtaramo peteĩ téma ikonosídovare, rehecha vaʼerã mbaʼépa ikatu ere iñinteresanteve hag̃ua pe informasión. Reipytyvõ vaʼerã umi nerendúvape ohechakuaa hag̃ua mbaʼérepa iñimportánte chupe g̃uarã pe eréva. Nderejapóiramo péicha sapyʼaiténte oñekonsentráta hikuái, ha upéi katu oñepyrũtama opensa ótra kósare.

Iporã siémpre ñapensa mbaʼépa ou porãvéta ñande rapichápe (Prov. 3:21). Jehová ojevale vaʼekue Juan el Bautista rehe oipytyvõ hag̃ua umi héntepe “iñarandu ha ojapo hag̃ua iporãva” (Luc. 1:17). Ñanearandúta jakyhyjéramo Jehovágui ha ndajajapói mbaʼeve ombopochýtava chupe (Sal. 111:10). Pe arandu ideprovécho ñambohovái hag̃ua umi provléma, ha ñanepytyvõ jahupyty hag̃ua heta mbaʼe porã koʼág̃ama voi ha amo gotyove (1 Tim. 4:8; 6:19).

Ideprovécho hag̃ua nde diskúrso. Repreparávo nde diskúrso nerepensái vaʼerã pe informasiónre añónte, síno umi hénte nerendútavare avei. Repensa vaʼerã mbaʼeichagua persónapa oĩta pe auditóriope, ha ikatu reñekonsentra peteĩ térã mokõi grúporente, péro ani nderesarái umi ótrogui. Por ehémplo ikatu oĩ mitã, mitãrusu, karai, kuñakarai ha hénte ijedáva. Oĩta avei umi ostudia ramóva ha umi haʼéva Testígo nde renase mboyve guivéma. Ikatu oĩ ermáno ijerovia mbaretémava ha umi oñehaʼãva gueteri okambia ilája ha ojei ko múndo poguýgui. Upéicharõ, reprepara jave nde diskúrso reñeporandu vaʼerã: “Ko informasión apreparáva hína, ¿mbaʼépepa ikatu ideprovécho umi cherendútavape? ¿Mbaʼéicha ikatu amog̃uahẽ porã chupekuéra pe informasión?”.

Reñeʼẽtaramo peteĩ téma ikonosídovare, por ehémplo peteĩ enseñánsa vívlika, ¿mbaʼépa ikatu rejapo ideprovécho ha iñinteresanteve hag̃ua opavavépe? Ikatu reipytyvõ chupekuéra ojeroviave hag̃ua pe enseñánsare. Upearã rehechauka vaʼerã mbaʼe téxtopa omopyenda upéva. Ikatu avei remombeʼu mbaʼéichapa pe púnto omyesakãve umi ótra enseñánsa oĩva la Bíbliape térã mbaʼépa ñanemboʼeve Jehovágui. Reiporukuaa peteĩ ehémplo térã peteĩ experiénsia osẽva ñane puvlikasiónpe ha ohechaukáva mbaʼéichapa pe enseñánsa oipytyvõ ha omeʼẽ esperánsa umi ermánope.

Aníkena opakuévo la nde diskúrsonte rehechauka mbaʼépepa ideprovécho pe informasión. Upéva rejapo vaʼerã rehóvo reñepyrũ guive voi, upéicharõmante umi nerendúva ikatúta opensa: “Kóva ou porãiterei chéve”. Remyesakãvo rehóvo umi púnto prinsipál rehechaukáma vaʼerã mbaʼéichapa ideprovécho pe informasión. Ha remohuʼãvo nde diskúrso, ejapo jey avei upéva.

Rehechauka jave mbaʼéichapa ideprovécho pe informasión, reñeʼẽ vaʼerã mborayhúpe, ha eñehaʼã eñemoĩ umi nerendúva lugárpe (1 Ped. 3:8; 1 Juan 4:8). Upéicha ojapo vaʼekue apóstol Pablo omeʼẽrõ guare konsého ipohýiva umi ermáno Tesalonicaguápe, oñeʼẽ raẽ chupekuéra mborayhúpe ha oguerohory umi mbaʼe porãita ojapo vaʼekue hikuái. Avei ohechauka ojeroviaha haʼekuéra osegitaha umi konsého omeʼẽva (1 Tes. 4:1-12). Péicha oheja ñandéve ehémplo porã jasegi hag̃ua.

¿Mbaʼépa ikatu rejapo oiméramo remokyreʼỹse umi ermánope opredika ha ojapo hag̃ua estúdio? Tekotevẽ rehechauka chupekuéra mbaʼérepa iñimportantete upe tembiapo. Péro nemanduʼa vaʼerã káda ermáno orekoha diferénte situasión, upévare oĩta ikatúva ojapo hetave ha ótro katu saʼive (Mat. 13:23). Umi mbaʼe jaʼévare, ñane ermanokuéra nopensái vaʼerã ndojapoiha oñehaʼarõva chuguikuéra térã ndovaleiha mbaʼeverã. Upéva rangue Hebreos 10:24-pe heʼi ñandéve ‘ñañomokyreʼỹ vaʼerãha japorohayhu ha jajapo hag̃ua iporãva’. Péicha ñaporomokyreʼỹramo mborayhúpe, ñamomýita ermanokuérape ojapose hag̃ua oñehaʼarõva chuguikuéra. Ñanemanduʼa vaʼerã Jehová ndoipotaiha jaovliga ñande rapichápe oservi hag̃ua chupe, haʼe oipota umi hénte ‘iñeʼẽrendu chupe ojerovia rupi hese’ (Rom. 16:26). Upéicharõ, ñañehaʼã vaʼerã ñaipytyvõ ñane ermanokuérape ojeroviave hag̃ua Jehováre, ha péicha ñande jajeroviavéta avei.

Ehechauka porã mbaʼépepa ideprovécho. Repredika jave rehechauka vaʼerã umi héntepe mbaʼéichapa ikatu ideprovécho chupekuéra umi enseñánsa oĩva la Bíbliape. Upearã tekotevẽ reikuaa mbaʼe mbaʼépa ohasa umi hénte oĩva nde territóriope. ¿Mbaʼéichapa reikuaáta upéva? Ehendu umi notísia térã elee umi diário. Repredika jave iporãta avei rejapysakáramo hesekuéra ha ani ndénte reñeʼẽ. Péicha ikatúta repilla mbaʼe provlémapa oreko: oimépa ndaitraváhoi, opaga vaʼerãpa ijalkilér, hasykatúpa, ihentemanópa, oipyʼapýpa chupe umi mbaʼe oikóva, orrenegápa oĩ haguére heta inhustísia, oimépa oreko provléma hogapýpe, térã ijetuʼu chupe omongakuaa ifamília. Entéro koʼã mbaʼépe la Biblia tuicha oipytyvõta chupekuéra.

Resẽ mboyve repredika oiméne reiporavo mbaʼe témarepa reñeʼẽta ha mbaʼe téxtopa reiporúta. Péro pe ogajára omombeʼúramo ndéve peteĩ provléma orekóva, reñeʼẽ vaʼerã chupe upe témare, térã erekuaa pe persónape rehekataha informasión revisita jey hag̃ua chupe. Katuete pe ogajárape ointeresavéta umi konsého oipytyvõtava chupe ombohovái hag̃ua iprovléma. Ñande ningo ñaipytyvõse ñande rapichápe la Biblia rupive, péro ñañatende vaʼerã avei ani jaiko ‘ñañentremete ótro ojapóvare’ (2 Tes. 3:11).

Pe ogajára nañanerendusemoʼãi ndopilláiramo mbaʼépepa ideprovéchota chupe pe informasión. Ha jepe nañanemosẽi, upe jaʼéva ndaideprovechomoʼãi chupe. Péro jahechaukáramo mbaʼéichapa pe mensáhe oipytyvõta chupe, ikatu omomýi pe persónape ojapo hag̃ua la Biblia heʼíva.

Rejapo jave estúdio rehechauka meme vaʼerã mbaʼéichapa pe informasión ideprovéchota ne estudiántepe (Prov. 4:7). Reipytyvõ vaʼerã chupe ontende hag̃ua mbaʼéichapa umi konsého ha ehémplo oĩva la Bíbliape ideprovécho jaiko hag̃ua Jehová rapére. Haʼe ohechakuaáramo ou porãtaha chupe ojapo Jehová heʼíva, ikyreʼỹta okambia hag̃ua (Is. 48:17, 18). Eipytyvõkena ne estudiántepe ohayhu ha oñemoag̃ui hag̃ua Jehováre, ha mbeguekatúpe ijeheguiete oñepyrũta osegi umi konsého oĩva Ñandejára Ñeʼẽme.