Ejapo porã ne konklusión

OSẼ porã hag̃ua nde diskúrso tekotevẽ reinvestiga porã, reheka informasión ideprovéchova ha reiporu peteĩ introduksión igústova. Péro iñimportanteterei avei reprepara peteĩ konklusión oho porãva ne témare ha omomýitava umi nerendúvape. Ani repensa péicha péichante rejapo vaʼerãha, pórke umi hénte katuete imanduʼa porãve jepi upe ojeʼévare opakuévo peteĩ diskúrso. Nderepreparaporãiramo ne konklusión, nde diskúrso kompletoite ikatu opyta tesaráipe.

Epensamína koʼã ehémplore. Josué omano mboyve ojapo peteĩ diskúrso omombarete hag̃ua umi ansiáno Israelpegua. Haʼe imanduʼa mbaʼéichapa Abrahán tiémpo guive Jehová siémpre oñangareko isiervokuérare, ha omohuʼã hag̃ua idiskúrso Josué ndahaʼéi oñepyrũva ojapo peteĩ rresúmen umi mbaʼe heʼi vaʼekuégui. Upéva rangue, kyreʼỹme omohuʼã idiskúrso heʼívo: “Pekyhyjéke Jehovágui, ha pejapo añetehápe hembipota, aníkena pefalla hendive”. Ikatu relee upe heʼi vaʼekue Josué 24:14, 15-pe.

Ótro diskúrso igustoitereíva ha omomýiva umi héntepe okambia hag̃ua jatopa Hechos 2:14-36-pe. Upérõ apóstol Pedro oñeʼẽ heta hénte renondépe ijatýva Jerusalénpe ofesteha hag̃ua pe Pentekostés. Haʼe omyesakã upérõ oñekumpli hague proféta Joel oskrivi vaʼekue, haʼe oprofetisa vaʼekue Ñandejára omeʼẽtaha espíritu sánto isiervokuérape. Pedro omombeʼu avei mbaʼéichapa oñekumpli Jesús rehe umi profesía oĩva umi Sálmope, upépe ojeprofetisa pe Mesías oñemopuʼã jeytaha ha oguapytaha Ñandejára deréchape. Ha opakuetévo idiskúrso heʼi derechoite: “Peikuaa porãke mayma Israelguáva, ko Jesús peẽ pemosaingo vaʼekue yvyráre, Ñandejára omoĩ hague chupe ñande Ruvicha ha Crístoramo”. Ohechakuaávo siertoha koʼã mbaʼe, umi hénte oporandu: “Ore ermanokuéra, ¿mbaʼe piko rojapóta?”. Pedro heʼi chupekuéra: “Peñarrepenti ha pejevautisa peteĩteĩ Jesucristo rérape” (Hech. 2:37, 38). Upe ohendu vaʼekue opokoiterei umi héntere, upévare ojerovia Jesúsre ha upérõ ojevautisa tres mil persónarupi.

Mbaʼépa rereko vaʼerã enkuénta. Umi mbaʼe eréva ne konklusiónpe oho vaʼerã nde diskúrso témare. Ne konklusiónpe ojekuaa porã vaʼerã mbaʼépa remboʼese hína nde diskúrso rupive. Ikatu rerrepeti jey pe título oĩhaichaite térã reiporavo umi palávra orresalta porãva ne téma.

Opakuetévo nde diskúrso katuete remokyreʼỹséta umi nerendúvape osegi hag̃ua umi konsého remeʼẽ vaʼekue. Upévare ne konklusiónpe rehechauka vaʼerã mbaʼépa ojejapo vaʼerã. Rehecha rire ne téma ha umi púnto prinsipál, oime vaʼerã repilláma mbaʼérepa pe informasión iñimportánte ha mbaʼépa rehupytyse nde diskúrso rupive. Upéicharõ katuete reikuaáma mbaʼépa tekotevẽ ojapo hikuái osegi hag̃ua umi konsého, ha upéva rerresalta porã vaʼerã remohuʼãvo nde diskúrso.

Ndahaʼéi erénte vaʼerã mbaʼépa oñehaʼãrõ chuguikuéra, síno umi mbaʼe eréva omomýi vaʼerã umi nerendúvape osegi hag̃ua umi konsého. Upearã ikatu rehechauka mbaʼérepa okonvenivéta chupekuéra osegi umi konsého térã mbaʼe vendisiónpa ohupytykuaa. Reiporavo porãramo umi mbaʼe erétava ne konklusiónpe, ha reñeʼẽ nde pyʼaite guive, upéva omomýita ha opokóta umi hénte korasõre.

Nemanduʼa vaʼerã nde diskúrso opatamaha, ha upéva ojekuaa vaʼerã umi mbaʼe erévare ha avei ne tónore. Péro ani reñeʼẽ porãhágui degolpete repyta, ni reñeʼẽ mbegueterei ha apenaitéma osẽ la nde vos. Reñeʼẽ vaʼerã enterove nerendu hag̃uáicha, péro ani avei resapukái. Umi palávra ha ne tónore rehechauka vaʼerã opatamaha nde diskúrso ha ojekuaa vaʼerã nde pyʼaite guive regueroviaha upe eréva. Aníkena nderesarái rensaja porã vaʼerãha ko párte.

¿Mboýpa ipuku vaʼerã ne konklusión? Péva nodependéi ne tiémporente, síno reñatende vaʼerã avei mbaʼéichapa orreaksiona umi nerendúva. Ani rembopukueterei ha remokaneʼõmba chupekuéra. Igustove jepi pe konklusión mbyky ha isensílloramo. Péro ikatu avei remombeʼu peteĩ ehémplo mbykymi oho porãva ne témare. Ikatu rehecha mbaʼéichapa oñemohuʼã pe lívro de Eclesiastés, ha ekompara mbaʼéichapa Jesús omohuʼã pe Sermón del Mónte (Ecl. 12:13, 14; Mat. 7:24-27).

Repredika jave. Predikasiónpe koʼýte remohuʼã porã vaʼerã umi mbaʼe eréva. Umi suherénsia oĩva ko leksiónpe ideprovéchota avei ndéve repredika jave. Katuete resẽ porãta resegíramo koʼã konsého, rejeprepara porã ha reñeinteresáramo umi héntere.

Pe ogajára hembiapoitereíramo ndaikatumoʼãi reñemongeta areterei hendive. Péro ijáramo ndéve ikatu ere: “Aha mboyve akompartise nendive peteĩ mensáhe iporãitereíva: la Biblia ohechauka Ñandejára ojapotaha ko yvýgui peteĩ hardín neporãva, ha upépe jaikóta vyʼápe opa árare. Péro jahupyty hag̃ua upéva tekotevẽ jaikuaa mbaʼépa Ñandejára oipota jajapo”. Térã erekuaa chupe reju jeytaha peteĩ día opyta porãvehápe chupe.

Jepe pe ogajára ñanemosẽ térã imaledukádo ñanendive, ñanderrespetuósoramo lomímonte ikatu ñasẽ porã. Iñimportánte jareko enkuénta umi konsého oĩva koʼã téxtope: Mateo 10:12, 13 ha Romanos 12:17, 18. Ñañeʼẽramo trankílo porãnte, pe ogajára ikatu mbaʼe okambia opensa lája ha ótrope ñanderresivi porãvéma.

Péro oĩramo nerendu porãitereíva, rehokuetévo ikatu rerrepeti jey chupe pe idéa prinsipál reipotáva imanduʼa ha emokyreʼỹ chupe oaprendeve hag̃ua la Bíbliagui.

Rehechakuaáramo pe persóna oñeinteresaha pe mensáhere, ere chupe reju jeytaha peñemongetave hag̃ua pe témare. Péro iporãta rehejáramo peteĩ pregúnta rembohovái hag̃ua ótro rejúvape, ikatu reiporu peteĩ pregúnta oĩva lívro Razonamiéntope térã ótra puvlikasiónpe. Aníkena nderesarái mbaʼe rresponsavilidápa Jesús oheja ñande kárgope (Mat. 28:19, 20).

Rejapo jave estúdio vívliko remohuʼã hag̃ua rejapo vaʼerã peteĩ rrepáso upe pestudia vaʼekuégui. Ikatu rerrepeti pe téma ha ejevale umi pregúnta de rrepásore rerresalta hag̃ua umi púnto prinsipál. Reporandukuaa avei ne estudiántepe mbaʼéichapa ideprovécho chupe pe informasión, térã mávapepa omombeʼukuaa pe oaprende vaʼekue, péicha ohechakuaáta mbaʼéichapa ikatu oiporu umi mbaʼe oaprendéva (Prov. 4:7).

Upéicharõ, tahaʼe rejapo jave diskúrso térã repredika jave reprepara porã vaʼerã ne konklusión, péicha katuete umi nerendúva imanduʼa porãvéta upe ere vaʼekuére.