Eiporu hendápe porã umi porandu

JAJAPO jave peteĩ porandu umi ñanerendúva oñatende porãve pe jaʼévare. Oĩ pregúnta haʼekuéra ikatútava ombohovái ipyʼapýpente ha umi omokyreʼỹtava chupekuéra omombeʼu hag̃ua la opensáva. Rejapo jave porandu repredika jave térã nde diskúrsope, umi hénte oñeinteresavéta pe mensáhere, ikatúta rerrasona hendivekuéra térã rerresalta peteĩ púnto. Péicha remokyreʼỹta umi héntepe ojepyʼamongeta hag̃ua la erévare. Péro iñimportánte reikuaa mbaʼépa rehupytyse umi porandu rupive, péicha katuete osẽ porãta ndéve.

Reñemongeta hag̃ua umi héntendi. Repredika jave remokyreʼỹ vaʼerã umi héntepe toñemongeta nendive, ha ani nerendúnte hikuái, ¿mbaʼéichapa ikatu rejapo upéva?

Heta ermáno oñemongeta porãiterei umi héntendi oñepyrũvo ipresentasión kóicha: “¿Ndépa reñeporandúmava ko mbaʼe...?”. Reporandúramo peteĩ mbaʼe iñinteresánteva, pe ogajára nerenduséta katuete. Ha jepe pe persóna núnka noñeporandúi pe eréva chupe, ikatu hína rembokurióso chupe. Avei ikatúta reñemongeta heta témare rejapóramo koʼã porandu: “¿Mbaʼépa repensa...?”, “¿Mbaʼépa nde ere...?”, “¿Ndépa ere ikatuneha...?”.

Felipe oñepyrũ hag̃ua oñemongeta peteĩ mburuvicha Etiopiaguándi, oporandu chupe direktoite: “¿Añetehápe piko rentende upe releéva?” (Hech. 8:30). Pe pregúnta ojapo vaʼekue Felipe ombohape porãiterei ikatu hag̃uáicha oñeʼẽ chupe Jesús rehe. Heta ermáno ojevale rupi koʼãichagua porandúre oipytyvõ heta héntepe oikuaa hag̃ua la Biblia heʼíva.

Japredika jave umi hénte ikatu ñanerenduseve jahejáramo chupekuéra omombeʼu ñandéve mbaʼépa opensa. Upévare jajapysaka porã vaʼerã hesekuéra oñeʼẽ jave, ha upéi jasegi ñañeʼẽ. Heʼíramo peteĩ mbaʼe nañandegustáiva ani ñarreaksiona vai, síno siémpre ñanderory ha ñande edukádo vaʼerã, ha ijáma guive eguerohory avei ikomentário. Jesús ojapo vaʼekue upéva oñemongetárõ guare peteĩ mboʼehára leipeguándi. Jesús “ohechakuaávo upe heʼíva oĩ porãha”, oguerohory chupe heʼívo: “Namombyryiete reime Ñandejára Rréinogui” (Mar. 12:34). Jepe nereiméi de akuérdo pe ogajára heʼívandi, ikatu reagradese chupe omombeʼu haguére la opensáva. Upe heʼíva ikatu ohechauka ndéve peteĩ mbaʼe ogusta térã ndogustáiva pe persónape, ha ereko enkuénta upéva repredika aja chupe.

Remombeʼu hag̃ua peteĩ idéa iñimportánteva. Rejapo jave diskúrso térã repredika jave ikatu rejapo peteĩ porandu reñeʼẽta jave umi púnto iñimportántevare. Ani reporandu peteĩ mbaʼe ojekuaámava voi, umi pregúnta ombokurióso vaʼerã chupekuéra. Ha upe rire repausaʼimíramo, umi hénte oikuaasevéta mbaʼépa eréta upe rire.

Jesús pyʼỹinte ojapo vaʼekue porandu oporomboʼe jave. Peteĩ jey haʼe omombeʼu mbaʼéichapa Ñandejára ojevale vaʼekue Juan el Bautístare okumpli hag̃ua hembipota, ha upearã ojapo tres pregúnta. Péro omeʼẽ rangue pe rrespuésta direktoite, Jesús ojapo jey ótro porandu haʼekueraite voi ohechakuaa hag̃ua pe rrespuésta. Péicha Jesús ombohape omyesakã hag̃ua pe púnto prinsipál omboʼese vaʼekue (Mat. 11:7-14). Nde ikatu avei rejapo upéva reporomboʼe jave.

Ñamopensa hag̃ua umi ñanerendúvape. Ikatu avei jaiporu umi porandu ñamopensa hag̃ua umi ñanerendúvape. Apóstol Pablo ojapo vaʼekue upéicha. Haʼe ohechauka peteĩ ermáno oñeʼẽramo diferénte idióma espíritu sánto oipytyvõgui chupe, ojapo vaʼerãha upéva omombarete hag̃ua pe kongregasiónpe. Upearã oñemyesakã vaʼerã pe ojeʼéva, oñentende ha ideprovécho hag̃ua enterovépe. Pablo orresalta upéva heʼívo: “Koʼág̃a aháramo pene rendápe ha añeʼẽ peẽme ótro idiómape, ¿mbaʼéicha piko upéva penepytyvõta? Poipytyvõséramo, amombeʼu vaʼerã peẽme umi mbaʼe Ñandejára oikuaaukáva chéve, umi mbaʼe iñeʼẽme heʼíva, peteĩ profesía térã umi mbaʼe Ñandejára chemboʼe vaʼekue”. Upe rire heʼive: “Peẽ peiporúramo ñeʼẽ hasýva oñentende hag̃ua, ¿mbaʼéicha piko oñentendéta la pejéva? Añetehápe peñeʼẽta hína yvytúpe” (1 Cor. 14:4-12). Péicha oikekuaa rupi, apóstol Pablo katuete oipytyvõne raʼe umi coríntiope ojepyʼamongeta hag̃ua.

Oĩ avei ermáno ojapo jave idiskúrso haʼete voi oñemongetáva umi héntendi, ¿mbaʼérepa? Umi pregúnta rupive omokyreʼỹ umi ohendúvape chupe ojepyʼamongeta ha ombohovái hag̃ua umi porandu ipyʼapýpe.

Rejapo jave estúdio tekotevẽ avei rejapo porandu ne estudiántepe. Péro saʼieterei oaprendéta oleénteramo pe rrespuésta oĩva pe párrafope. ¿Mbaʼéichapa reipytyvõ porãvéta chupe? Rekalkula vaʼerã mbaʼépa ikatu reporanduve ikatu hag̃uáicha og̃uahẽ porãve chupe pe informasión. Emokyreʼỹ chupe tomopyenda irrespuésta la Biblia heʼívape. Avei ikatu reporandu: “¿Mbaʼéichapa ko púnto omyesakãve umi mbaʼe reikuaámava la Bíbliagui? ¿Mbaʼérepa iñimportánte ko enseñánsa? ¿Mbaʼépa upéicharõ Jehová ohaʼãrõ rejapo?”. Ideprovechovéta rejapóramo koʼãichagua porandu, ere rangue chupe mbaʼépa ojapo vaʼerã, térã remeʼẽ rangue hetaiterei detálle, ¿mbaʼérepa? Pórke reipytyvõta hína chupe oservi hag̃ua Jehovápe haʼe odesidi rupi ha ohechakuaágui upéva iporãveha (Rom. 12:1).

Péro nepasiénsia vaʼerã nontendeporãiramo peteĩ enseñánsa. Ikatu oime oñeporandu siértopa hína upe remboʼéva chupe, ha añetehápepa iporãve omboyke umi enseñánsa oñemboʼe vaʼekue chupe imitã guive. Péicha jave tekotevẽ reexplika chupe pe idéa de ótra fórma ontende porãve hag̃uáicha. Eiporu memékena la Biblia rejapo jave upéva. Ikatu remoĩ peteĩ ehémplo ha rejapo umi porandu isensíllova oipytyvõtava chupe orrasona hag̃ua.

Ne estudiánte omombeʼu hag̃ua la opensáva. Sapyʼánte jajapo jave peteĩ pregúnta umi hénte nomombeʼúi ñandéve la añetehápe opensáva, síno heʼínte upe ñahenduséva. Upévare tekotevẽ jaheka chupe ládo japilla hag̃ua mbaʼépa opensa (Prov. 20:5). Ikatu jasegi Jesús ehémplo ha ñaporandu chupe: “¿Ndépa reguerovia upéva?” (Juan 11:26).

Heta disípulo ipochy vaʼekue Jesús omboʼérõ guare peteĩ mbaʼe ijetuʼúva chupekuéra ontende hag̃ua, ha upévare osẽ oheja rei chupe. Jesús oikuaase mbaʼépa opensa ijapostolkuéra, upévare oporandu: “Peẽ ndapehoséi avei, ¿ajépa?”. Pedro omombeʼu mbaʼépa opensa enterovéva heʼívo: “Ore Ruvicha, ¿máva rendápe piko rohóta? Ne ñeʼẽ ningo omeʼẽ jeikove opaveʼỹva. Ha ore roguerovia ha roikuaa nde haʼeha Ñandejára remimbou Marangatu” (Juan 6:67-69). Ótra vuéltape Jesús oporandu jey chupekuéra: “¿Mbaʼépa heʼi umi hénte pe Yvypóra Raʼy rehe?”. Upéi ojapo jey ótro porandu oikuaa hag̃ua mbaʼépa opensa hikuái: “¿Péro peẽ mbaʼe peje, máva piko che hína?”. Pedro heʼi chupe: “Nde hína pe Cristo, Ñandejára oikovéva Raʼy” (Mat. 16:13-16).

Peñeʼẽ jave peteĩ témare ikatu avei rejapo koʼãichagua pregúnta ne estudiántepe: “¿Mbaʼépa opensa ne kompañéro de traváho (de eskuéla) ko mbaʼére?”. Upéi katu eporandu chupe: “¿Ha mbaʼépa nde repensa?”. Reikuaa rire mbaʼépa haʼe opensa, ifasilvétama ndéve reipytyvõ hag̃ua chupe.

Rerresalta hag̃ua peteĩ idéa. Ikatu avei reiporu umi porandu rerresalta hag̃ua peteĩ idéa. Upéicha ojapo vaʼekue apóstol Pablo, haʼe heʼi: “Ñandejára oĩramo ñanendive, ¿máva piko oñemoĩta ñanderehe? Haʼe, ni Itaʼýrare nahakateʼỹi vaʼekue, síno omeʼẽ enterove rehehápe, ¿ha piko mbaʼéicha pyʼaporãme nomeʼẽmoʼãi avei hendive entéro umi ótra kósa?” (Rom. 8:31, 32). Jahecha mbaʼéichapa umi porandu rupive Pablo orresalta porã upe omboʼese vaʼekue.

Ótro ehémplo jatopa Santiago 2:14-pe, ko pártepe Santiago ohechauka iñimportanteha jajerovia, péro ndahaʼéi upéva añónte, síno jahechauka vaʼerãha ñande jerovia ñane rembiapo rupive, haʼe heʼi: “Che ermanokuéra, oĩramo heʼíva ojeroviaha, péro ndojapói tembiapo iporãva, ¿mbaʼépepa ideprovécho chupe? Peichagua jerovia ndaikatumoʼãi osalva chupe, ¿ajépa?”. Ojapóvo koʼã porandu Santiago nohaʼarõi oñembohovái chupe, pórke hesakã porãitereíma la omboʼese vaʼekue.

Rehechauka hag̃ua oĩ vaiha peteĩ enseñánsa. Ikatu avei reiporu umi porandu rehechauka hag̃ua oĩ vaiha peteĩ enseñánsa térã peteĩ idéa. Por ehémplo Jesús omonguera mboyve peteĩ kuimbaʼépe oporandu umi fariséo ha umi oikuaa porãvape pe Léi: “¿Iporãpa oñemonguera umi hasývape sabadokue, térãpa nahániri?”. Upémarõ Jesús opoko pe kuimbaʼére, omonguera ha heʼi chupe oho hag̃ua. Upéi haʼe heʼi chupekuéra: “¿Mbaʼépa pejapóne pende raʼy térã pene rymba tóro hoʼáramo yvykuápe peteĩ sábado? ¿Napenohẽmoʼãipa pyaʼe porã?” (Luc. 14:1-6). Haʼekuéra okirirĩete chugui, añetehápe Jesús nohaʼarõi voi ombohovái chupe hikuái, péro umi porandu rupive ohechauka porã haʼekuéra ojavyha.

Sapyʼánte kristianokuéra apytépe jepe oĩ umi nontendeporãiva mbaʼépa ojapo vaʼerã oñepresenta jave peteĩ situasión. Yma primér síglope oĩ vaʼekue ermáno oiko vaíva oñondive, ha haʼekuérante osolusiona rangue iprovléma, oñodemanda hikuái. ¿Mbaʼépa ojapo apóstol Pablo oipytyvõ hag̃ua umi ermánope? Ojaʼo rangue chupekuéra ojevale umi porandúre ohechakuaa hag̃ua hikuái mbaʼérepa noĩporãi la ojapóva (1 Cor. 6:1-8).

Reñehaʼãramo reiporu meme umi porandu reporomboʼe jave, mbeguekatúpe reikuaátama mbaʼéicha javépa opyta porãve reiporu. Nemanduʼákena reikekuaa ha nderrespetuóso vaʼerãha, koʼýte reñeʼẽ jave umi ijedavévandi, autoridándi térã deskonosídondi. Iñimportánte reiporu umi porandu remboʼe jave nde rapichápe, péicha pe mensáhe igustove ha iñinteresantevéta umi héntepe.