Eñemoñeʼẽ hekoitépe

LA Biblia heʼi umi ansiáno ‘oiporu vaʼerãha umi ñeʼẽ porã oñemoñeʼẽvo ótrope’ (Tito 1:9). Sapyʼánte ojapo vaʼerã upéva oñepresenta jave peteĩ provléma ijetuʼúva. Haʼekuéra tekotevẽ siémpre oiporu la Biblia oñemoñeʼẽ jave. Ansianokuéra ojapo vaʼerã ko téxto heʼíva: ‘Resegi vaʼerã reñemoñeʼẽ’ (1 Tim. 4:13). Umi konsého oñemeʼẽva ko leksiónpe ideprovéchota prinsipálmente umi ansiánope ha umi ohupytysévape ko priviléhio. Péro ou porãta avei tuvakuérape okorrehi jave ifamíliape térã ñameʼẽta jave konsého ñane estudiántepe.

Mbaʼéicha javépa tekotevẽ reñemoñeʼẽ. Reikuaa hag̃ua mbaʼéicha javépa tekotevẽta reñemoñeʼẽ, iporãta rehecháramo umi konsého omeʼẽ vaʼekue ymave Ñandejára siervokuéra. Por ehémplo apóstol Pedro omokyreʼỹ umi ansiánope oñangareko porã hag̃ua Ñandejára ovechakuérare (1 Ped. 5:1, 2). Apóstol Pablo ojerure Títope: “Ere jey jey vaʼerã umi kuimbaʼe imitãvévape taiñakãguapy” (Tito 2:6). Avei heʼi umi ermánope ‘oñemoĩ hag̃ua peteĩ ñeʼẽme’ ha ani ojeheʼa umi oikóvare oporomoingo vai (1 Cor. 1:10; Rom. 16:17; Filip. 4:2). Umi ermáno Tesalonicaguápe katu oguerohory umi mbaʼe porã ojapóvare, péro omomanduʼa chupekuéra tekotevẽha osegi ojapo porãve umi mbaʼe ojeʼéva chupekuéra (1 Tes. 4:1, 10). Pedro ojerure asy iñermanokuérape: ‘Ani peñemeʼẽ pende rete rembipota vaípe’ (1 Ped. 2:11). Judas katu omokyreʼỹ umi ermánope ‘oñorairõ mbarete hag̃ua ijeroviáre’, oĩ rupi kongregasiónpe kuimbaʼe hekoañáva notĩriva hembiapo vai hag̃ua (Jud. 3, 4). Ha enterove kristiánope oñemeʼẽ ko konsého: ‘Pesegi peñomokyreʼỹ káda día. Ani peichahágui pemohatã pene korasõ pe pekádo penembotavy rupi’ (Heb. 3:13). Apóstol Pedro avei oñemoñeʼẽ umi hudíope heʼívo: “Pejei koʼã hénte añágui ani hag̃ua peñehundi” (Hech. 2:40).

Otokáramo ndéve reñemoñeʼẽ umi ermanokuérape, ¿mbaʼépa nepytyvõta rejapo porã hag̃ua upéva? ¿Mbaʼépa rejapo vaʼerã ani hag̃ua umi ermáno opensa ndearhél ha remandaseha hesekuéra?

Rejapo vaʼerã mborayhúpe. Remeʼẽ jave konsého reñeʼẽ vaʼerã mborayhúpe, pórke osino haʼetéta ndearhélva hína (Filem. 9). Añetehápe ningo sapyʼánte tekotevẽta reñeʼẽ hatãmie reipotáramo umi ermáno pyaʼe osegi peteĩ konsého, pórke apenaite reñeʼẽramo avave ndojagarramoʼãi ensério la eréva. Upéicharõ jepe siémpre reñeʼẽ vaʼerã mborayhúpe ha con sentimiénto. Upéva omomýita umi nerendúvape osegi hag̃ua umi konsého remeʼẽva. Apóstol Pablo omombeʼu mbaʼéichapa haʼe ha umi ótro ansiáno oñemoñeʼẽ vaʼekue umi ermánope. Haʼe heʼi: “Peẽ peikuaa mbaʼéichapa ore akóinte romokyreʼỹ, romombarete ha roñemoñeʼẽ káda únope, ojapoháicha peteĩ túva ifamiliakuérandi” (1 Tes. 2:11). Reñemoñeʼẽta jave umi ermánope, ojekuaa vaʼerã avei nderehe rehayhu ha rejepyʼapyha hesekuéra.

Apóstol Pablo heʼi vaʼekue: “Chéngo ndahejái mbaʼeve chejoko amombeʼu hag̃ua peẽme Ñandejára rembipota” (Hech. 20:27). Péva ndeʼiséi reikotaha rekopi umi ermanokuérare, síno reñeʼẽ vaʼerã trankílo porãnte ha etrata porã enterovépe. Ani repensa umi ermáno ipochytaha nderehe reñemoñeʼẽ haguére chupekuéra, umi ipyʼaporãva katuete oagradeséta rehechauka haguére chupekuéra mbaʼépepa tekotevẽ omehora (Sal. 141:5).

Reñemoñeʼẽ mboyve umi ermánope, iporãta reguerohorýramo umi mbaʼe porã ojapómava hikuái. Por ehémplo umi tembiapo ojapóva ojerovia rupi, térã mbaʼeichaitépa ohayhúgui Jehovápe oñehaʼã ha oaguanta heta mbaʼe ijetuʼúva, oĩramo jepe opersegíva chupekuéra (1 Tes. 1:2-8; 2 Tes. 1:3-5). Péicha rejapóramo, umi ermáno ohechakuaáta rehayhu ha rentendeha chupekuéra, ha ohendusevéta umi konsého remeʼẽtava upe rire.

Nepasiénsia vaʼerã. La Biblia heʼi ‘reñemoñeʼẽ jave nepasiénsia vaʼerãha’ (2 Tim. 4:2). ¿Mbaʼépa heʼise nepasiensiaha? Heʼise reaguanta vaʼerãha pyʼaguapýpe opa mbaʼe, oĩramo jepe ndetrata vaíva. Avei ikatu rehechauka nepasiensiaha rejeroviáramo umi nerendúva osegitaha umi konsého remeʼẽva, ha nerepensái naipohãveimaha hikuái. Rerekóramo esperánsa umi nerendúva okambiataha, ne ñeʼẽre haʼekuéra ohechakuaáta upéva ha ikyreʼỹvéta ojapo hag̃ua umi mbaʼe oñehaʼarõva chuguikuéra (Heb. 6:9).

‘Eiporu umi ñeʼẽ iporãva.’ ¿Mbaʼéichapa peteĩ ansiáno ikatúta oiporu umi ñeʼẽ iporãva oñemoñeʼẽ jave? Upearã tekotevẽ oiporu hendaitépe Ñandejára Ñeʼẽ (Tito 1:9). Ndovaléi erénte nde repensáva, upéva rangue umi konsého remeʼẽva oñemopyenda vaʼerã la Bíbliape. Iporãta avei remyesakãramo rehóvo umi mbaʼe porã jahupytýtava jasegíramo umi konsého, ha mbaʼe mbaʼépa ikatu oiko ñanderehe ñamboykéramo Ñandejára Ñeʼẽ heʼíva. Péicha katuete rekonvenséta umi nerendúvape iporãveha hína jajapo la Biblia heʼíva.

Eñehaʼãkena emyesakã porã umi ermánope mbaʼépa ojapo vaʼerã ha mbaʼéichapa, ha eiporu la Biblia emopyenda hag̃ua umi konsého. Reñeʼẽtaramo peteĩ situasiónre ikatuhápe káda uno odesidi mbaʼépa ojapóta, rehechauka porã vaʼerã moõ pevépa jareko liverta jadesidi hag̃ua ñandejehegui. Remohuʼãvo nde diskúrso, erresalta jey iñimportanteha osegi hikuái umi konsého remeʼẽva.

Eñemoñeʼẽ kyhyjeʼỹme. Ikatu hag̃uáicha remeʼẽ hendaitépe umi konsého, tekotevẽ ‘reñeʼẽ kyhyjeʼỹme’ (1 Tim. 3:13). ¿Mbaʼépa nepytyvõta upearã? “Nde voi remoĩ vaʼerã ehémplo rejapo porãvo opa mbaʼe”, upéicha reñeʼẽta kyhyjeʼỹme, pórke nde voi rejapo hína upe rejeruréva chupekuéra (Tito 2:6, 7; 1 Ped. 5:3). Péicha rejapóramo umi nerendúva ohechakuaáta nde ndereikoiha ere una kósa ha rejapo ótra kósa. Ha upéva omomýita chupekuéra osegi hag̃ua ne ehémplo, nde resegiháicha avei Cristo ehémplo (1 Cor. 11:1; Filip. 3:17).

Otokáramo ndéve reñemoñeʼẽ ermanokuérape, eñehaʼãkena ejapo hekoitépe upéva. Reñeʼẽramo mborayhúpe ha reiporu porãrõ la Biblia, tuichaiterei reipytyvõta chupekuéra (Rom. 12:8).