Néike japredika!
1. Mbaʼe iñimportántevapa heʼi Pablo jajapo hag̃ua?
1 Apóstol Pablo heʼivaʼekue: ‘Eikuaaukákena pe marandu porã kyreʼỹme’ (2 Tim. 4:2). Mbaʼérepa iñimportantete jajapo Pablo heʼivaʼekue? Ha jajapóramo ko mbaʼe, mbaʼéichapa ñanepytyvõta ñandéve ha ñande rapichakuérape?
2. Mbaʼérepa ñañehaʼãvaʼerã jatopa umi neʼĩrava ohendu pe marandu porã?
2 Ikatu jasalva ñande rapichakuérape. Oĩ gueteri hetaiterei hénte oikotevẽva ohendu pe marandu porã ojesalva hãgua (Rom. 10:13-15; 1 Tim. 4:16). Ha jaikuaaháicha umi lugár pyʼỹi ojepredikahápe jepe, jatopa gueteri hénte ipyʼaporãva. Ñatanteavaʼerã japredika diferénte óra ha día jatopa hag̃ua umi neʼĩrava ohendu pe marandu porã. Ñañehaʼãramo jajapo hekopete ko tembiapo, ñane konsiénsia ipotĩta ha ñaipytyvõta ñande rapichápe ojesalva hag̃ua (Hech. 20:26).
3. Mbaʼéichapa ikatu jaiporu porã ñane tiémpo japredika jave?
3 Yma oĩramo jepe oñemoĩ mbaretéva umi kristiáno ypykuére, haʼekuéra ‘omyenyhẽvaʼekue Jerusalén’ pe marandu porãgui (Hech. 5:28). Ha ñande, ñañehaʼãtapa avei ‘japredika opárupi ha hekoitépe’ haʼekuéra ojapo haguéicha? (Hech. 10:42.) Jaiporu porãpa ñane tiémpo japredika hag̃ua ijahápe ñandéve? Pór ehémplo ñahaʼarõ aja ñane ermanokuérape predikasiónpe, jaaprovechápa japredika hag̃ua umi ohasávape?
4. Mbaʼérepa japredika meméramo ñañatende porãvéta?
4 Ñanepytyvõ ñañatende porã hag̃ua. Koʼẽrõitéma ningo oñehundíta ko múndo aña, upévare tekotevẽ ñañatende porã ani hag̃ua ñanekangy (1 Tes. 5:1-6). Japredika meméramo umi mbaʼe porã ojapótava Ñandejára rréino, nañanemokangymoʼãi umi provléma oĩva ko múndope (Luc. 21:34-36). Avei jajesarekóramo tapiaite Jehová ára guasúre, ñanekyreʼỹvéta ñaipytyvõ hag̃ua ñande rapichakuérape ojesalva hag̃ua (2 Ped. 3:11, 12).
5. Mbaʼépa jajapóta ñamombaʼéramo ñande rapichakuéra rekove?
5 Aníkena ñamakanea japredika hag̃ua, péicha jahechauka ñamombaʼeha ñande rapichakuéra rekove Jehová ojapoháicha. Haʼe ningo ‘ndoipotái avave oñehundi; oipota guei opavave oñembyasy ha ojevy’ (2 Ped. 3:9; Eze. 33:11, ÑÑB). Upévare ñañehaʼãkena japredika ikatúva guivépe, ñamombaʼeguasu hag̃ua Jehovápe! (Sal. 109:30.)