Kapítulo 3

Ñamombaʼékena Ñandejára Ñeʼẽ

1. a) Mbaʼéichapa umi isrraelíta ymaguare ohechavaʼekue Ñandejára ojapoha pe heʼíva? b) Mbaʼérepa iñimportánte ñandéve g̃uarã upéva?

“PEẼ katu peikuaa porã pende pyʼaite guive Ñandejára omeʼẽhague peẽme opa umi mbaʼe porã haʼe heʼivaʼekue omeʼẽtaha peẽme. Ndaipóri peteĩ mbaʼe ohejavaʼekue ojapoʼỹ rehe.” (Josué 23:14-16.) Upéicha heʼivaʼekue Josué umi kuimbaʼe omoakãvape isrraelitakuérape, oike rire hikuái pe Yvy Ñandejára oprometevaʼekuépe. Oikopaitevaʼekue umi mbaʼe Jehová heʼivaʼekue chupekuéra. Koʼãva ha opa mbaʼe oĩva la Bíbliape, oñemoĩ upépe omeʼẽ hag̃ua ñandéve esperánsa (Romanos 15:4).

2. a) Mbaʼérepa ojeʼe la Biblia ouha “Ñandejára remimoĩuka rupi”? b) Mbaʼépa jajapovaʼerã jaikuaágui la Biblia ouha Ñandejáragui?

² Ojeporúramo jepe cuarenta kuimbaʼe rupi ohai hag̃ua la Biblia, Jehová hína pe Ijapohare. Heʼisépa upéva opa mbaʼe ojehaíva pype ouha chugui? Upeichaite. Upearã haʼe oiporu ijespíritu sánto, pe puʼaka tuichaitéva. Pe apóstol Pablo heʼivaʼekue: “Pe Kuatiañeʼẽ Marangatu oikopavaʼekue [...] Ñandejára remimoĩuka rupi [...], ikatu hag̃ua pe kuimbaʼe [...] Ñandejára reheguáva oĩmbaite, ojapokuaa hag̃ua opaichagua mbaʼe iporãva”. Opárupi oĩ ogueroviáva upeichaha, ha upévare oñehaʼã oiko la Biblia heʼiháicha (2 Timoteo 3:16, 17, BNP; 1 Tesalonicenses 2:13).

Ñaipytyvõ ñande rapichápe omombaʼe hag̃ua Ñandejára Ñeʼẽ

3. Mbaʼéichapa ñaipytyvõ porãvéta umi ndogueroviáivape la Biblia ouha Ñandejáragui?

³ Heta ñande rapicha ñañeʼẽvandi ndogueroviái ñandéicha la Biblia haʼeha Ñandejára Ñeʼẽ. Mbaʼéichapa ikatu ñaipytyvõ umichaguápe? Ikatu jajapo upéva ñag̃uenohẽramo la Biblia ha jalee chupekuéra. “[Ñandejára] Ñeʼẽ niko oikove ha ipuʼaka. Haimbeve oimeraẽva kyse puku haimbe jováivagui, [...] ha oipyguara ñane remiandu ha ñande pyʼapota.” (Hebreos 4:12.) Ñandejára Ñeʼẽ nomombeʼúi umi mbaʼe oikovaʼekuénte; omombeʼu avei umi oikótava ha avave ndojokomoʼãi upéva. La Biblia heʼíva opokove ñande rapicháre oimeraẽ mbaʼe ñande jaʼévagui.

4. Mbaʼe oikuaa rire la Bíbliaguipa heta oĩ oikuaasevéva chugui, ha mbaʼérepa upéva?

⁴ Heta ñande rapicha oikuaaseve la Bíbliagui ohechávo Ñandejára réra oĩha ipype. Oĩ avei umi oikuaasevéva la Bíbliagui ojehechauka rire chupekuéra mbaʼérepa jaiko ko Yvy ape ári, mbaʼérepa Ñandejára oheja oiko ivaíva, mbaʼéguipa hetaite mbaʼe oiko koʼág̃a rupi térã ikatuha jaikove opa ára g̃uarã peteĩ Yvy iporãitereívape. Oĩ tetã ojejapohápe heta mbaʼe rrelihión rérape ha omoĩva hentekuérape umi demónio poguýpe. Umi tapicha oikuaávo mbaʼépa heʼi la Biblia koʼã mbaʼére, ha mbaʼéichapa ikatu ojehekýi umívagui, ostudiase avei. Mbaʼérepa umi hénte ipyʼaporãva oguerohory koʼã mbaʼe? La Biblia añoite omyesakãgui ã mbaʼe iñimportánteva (Salmos 119:130).

5. a) Mbaʼérepa oĩ ndogueroviáiva la Biblia heʼíva? b) Mbaʼéichapa ikatu ñaipytyvõ umichaguápe?

⁵ Péro, mbaʼépa jajapóta oĩramo heʼíva ñandéve ndogueroviaiha la Bíbliape oĩva? Jahejátantepa chupe ha nañañeʼẽmoʼãi hendive? Ndajajapomoʼãi upéva ohendútaramo avei pe jaʼéva chupe. Ikatu haʼe nomombaʼéi la Biblia oimoʼãgui ouha umi rrelihión heʼíntevagui ijehe kristianoha. Koʼã rrelihión ojekuaa hova mokõiha, oikeha polítikape ha ipláta potaha. Mbaʼérepa nañaporandúi chupe oimoʼãpa avei haʼe upéicha? Ikatu oikuaaseve ohecháramo la Biblia okondenaha umichagua rrelihión, ha tuicha ojoavyha umi kristianoite ojapóva ndive (Miqueas 3:11, 12; Mateo 15:7-9; Santiago 4:4).

6. a) Mbaʼérepa nde reguerovia la Biblia ouha Ñandejáragui? b) Mbaʼépa avei ohechauka la Biblia ouha Ñandejáragui, ikatúva jaiporu ñaipytyvõ hag̃ua ñande rapichápe?

⁶ Oĩ avei umi ikatúva ñaipytyvõ jahechaukáramo chupekuéra mbaʼérepa jaikuaa la Biblia ouha Ñandejáragui. Mbaʼérepa nde reguerovia ouha Ñandejáragui? Regueroviápa la Biblia voi heʼígui upeichaha? Térãpa oguerekógui heta profesía, omombeʼu porãva mbaʼépa oikóta tenonderã, ha ohechaukáva ndouiha yvypóragui? (2 Pedro 1:20, 21.) Ikatu avei nde remombaʼe la Biblia ndojoavýigui mbaʼevetépe, ohaíramo jepe 40 kuimbaʼe rupi mil seiscientos áño aja. Térãpa remombaʼe ndojoavýigui umi sientífiko oikuaáva ndive, jepe ojehaírõ guare la Biblia ndojekuaái umi mbaʼe? Jaikuaa avei ouha Ñandejáragui pórke umi ohaivaʼekue noñomíri mbaʼeve oikovaʼekue, ha oĩramo jepe heta ohundiséva la Biblia, ndaipóri ipuʼakáva hese. Oimeraẽ mbaʼe nde remombaʼéva ikatu oipytyvõ avei nde rapichápe.a

Jalee Ñandejára Ñeʼẽ

7, 8. a) Mbaʼerãpa jarekovaʼerã Ñandejára Ñeʼẽ? b) Jaleéramo jepe la Biblia, mbaʼépa tekotevẽ avei jajapo? c) Mbaʼéichapa nde rentendevaʼekue umi mbaʼe Jehová ojapótava?

⁷ Iporã ñaipytyvõ ñande rapichápe ojerovia hag̃ua la Bíbliare, péro upearã tekotevẽ ñande voi jalee meme. Jajapopañaína upéva? Opaichagua lívro apytépe, kóva hína pe iñimportantevéva. Péro upéva ndeʼiséi iporãmaha jaleéramo ñaneaño reínte. Ñandejára Ñeʼẽ heʼi naiporãiha ñañemohaʼeño. Ani ñaimoʼã ikatuha jaikuaapa jastudiávo ñaneaño reínte. Pe kristiáno iñakãguapýva, ndostudiái haʼeño reínte, oñembyaty meme avei rreunionhápe umi kristianoitéva ndive (Proverbios 18:1; Hebreos 10:24, 25).

⁸ Oñeʼẽvo ko mbaʼére, la Biblia omombeʼu peteĩ kuimbaʼe Etiopiaygua oleehague ohóvo Isaías kuatiañeʼẽ. Upérõ peteĩ ánhel oñeʼẽ Felipe ndive ha omondo oporandu hag̃ua pe kuimbaʼépe: “Hesakã porãpa ndéve upe remoñeʼẽva rehóvo?”. Pe kuimbaʼe ohechakuaa nontendeiha, ha heʼi: “Mbaʼéicha piko hesakãta, ndaipóriramo omyesakãva chéve?”, ha ojerure oipytyvõ hag̃ua chupe. Péro Felipe nomboʼéi chupe haʼe oimoʼãvaguinte. Haʼe ndoleeivaʼekue Ñandejára Ñeʼẽ haʼeño rei, ojeheʼa meme vaʼekue Ñandejára organisasión ndive. Upévare oipytyvõ upe kuimbaʼépe oikuaa hag̃ua mbaʼépa Jehová omboʼe pe kongregasión rupive (Hechos 6:5, 6; 8:5, 26-35). Ha upéicha avei koʼág̃a, ndaipóri ontendéva haʼeño rei umi mbaʼe Jehová ojapótava. Enterove ñaikotevẽ Jehová ñanepytyvõ iñorganisasión rupive.

9. Mbaʼe prográmapa ikatu jasegi jalee hag̃ua la Biblia?

⁹ Ñantende hag̃ua la Biblia, Jehová organisasión omeʼẽ ñandéve opaichagua puvlikasión iporãitereíva. Avei omoĩ peteĩ prográma jalee hag̃ua la Biblia pe Eskuéla dél Ministério Teokrátiko rupive. Ko rreunión ojejapo opa henda rupi testigos de Jehová kongregasiónpe. Jaleéramo Ñandejára Ñeʼẽ ñanepytyvõta hetaiterei mbaʼépe (Salmo 1:1-3; 19:8, 9 [19:7, 8, NM]). Ñañehaʼãkena jalee meme la Biblia. Nañantendepáiramo jepe pe jaleéva, ñanepytyvõta jaikuaa hag̃ua heta mbaʼe oĩva ipype. Jaleéramo káda día cuatro térã cinco páhina, un áñope jaleepaitétama.

10. a) Arakaʼépa nde relee la Biblia? b) Máva mávapa iporã olee la Biblia ñanendive, ha mbaʼérepa iñimportánte jajapo meme upéva?

¹⁰ Arakaʼépa ikatu jalee la Biblia? Jaleéramo diez térã quince minúto káda día, tuicha ñanepytyvõta. Ha ndaikatúiramo jajapo upéva, ñañehaʼã káda semána jalee sapyʼaitemi jepe. Oiméramo ñamendáva, iporã jalee oñondive. Ha oiméramo ñane família oleekuaáma, ikatu avei jaleeuka chupekuéra. Jajepokuaavaʼerã jalee la Biblia káda día, pe tembiʼu jaʼuháicha. Jaikuaaháicha, peteĩ tapicha ndokaruporãiva, katuete hasy. Upéicha avei, ñamombarete hag̃ua ñande jerovia ha jahupyty pe tekove opaveʼỹva, ñaikotevẽ “opa ñeʼẽ [Ñandejára] jurúgui osẽva” rehe (Mateo 4:4).

Mbaʼérepa jaleevaʼerã?

11. Mbaʼérepa iporã jalee la Biblia?

¹¹ Mbaʼérepa iporã jalee la Biblia? Ndahaʼéi jaleepa hag̃uánte. Jalee jaikuaa porãve hag̃ua Ñandejárape, ikatu hag̃ua jahayhuve ha jaadora chupe haʼe oipotaháicha (Juan 5:39-42). Ha pe salmísta heʼihaguéicha, ñande avei jajerurevaʼerã: “[Jehová], ehechauka chéve umi nde rape, ha umíva rupi chesãmbyhy” (Salmo 25:4).

12. a) Mbaʼérepa tekotevẽ ñantende porã la Biblia, ha mbaʼéichapa ikatu jajapo upéva? b) Mbaʼéichapa ñahesaʼỹijokuaa cuatro hendáicha la Biblia? (Ikatu rehecha pe rrekuádro oĩva páhina 30-pe.) c) Jahecha hag̃ua upéva, eñehaʼãmi embohovái umi porandu. Iporã reheka umi téysto ndojekopiáiva.

¹² Jaleévo Ñandejára Ñeʼẽ jajapovaʼerã upéva ‘jaikuaa porã hag̃ua chupe’. Upevaʼỹre, ikatútapa jajapo Ñandejára heʼiháicha térã ñahekomboʼe porãnepa ñande rapichápe? (Colosenses 3:10; 2 Timoteo 2:15.) Ñantende porã hag̃ua la Biblia jajesarekovaʼerã pe jaleévare, ha oĩramo ijetuʼuha, ñañehaʼãvaʼerã jalee hesakã meve ñandéve. Upe rire, iporã avei jajepyʼamongeta pe jaleévare, ha ñapensa mbaʼe mbaʼépa ñanemboʼe. Pe páhina 30-pe jatopa ikatuha ñahesaʼỹijo cuatro hendáicha heta téysto oĩva la Bíbliape. Rehecháta upéva rembohováivo umi porandu oñemoĩva koʼág̃a.

1) Pyʼỹi jatopa pe jaleéva la Bíbliape omombeʼuha ñandéve mbaʼeichaguápa Jehová. Pór ehémplo, Salmo 139:13, 14-pe, jatopa Ñandejára ojepyʼapyha umi mitã oĩvare isy ryepýpe: “Che sy ryepýpe cheapo ñepyrũvaʼekue. Chemopirĩmba ha chembojurujái upe cherehe rejapóva. Upévare romombaʼeguasu. Ajépa tuichaite upe ne rembiapokue”. Tuichaite mbaʼe piko Jehová rembiapokue! Haʼe ojapo porãite vaʼekue ñande rete ha upéicha ohechauka mbaʼeichaitépa ñanderayhu.

Heʼiháicha Juan 14:9, 10, jaleévo Jesús ojapovaʼekue tapichakuérare, jahechañaína mbaʼépa Jehová voi ojapóta. Ñapensávo ko mbaʼére, mbaʼépa ñanemboʼe Jehovágui Lucas 5:12, 13 ha Lucas 7:11-15?

2) Ñapensami mbaʼéichapa pe téysto jaleéva omyesakã ñandéve pe mbaʼe iñimportantevéva oñemboʼéva la Bíbliape: Jehová añoite oguerekoha derécho ñanesãmbyhývo ha Héra oñemombaʼeguasuvaʼerãha. Ko mbaʼe ojapóta Ñandejára Goviérno oĩtava Jesucristo pópe.

Mbaʼéichapa Ezequiel ha Daniel oñeʼẽvaʼekue ko mbaʼére? (Ezequiel 38:21-23; Daniel 2:44; 4:14 [4:17, NM]; 7:9-14.)

Mbaʼéichapa la Biblia ohechauka porã Jesús haʼeha pe Ñemoñare [Descendencia] ojeʼevaʼekue outaha? (Gálatas 3:16.)

Mbaʼéichapa Apocalipsis (Revelación) ohechauka ñandéve Ñandejára goviérno ojapótava? (Apocalipsis [Revelación] 11:15; 12:7-10; 17:16-18; 19:11-16; 20:1-3; 21:1-5.)

3) Ñañeporandumi mbaʼéichapa ikatu jaiporu ñande rekovépe umi mbaʼe jaleéva. Pór ehémplo, jaleévo Éxodo guive Deuteronomio peve, jatopa umi isrraelíta heko vai ha opuʼãhague Ñandejárare. Koʼã mbaʼe ogueru heta mbaʼe vai chupekuéra. Upéicharõ, ñañehaʼãvaʼerã ani jajapo haʼekuéraicha ikatu hag̃ua ñambovyʼa Jehovápe. “Opa koʼã mbaʼe ojehu ñande ypykuerakuépe tembichaukarã [térã ehémploramo] ñandéve g̃uarã. Ha oñemoĩvaʼekue [Ñandejára] Ñeʼẽme ñanemomarandúvo, jaikómagui ára pahávo.” (1 Corintios 10:11.)

Mbaʼépa ñanemboʼe la Biblia jaleévo Caín ojukahague Abélpe? (Génesis 4:3-12; Hebreos 11:4; 1 Juan 3:10-15; 4:20, 21.)

Ojapovaʼerãpa avei umi kristiáno oikótava ko Yvy ape ári la Biblia ojeruréva umi kristiáno ohótavagui yvágape? (Números 15:16; Juan 10:16.)

Ñaime porãramo jepe kongregasiónpe, mbaʼérepa ñañehaʼãvaʼerã jajapo porãve la Biblia heʼíva? (2 Corintios 13:5; 1 Tesalonicenses 4:1.)

4) Jahechavaʼerã mbaʼéichapa ikatu jaiporu pe jaleéva ñaipytyvõ hag̃ua ñande rapichápe. Opavavépe oipyʼapy umi mbaʼasy, upévare ikatu jalee chupekuéra Jesús ojapovaʼekue ohechauka hag̃ua mbaʼépa ojapóta ogoverna vove Ñandejára Rréinope: “Ha heta [oĩ] umi og̃uahẽva hendápe, ogueraháva hendivekuéra umi ikarẽva, ohechaʼỹva, iñeʼẽngúva, ijypíva ha opaichagua hasývape. [...] Ha haʼe omonguera chupekuéra” (Mateo 15:30).

Mávapepa ikatu oipytyvõ oikuaávo Jairo rajýpe oñemoingove jey hague? (Lucas 8:41, 42, 49-56.)

13. Mbaʼéichapa ñanepytyvõta jalee ha jastudia meméramo la Biblia Jehová organisasión ñanemboʼeháicha?

¹³ Mbaʼeichaitépa ñanepytyvõta jaiporúramo koʼã cuatro mbaʼe jahechavaʼekue jalee vove la Biblia. Katuete, hasy jajapo upéva, péro jahupytýta heta mbaʼe porã ha ñanemombaretéta jaservi porãve hag̃ua Jehovápe. Jalee meméramo la Biblia ñañemoag̃uivéta Jehováre, ñande Ru ñanderayhuetéva, ha avei ñane ermanokuérare. Upéva ñanepytyvõta ani hag̃ua jaheja pe marandu “omeʼẽva jeikove” (Filipenses 2:16).

[Nóta]

Ñanemanduʼa hag̃ua

• Mbaʼérepa ojehaivaʼekue la Biblia ha oñeñangareko hese koʼág̃a peve?

• Mbaʼéichapa ikatu ñaipytyvõ ñande rapichápe omombaʼe hag̃ua Ñandejára Ñeʼẽ?

• Mbaʼéichapa ñanepytyvõta jalee meméramo la Biblia? Mbaʼéichapa ikatu cuatro hendáicha ñahesaʼỹijo porã pe jaleéva?

[Taʼanga ha rrekuádro oĩva páhina 30-pe]

JALEE JAVE LA BIBLIA, ÑAÑEPORANDUMI

mbaʼépa ñanemboʼe Jehovágui

mbaʼéichapa omyesakã ñandéve pe mbaʼe iñimportantevéva oñemboʼéva la Bíbliape

mbaʼéichapa ikatu jaiporu ñande rekovépe

mbaʼéichapa ikatu jaiporu ñaipytyvõ hag̃ua ñande rapichápe