Kapítulo 11

‘Jaheka raẽ Ñandejára Rréino’

1. a) Mbaʼérepa heʼi Jesús umi chupe ohendúvape omotenondevaʼerãha Ñandejára Rréino? b) Mbaʼépa enterove ñañeporanduvaʼerã?

OHASÁMA mil novecientos áño Jesús ojapohague peteĩ diskúrso Galiléape. Upérõ heʼivaʼekue umi chupe ohendúvape: “Peheka raẽ [...] Ñandejára Rréino ha pe teko marangatu haʼe oipotáva”. Péro, mbaʼérepa oñemotenondevaʼerã ko mbaʼe? Ndohasaivaʼerãpa gueteri heta tiémpo Cristo ogoverna hag̃ua? Upeichaite, péro ko Goviérno rupive Jehová ohechaukáta oguerekoha derécho ñanesãmbyhy hag̃ua, ha ojapóta pe oipotáva ko Yvýpe g̃uarã. Umi tapicha ohechakuaáva ko mbaʼe omotenondevaʼerã Ñandejára Rréino hekovépe. Ha oimérire upéicha pe síglo primérope, katuete koʼág̃a iñimportanteve Cristo oñepyrũmagui ogoverna. Upévare, enterove ñañeporanduvaʼerã: “Ojehechápa cherehe amotenondeha Ñandejára Rréino?” (Mateo 6:33, BNP).

2. Mbaʼépa omotenonde meme yvyporakuéra?

² Koʼág̃a rupi, hetaiterei ñande rapicha oĩva opárupi ‘oheka raẽ’ pe Rréino. Ojapo upéva omotenondévo hekovépe Ñandejára rembipota. Upéicharamo jepe, haimete enterove yvypóra omombaʼeve ko múndope oĩva. Oiko hikuái viru rapykuéri ha umi mbaʼe ikatúva ojogua heseve, térã oñemeʼẽmbaite peteĩ profesiónpe. Umi mbaʼe ojapóva ohechauka haʼekuéra ojepyʼapyha ijehénte, pe viru ha vyʼarãre. Ombotapykue Ñandejárape, oiméramo oguerovia Haʼe oĩha (Mateo 6:31, 32).

3. a) Mbaʼépa heʼivaʼekue Jesús hemimboʼekuérape ombyaty hag̃ua, ha mbaʼérepa? b) Mbaʼérepa natekotevẽi jajepyʼapyeterei umi mbaʼerepýre?

³ Oikuaa rupi umi mbaʼe ndaikatuiha jaiporu opa ára g̃uarã, Jesús heʼivaʼekue hemimboʼekuérape: “Ani pembyaty mbaʼeta ko yvy ári”. Ha upéi heʼi: “Pembyaty uvei mbaʼeta yvágape”, ha upéva jajapo jaservívo Jehovápe. Jesús heʼi chupekuéra ojesareko hag̃ua peteĩ mbaʼére añónte oñehaʼãmbaitévo Ñandejára oipotávare. “Ndaikatúi pembojerovia Ñandejárape ha mbaʼetápe avei”, heʼi chupekuéra. Péro mbaʼéichapa ohechavaʼerã hikuái umi mbaʼe oikotevẽva, umíva apytépe okaru ha oñemonde hag̃ua? ‘Ani pejepyʼapyve’, heʼi chupekuéra. Upe riremi heʼi avei omaña hag̃ua hikuái umi guyrakuérare, Ñandejára omongarúva, ha umi yvotykuérare, haʼe omoporãva. Ndovalevéi piko Ñandejára siervokuéra koʼã mbaʼe haʼe ojapovaʼekuégui? “Peheka raẽ [...] Ñandejára Rréino ha pe teko marangatu haʼe oipotáva, ha upéi oñemeʼẽvaʼerã avei peẽme opa koʼã mbaʼe”, heʼi Jesús (Mateo 6:19-34 , BNP). Ojehechápa nderehe regueroviaha upéva?

Ani jaheja ikangy pe jaikuaáva Ñandejára Rréinogui

4. Mbaʼépa ikatu ojehu ñamombaʼetereíramo umi mbaʼerepy?

⁴ Iporã jajepyʼapy jahupyty hag̃ua umi mbaʼe ñande ha ñane família oikotevẽva. Péro, jajepyʼapyetereíramo umi mbaʼére ikatu ñandegueraha vai. Jaʼéramo jepe jajeroviaha pe Rréino ojapótavare, péro nañamotenondéi upéva ñane korasõme, pe jaikuaáva Ñandejára Rréinogui ikangýta (Mateo 13:18-22). Pór ehémplo, peteĩ mburuvicha iviru hetáva oporanduvaʼekue Jesúspe: “Mbaʼépa ajapovaʼerã ahupyty hag̃ua pe tekove tapia g̃uarã?”. Pe kariaʼy heko potĩ vaʼekue ha imbaʼeporã hapicha ndive, péro ohayhueterei umi mbaʼe oguerekóva ha ndohejaséi omoirũ hag̃ua Jesucrístope. Upéicha ojavy pe oportunida ogoverna hag̃ua yvágape Cristo ndive. Jesús heʼivaʼekue upérõ: “Hasyete niko oike hag̃ua [Ñandejára] Rréinope umi mbaʼeta rerekoha” (Marcos 10:17-23, JMP).

5. a) Heʼihaguéicha Pablo Timotéope, mbaʼe orekóramopa ovyʼamavaʼerã, ha mbaʼérepa? b) Mbaʼéichapa Satanás ojapo pe ‘viru jehayhúgui’ peteĩ ñuhã ikatúva ñanehundi?

⁵ Heta áño ohasa rire apóstol Pablo ohai Timotéope, oĩvaʼekue Éfesope, peteĩ táva oñembaʼapo porãhápe. Pablo heʼi chupe: “Mbaʼeve niko ndajarúi jajúvo ko yvy ári, ha mbaʼeve ndajarahái. Jarekóramo jaʼu ha ñañemonde hag̃ua, javyʼamavaʼerã”. Iporã ñambaʼapo ‘jakaru ha ñañemonde hag̃ua’ ñande ha ñane família. Péro Pablo heʼi: “Umi imbaʼeretaséva katu hoʼa jepyʼaraʼãme ñuhãmeguáicha, ha ojecha heta mbaʼepota vaípe, oitýva chupekuéra pyʼatarovápe ha ñehundípe”. Satanás ikatupyry oporombotavy hag̃ua. Pyʼỹi oñepyrũ ombojuruheʼẽ vevuimi umi tapichápe ha upéi ojopy mbareteve. Ikatu pe tapicha otopa hembiaporã iporãvéva térã oganave hag̃uáme. Péro upearã oiporuvaʼerã pe tiémpo omboykevaʼekue Jehová servísiope g̃uarã. Ndajahechakuaáiramo, pe ‘viru jehayhueterei’ ikatu omokangy ñandehegui pe mbaʼe iñimportantevéva: ñane mborayhu Ñandejára Rréinore. Upévare Pablo heʼi: “Ha oime ku imbaʼepota rupi ojeivaʼekue Jesucristo reroviágui ha ogueru ijupe hetaiterei jeiko asy” (1 Timoteo 6:7-10).

6. a) Mbaʼépa jajapovaʼerã ani hag̃ua jaiko pe pláta rapykuéri? b) Jahechávo mbaʼéichapa ijetuʼu jaiko hag̃ua ko múndope, mávarepa jajeroviavaʼerã?

⁶ Ohayhu añetégui Timotéope, Pablo heʼi: “Ejei opa koʼã mbaʼégui. [...] Eñorairõ porã [nde jeroviáre]” (1 Timoteo 6:11, 12). Ñañehaʼãmbaitevaʼerã ani hag̃ua pe pláta rayhu oĩva ko múndope ipuʼaka ñanderehe. Ñañehaʼãramo ñande jeroviáre, Jehová nañanderejamoʼãi arakaʼeve. Ijetuʼuetereíramo jepe jakaru térã ñambaʼapo hag̃ua, haʼe omeʼẽta ñandéve ñaikotevẽva. Pablo heʼi: “Aníkena peheka virúnte; pevyʼa uvei perekomíva rehe [Ñandejára] haʼe pe heʼíva: ‘Arakaʼeve ndorohejaichéne, noromotyreʼỹichéne jepe’, ha ñande ikatu jaʼe jeroviápe: ‘Ñandejára haʼe pe chepytyvõva, ha ndakyhyjeichéne. Mbaʼépa ikatúne ojapo cherehe umi yvyporakuéra?’” (Hebreos 13:5, 6, JMP). Upéicha avei, pe rréi David heʼivaʼekue: “Chemitãvaʼekue, koʼág̃a katu chetujáma, ha ndahecháiva heko potĩva oikotevẽramo, térã taʼyrakuéra ojeruréramo upérupi hoʼuvaʼerã” (Salmo 37:25).

Ehémplo omoĩvaʼekue umi disípulo ymaguare

7. Mbaʼépa heʼivaʼekue Jesús hemimboʼekuérape ojapo hag̃ua opredika jave, ha mbaʼérepa oĩ porã upéva?

⁷ Ohekomboʼe porã rire umi apostolkuérape, Jesús omondo chupekuéra opredika hag̃ua pe marandu porã Israélpe ha heʼi hag̃ua: ‘Pe yvagapegua rréino oñemoag̃uíma’. Iporãitépa ko notísia! Jesucristo, pe Rréi oisãmbyhýtava, oĩ upépe hendivekuéra. Ombaʼapógui umi apostolkuéra Ñandejárape g̃uarã, Jesús heʼi chupekuéra ojerovia hag̃ua Jehová oñangarekotaha hesekuéra. Heʼi: “Ani peraha mbaʼeve tape rehe g̃uarã, yvyra popegua, térã vosa, térã pán, térã pláta. Peraha peteĩ kamisa año ha ani mokõi. Oimeraẽva óga peg̃uahẽháme, pepyta upépe peho peve” (Mateo 10:5-10; Lucas 9:1-6, BNP). Jehová omeʼẽta chupekuéra hemikotevẽ umi isrraelíta imbaʼeporãva rupive.

8. a) Mbaʼérepa heʼivaʼekue Jesús umi apóstolpe ijetuʼuvetaha chupekuéra opredika hag̃ua? b) Mbaʼépa omotenonde meme vaʼerã Jesús remimboʼekuéra?

⁸ Omano mboyvemi, Jesús heʼi umi apostolkuérape upe rire ijetuʼuvetaha chupekuéra opredika hag̃ua. Umi mburuvicha oñemoĩta hesekuéra, ha upévare ndahetamoʼãvéima Israélpe imbaʼeporãva hendivekuéra. Avei, oñepyrũtama opredika hikuái Ñandejára Rréino umi tetã ambuére. Upépe oguerahamavaʼerã hikuái “vosa” ha “pláta ryru”. Upéicharamo jepe, omotenonde meme vaʼerã Jehová Rréino ha Ihustísia, oikuaágui Ñandejára ovendesitaha chupekuéra oñehaʼãvo hembiʼurã ha ijaorãre (Lucas 22:35-37, BNP).

9. Mbaʼéichapa ohechauka Pablo omotenondeha pe Rréino hekovépe oñehaʼã aja ohupyty hemikotevẽ, ha upévare mbaʼépa heʼi umi ermanokuérape ojapo hag̃ua?

⁹ Apóstol Pablo ojapo Jesús heʼihagueichaite ha oñeʼẽ meme vaʼekue Ñandejára Rréinore (Hechos 20:24, 25). Upevére, og̃uahẽ vove peteĩ hendápe opredika hag̃ua, haʼe voi oñehaʼãvaʼekue hemikotevẽre ojapóvo umi óga kárpa. Nohaʼarõi iñermanokuéra oñangareko hese (Hechos 18:1-4; 1 Tesalonicenses 2:9). Upéicharamo jepe, ovyʼaiterei oñemeʼẽramo chupe opytami hag̃ua térã peteĩ rregálo (Hechos 16:15, 34; Filipenses 4:15-17). Pablo nomokyreʼỹi umi ermanokuérape omboyke hag̃ua ifamília predikasión rehehápe, upéva rangue, oipota oñatendekuaa koʼã mbaʼe oñondive. Heʼi chupekuéra tombaʼapo, tohayhu ifamília ha tombojaʼo oguerekomíva hapichakuéra ndive (Efesios 4:28; 2 Tesalonicenses 3:7-12). Omokyreʼỹ chupekuéra ojerovia hag̃ua Ñandejárare, ani pe virúre, ha tohechauka hembiapóre mbaʼépa iñimportanteve. Jesús omboʼehaguéicha, upéva heʼise omotenondevaʼerãha hekovépe Ñandejára Rréino ha ihustísia (Filipenses 1:9-11).

Ñamotenonde pe Rréino ñande rekovépe

10. Mbaʼépa heʼise jaheka raẽ pe Rréino?

¹⁰ Mboy tiémpopa jaiporuñaína japredika hag̃ua pe marandu porã Ñandejára Rréino rehegua? Upéva jajapóta ijaháicha ñandéve, ha avei ñamombaʼe añetéramo ko mbaʼe. Ñanemanduʼavaʼerã Jesús ndeʼirihague: “Peheka Ñandejára Rréino ndapeguerekói jave mbaʼeve pejapo hag̃ua”. Oikuaágui iñimportanteha pe goviérno, heʼi mbaʼépa oipota Itúva jajapo: “Peheka uvei [...] Ñandejára rréino” (Lucas 12:31, BNP). Ñaikotevẽramo jepe ñambaʼapo ñande ha ñane famíliape g̃uarã, imbaretéramo ñande jerovia, ñamotenondéta pe tembiapo omeʼẽvaʼekue Ñandejára ñañeʼẽvo Irréinore. Ha upéva jajapo aja, ñañangarekóta avei ñane famíliare (1 Timoteo 5:8).

11. a) Mbaʼéichapa ohechaukavaʼekue Jesús naentéroi ikatutaha opredika peteĩcha? b) Mboy tiémpopa japredikavaʼerã?

¹¹ Oĩ ikatúva opredika hetave pe marandu porã Rréino rehegua. Ohechauka hag̃ua ko mbaʼe, Jesús ombojojavaʼekue umi tapicha ikorasõ porãva pe yvy porãre, ha heʼi koʼãva heñói porãtaha. Mbaʼeichaitépa? Naentéroi peteĩcha. Oĩ imitãva ha itujáva, hesãiva ha hasýva, ifamíliava ha avei oguerekoʼỹva. Upéicharõ jepe, ñamombaʼe añetéramo pe Rréino, ikatúta heta mbaʼe jajapo (Mateo 13:23).

12. Mbaʼépa oñemokyreʼỹ umi mitãrusukuérape ojapo hag̃ua?

¹² Iporã jahecha mbaʼéichapa ikatu japredikave, ha ñañehaʼã jajapo upéva. Umi mitãrusu ojepyʼamongetavaʼerã pe ehémplo porã Timoteo omoĩvaʼekuére (Filipenses 2:19-22). Iporãitereíta ojagarráramo iprekursorádo omohuʼã rire ijestúdio kolehiopegua. Umi okakuaapámavape avei oipytyvõta oñehaʼãramo ojapo koʼã mbaʼe.

13. a) Mávapa odesidivaʼerã upe jajapótava Ñandejárape g̃uarã? b) Jaheka raẽramo pe Rréino, mbaʼépa jahechaukáta?

¹³ Jaikorangue ñañeʼẽ vai umi ñaimoʼãvagui ikatuha ojapove Jehovápe g̃uarã, ñande voi ñañehaʼãvaʼerã jaservi porãve Ñandejárape (Romanos 14:10-12; Gálatas 6:4, 5). Jahechahaguéicha Job ohasavaʼekuére, Satanás heʼi ñamombaʼeveha viru, komodida, ha jajepyʼapyha ñandejehénte, ha upéicha jaserviha Ñandejárape omeʼẽguinte ñandéve koʼã mbaʼe. Upévare jaheka raẽramo pe Rréino, ñaipytyvõta ojehecha hag̃ua Satanás tuichaiterei ijapuha, ojehechátagui ñanderehe ñamombaʼeveha umi mbaʼe jajapóva Jehovápe g̃uarã. Ha jahechaukáta avei ñane ñeʼẽre ha jajapóvare mbaʼeichaitépa jahayhu Jehovápe. Ojehecháta avei jaipotaha haʼe ñanesãmbyhy ha jahayhuha ñande rapichápe (Job 1:9-11; 2:4, 5; Proverbios 27:11).

14. a) Mbaʼérepa iporã ñamboyke peteĩ tiémpo japredika hag̃ua? b) Mboy tiémpopa opredika heta testigo de Jehová?

¹⁴ Ñamohenda porãramo umi mbaʼe jajapótava, jaiporu porãvéta ñane tiémpo. Jehová voi oguereko peteĩ tiémpo ojapo hag̃ua hembiapo (Éxodo 9:5; Marcos 1:15). Ikatúramo, iporã ñamboyke peteĩ día káda semána ñasẽ hag̃ua japredika. Hetaiterei testigo de Jehová opárupi oservi precursor auxiliar-ramo, ha upéicha opredika pe marandu porã mokõi óra rupi káda día. Ha oĩ avei hetaiterei precursor regular, opredikáva haimete mbohapy óra káda día. Umi precursor especial ha misionéro katu oiporu hetave tiémpo ko tembiapópe. Ñande avei ñañehaʼãvaʼerã ñamombeʼu opa ohendusévape umi mbaʼe porã oguerútava Ñandejára Rréino (Juan 4:7-15). Hiʼãvaʼerã ñandéve jajapo opa ikatúva, jaikuaágui Jesús heʼihague: “Pe marandu porã [Ñandejára Rréino] rehegua oñemoherakuãta opárupi ko yvy jerekuévo, opa tetãygua ohendu hag̃ua. Upe rire ae, og̃uahẽta pe ára paha” (Mateo 24:14; Efesios 5:15-17).

15. Mbaʼéichapa ñanepytyvõ pe konsého oĩva 1 Corintios 15:58-pe japredika hag̃ua?

¹⁵ Testigo de Jehová oĩva ko Yvy tuichakuére, tahaʼe haʼéva pe tetã oikoha, ojapo oñondivepa ko tembiapo ijojahaʼỹva. Oiporu hikuái ko konsého oĩva Ñandejára Ñeʼẽme: “Aipórõ, che pehenguekuéra ahayhúva, penembaretéke ha ani pepyta tapépe. Koʼẽ koʼẽvévoke pembaʼapove Ñandejárape g̃uarã. Peẽ niko peikuaa, ndareiriha opa pejapóva [...] Ñandejára ndive” (1 Corintios 15:58).

Ñanemanduʼa hag̃ua

• Heʼírõ guare Jesús “peheka raẽ pe [...] rréino”, mbaʼépa oipotavaʼekue ñambotapykue?

• Mbaʼéichapa jahechavaʼerã umi mbaʼe ñande ha ñane família oikotevẽva? Mbaʼéichapa ñanepytyvõta Ñandejára?

• Mbaʼépa ikatu jajapo japredikave hag̃ua Ñandejára Rréino?

[Nóta oĩva taʼanga ndive páhina 107]

Testigo de Jehová opredika marandu porã opa tetã rupi ou mboyve pe fín