Kapítulo 19

Ñamombeʼu kyhyjeʼỹre Ñandejára ñeʼẽ

1. a) Mbaʼeichagua notísia porã rehépa oñeʼẽ Jesús remimboʼekuéra, péro mbaʼépa ojapo upévare umi hudío? b) Mbaʼépa ikatu ñañeporandu?

OJAPÓMA dos mil áño rupi Ñandejára oiporavohague ijespíritu rupive Itaʼýra Jesucrístope oisãmbyhy hag̃ua ko Yvy. Ojukaukáramo jepe chupe umi hudiokuéra rrelihión omoakãva, Jehová omoingove jey chupe umi omanovaʼekue apytégui. Ha upévare, Jesús rupive ikatu ojeiko opa ára g̃uarã. Péro Jesús remimboʼekuéra oñeʼẽrõ guare ko notísia porãre, oñepyrũ ojepersegi chupekuéra. Oĩ ojegueraháva kárselpe, oñembyepotíva ha ojeʼe chupekuéra anive hag̃ua oñeʼẽ Jesús rehe (Hechos 4:1-3, 17; 5:17, 18, 40). Mbaʼépa ojapo hikuái? Ndépa mbaʼe rejapovaʼerãmoʼã? Resegínepa repredika kyhyjeʼỹre?

2. a) Mbaʼeichagua notísia ijojahaʼỹvapa ojekuaaukavaʼerã koʼág̃a rupi? b) Mávapa omombeʼuvaʼerã umi notísia porã?

² Pe áño 1914-pe Jesucristo oñepyrũ oisãmbyhy Ñandejára Rréino yvágape iñenemigokuéra apytépe (Salmo 110:2). Upe rire, Satanás ha idemoniokuérape ojeity Yvy ape ári (Apocalipsis [Revelación] 12:1-5, 7-12). Upéicha ko múndo aña oikevaʼekue hiʼára pahápe. Ko ára opa vove, Ñandejára ohundietéta ko múndo aña oĩva Satanás poguýpe (Daniel 2:44; Mateo 24:21). Upépe nomanóiva ikatúta oikove opa ára g̃uarã peteĩ paraísope ko Yvy ape ári. Ha oiméramo remombaʼe ko notísia porã, katuete remombeʼuséta nde rapichakuérape (Mateo 24:14). Péro, nerendusénepa hikuái?

3. a) Mbaʼépa ojapo heta ñande rapicha japredika vove chupekuéra? b) Mbaʼépa ñañeporanduvaʼerã?

³ Remombeʼúvo nde rapichakuérape umi mbaʼe porã oguerútava pe Rréino, oĩta umi ohenduséva, péro hetavéta ohenduseʼỹva (Mateo 24:37-39). Oĩta oñembohorýva térã oñemoĩva nderehe. Jesús heʼivaʼekue umi opuʼãva nderehe ikatuha oĩ nde rógape voi (Lucas 21:16-19). Ikatu avei oĩ ne mbaʼapohápe térã nde eskuélape. Oĩ avei lugár umi goviérno ndohejaihápe testigos de Jehová opredika. Rejehecháramo koʼã mbaʼépe, remombeʼu memétapa Ñandejára ñeʼẽ kyhyjeʼỹre ha ‘nembaretétapa nde jeroviápe’? (1 Corintios 16:13.)

Ani jajerovia ñandejehénte

4. a) Mbaʼépa ñaikotevẽ jaservi porã hag̃ua Ñandejárape? b) Mbaʼérepa tuichaite mbaʼe umi rreunión ojejapóva kongregasiónpe?

⁴ Jaservi porã hag̃ua Jehovápe, tekotevẽ jajerovia umi mbaʼe haʼe omeʼẽvare. Umíva apytépe oĩ umi rreunión ojejapóva kongregasiónpe. Upévare Ñandejára Ñeʼẽ heʼi ñandéve ñañembyaty meme hag̃ua (Hebreos 10:23-25). Umi testigos de Jehová ojepytasóva Ñandejára ykére oñehaʼã oñembyaty meme iñermanokuéra ndive. Umichahápe jaikuaave Ñandejára Ñeʼẽgui, hesakãve ñandéve umi mbaʼe jaikuaámava ha jahechakuaave mbaʼérepa iporã jajapo upépe ojeʼéva. Avei, ñanemombarete jajapo hag̃ua Ñandejára rembipota, ñamombaʼeguasu hag̃ua chupe oñondivepa, ha jahayhuve ñane ermanokuérape. Jehová espíritu ñanesãmbyhy kongregasión rupive, ha pe espíritu rupive, Jesús avei oĩ ñanendive (Mateo 18:20; Apocalipsis [Revelación 3:6]).

5. Mbaʼépa ojapo testigos de Jehová oñembyaty hag̃ua umi tetã ndaikatuihápe opredika?

⁵ Ndépa reho meme umi rreunionhápe ha rejapópa upépe ojeʼeháicha? Umi tetã ndojehejaihápe testigos de Jehová opredika, sapyʼánte oñembyatyvaʼerã hikuái mbovymi umi ogaha rupi. Ikatu umi rreunión ndojejapói peteĩ hendápe térã peteĩ órapente, ha sapyʼánte ojejapo pyharepytéma. Péro, ijetuʼu ha ohasa asýramo jepe, umi ermáno ijerovia mbaretéva oñehaʼãmbaite oho umi rreunionhápe.

6. Mbaʼéichapa jahechauka jajeroviaha Jehováre, ha mbaʼéichapa ñanepytyvõ upéva japredika hag̃ua kyhyjeʼỹre?

⁶ Ñamombarete hag̃ua ñande jerovia Jehováre, jajepokuaavaʼerã ñañemboʼe chupe ñande pyʼaite guive. Upéva jajapóta jahechakuaa rupi ñaikotevẽha haʼe ñanepytyvõ. Ndépa rejapo upéva? Jesús pyʼỹi oñemboʼevaʼekue oĩrõ guare ko Yvy ape ári (Lucas 3:21; 6:12, 13; 22:39-44). Pe pyhare ojejuka mboyve peteĩ yvyráre, heʼi hemimboʼekuérape: “Ani peke ha peñemboʼe ani hag̃ua mbaʼeve pene pyʼa raʼã” (Marcos 14:38). Ndajatopáiramo ohenduséva Ñandejára ñeʼẽ, ikatu ñanemokangy japredika hag̃ua. Upéicha avei, oĩramo oñembohory ha ñandepersegíva, ikatu ndajapredikasevéi ani hag̃ua ñane provléma. Ñandepuʼaka hag̃ua koʼã mbaʼére, jajerurevaʼerã Jehovápe ñande pyʼaite guive tañanepytyvõ ijespíritu rupive japredika hag̃ua kyhyjeʼỹre (Lucas 11:13; Efesios 6:18-20).

Opredika hikuái pyʼaguasúpe

7. a) Mbaʼérepa iñimportánte ñandéve g̃uarã pe lívro hérava Hechos? b) Embohovái umi porandu, ha ehechauka mbaʼéichapa ikatu ñanepytyvõ

⁷ Pe lívro hérava Hechos iñimportánte ñandéve g̃uarã omombeʼúgui umi apóstol ha disipulokuéra ohasavaʼekue. Haʼéramo jepe ñandeichaguánte avei, haʼekuéra ipyʼaguasuvaʼekue ombohováivo heta mbaʼe vai ha ohechauka upéicha oservi añeteha Jehovápe. Ñahesaʼỹijo michĩmi upe lívro koʼã porandu ha téysto rupive, ha jahecha mbaʼéichapa ikatu ñanepytyvõ.

Iñaranduetereiparakaʼe umi apostolkuéra? Ikatupyryparakaʼe hikuái ijehegui reínte ombohovái hag̃ua oimeraẽ mbaʼe? (Juan 18:17, 25-27; 20:19; Hechos 4:13.)

Mbaʼérepa Pedro ndokyhyjeivaʼekue oñeʼẽ hag̃ua umi hudío mburuvichápe ojukaukavaʼekue Ñandejára Raʼýpe? (Mateo 10:19, 20; Hechos 4:8.)

Mbaʼépa ojapovaʼekue oikóvo umi apóstol ojegueraha mboyve umi mburuvicha renondépe? (Hechos 1:14; 2:1, 42.)

Umi mburuvicha heʼírõ guare umi apóstolpe anive hag̃ua oñeʼẽ Jesús rérape, mbaʼépa ombohovái chupekuéra Pedro ha Juan? (Hechos 4:19, 20.)

Ojepoi rire chuguikuéra, mávapepa ojerure umi apóstol oipytyvõ hag̃ua chupekuéra? Ojerurépa anive hag̃ua ojepersegi, térã mbaʼépa ojerure hikuái? (Hechos 4:24-31.)

Mbaʼéichapa Jehová oipytyvõvaʼekue hembiguaikuérape oĩrõ guare ojokoséva predikasión? (Hechos 5:17-20.)

Mbaʼéichapa ohechaukavaʼekue umi apóstol oikuaaha mbaʼérepa ojepoi chuguikuéra? (Hechos 5:21, 41, 42.)

Mbaʼépa osegi ojapo umi disípulo isarambipavaʼekue ojepersegírõ guare chupekuéra? (Hechos 8:3, 4; 11:19-21.)

8. Mbaʼéichapa osẽvaʼekue umi kristiáno ypykue rembiapo, ha mbaʼérepa ñande avei ikatu jajapo upe tembiapo?

⁸ Umi notísia porã ojepredikavaʼekue ndopytareíri. Ojevautisa rire tres mil disípulo rupi áño 33-pe Pentecostés árape, “hetave ohóvo umi ojeroviáva Ñandejárare, kuimbaʼéva ha kuñáva” avei (Hechos 2:41; 4:4; 5:14). Upe rire, peteĩ kuimbaʼe opersegi mbarete vaʼekue Ñandejára rembiguaikuérape ojevy ha oiko chugui kristiáno. Heravaʼekue Saulo de Tarso, ojekuaáva upe rire apóstol Pábloramo. Haʼe oñepyrũvaʼekue opredika kyhyjeʼỹre (Gálatas 1:22-24). Péro upe tembiapo oñepyrũvaʼekue síglo primérope ndopái upépe. Koʼág̃a rupi oñembaʼapo mbaretevéntema ha oñeg̃uahẽma opa henda rupi ko Yvy ape ári. Ñandéve g̃uarã tuichaiterei mbaʼe jajapo ko tembiapo, ha upekuévo ñanerekomboʼe avei pe ehémplo omoĩvaʼekue umi Ñandejára testígo ymaguare.

9. a) Mbaʼeichahápepa Pablo opredikavaʼekue? b) Mbaʼéichapa nde repredika reikóvo?

⁹ Mbaʼépa ojapovaʼekue Pablo oikuaa porãrõ guare mávapa Jesucristo? “Oñepyrũ oñemoñeʼẽ [...] heʼívo Jesús [...] Ñandejára Raʼyha.” (Hechos 9:20.) Oagradesevaʼekue Jehovápe oiporiahuverekohaguére chupe, ha ohechakuaa opavave oikotevẽha ohendu umi notísia porã haʼe oikuaaramóva. Pablo hudío vaʼekue, ha upe tiémpope ojepokuaaháicha hikuái, oho opredika umi hudío ijatyhápe. Avei opredika umi óga ha merkadoha rupi. Haʼe oĩvaʼekue oho hag̃uáicha oimehápe omosarambi pe notísia porã (Hechos 17:17; 20:20; Romanos 15:23, 24).

10. a) Mbaʼéichapa ohechauka Pablo ipyʼaguasu ha imbaʼerechakuaaha opredika jave? b) Mbaʼéichapa ikatu jajapo Pablo ojapohaguéicha japredika jave ñande rogayguápe, umi ombaʼapóvape ñanendive ha ñane irũnguéra eskuelapeguápe?

¹⁰ Pablo ipyʼaguasu ha imbaʼerechakuaavaʼekue, ha ñande upéicha vaʼerã avei. Oñeʼẽ jave umi hudíope, imanduʼa Ñandejára oprometevaʼekuére umi ijypykuépe. Oñeʼẽ jave umi griégope katu, imanduʼa umi mbaʼe haʼekuéra oikuaávare. Ha opredika hag̃ua, heta vése omombeʼu mbaʼéichapa oikuaavaʼekue pe añetegua Ñandejáragui. Heʼi: “Ajapo opa koʼã mbaʼe pe [marandu porã] rehehápe, ahupytyuka hag̃ua che rapichakuérape avei” (1 Corintios 9:20-23, BNP; Hechos 22:3-21).

11. a) Mbaʼépa ojapo Pablo ani hag̃ua manterei ombohovái umi oñemoĩvape hese? b) Mbaʼéicha javépa iporãta jajapo Pablo ojapohaguéicha, ha mbaʼéichapa? c) Mávapa ñanemombarete ñañeʼẽ hag̃ua pyʼaguasúpe?

¹¹ Oĩrõ guare oñemoĩ mbaretéva hese, Pablo ovánte upégui osegi hag̃ua opredika, ha upéicha ndoikói ombohovái chupekuéra manterei (Hechos 14:5-7; 18:5-7; Romanos 12:18). Upéicharõ jepe, haʼe notĩrivaʼekue opredika hag̃ua pe marandu porã (Romanos 1:16). Ndogustáiramo jepe chupe mbaʼéichapa hovaʼatã ha iñaña umi oñemoĩva hese, ‘Ñandejára oipytyvõ chupe omombeʼu hag̃ua hembipota pyʼaguasúpe’. Heʼi: “Ñandejára katu, oĩ che yke rehe, chemyenyhẽ mbaretégui, [Ñandejára] Marandu porã og̃uahẽ hag̃ua opa tetãre che rupi” (1 Tesalonicenses 2:2; 2 Timoteo 4:17, JMP). Koʼág̃a rupi, Jesús, pe kongregasión omoakãva, ñanemombarete jajapo hag̃ua pe tembiapo (Marcos 13:10).

12. Mbaʼéichapa ohechauka peteĩ kristiáno ipyʼaguasuha, ha mbaʼérepa upéicha?

¹² Oĩ heta mbaʼe ñanemokyreʼỹva jasegi hag̃ua japredika kyhyjeʼỹre Ñandejára ñeʼẽ, ojapohaguéicha Jesús ha heta oservivaʼekue Ñandejárape upe síglo primérope. Upéva ndeʼiséi nañamombaʼemoʼãiha ñande rapichápe térã japredikataha mbaretépe umi nohenduséivape. Péro heʼise ndajahejamoʼãiha ñanemokangy umi ndoikuaaséiva mbaʼeve térã ñanemokirirĩ umi oñemoĩva ñane rembiapóre. Ojapohaguéicha Jesús, ñamombeʼu Ñandejára Rréino añoite ogovernavaʼerãha ko Yvy. Ndajakyhyjéi ñañeʼẽ hag̃ua jahágui Jehová rérape, pe Mburuvicha Guasu, jaikuaágui pe ñamombeʼúva nosẽiha ñandehegui rei, ouha uvei chugui. Ha pe mbaʼe iñimportantevéva, ani ñanderesarái ñamombaʼeguasuha Ñandejárape jahayhúgui chupe (Filipenses 1:27, 28; 1 Tesalonicenses 2:13).

Ñanemanduʼa hag̃ua

• Mbaʼérepa tekotevẽ jaikuaauka ñande rapichakuérape umi mbaʼe porã oguerútava pe Rréino, péro mbaʼépa avei ñahaʼarõ?

• Mbaʼéichapa jahechauka ndajajeroviaiha ñandejehénte jaservi hag̃ua Jehovápe?

• Mbaʼépa ñanemboʼe pe lívro hérava Hechos?

[Nóta oĩva taʼanga ndive páhina 173]

Jehová rembiguaikuéra koʼag̃agua ha ymaguare omombeʼu kyhyjeʼỹre Ñandejára ñeʼẽ