¿Máva mávapa oikove jeýta? ¿Ha moõpa oikóta hikuái?

KAPÍTULO 34 ha 35-pe jahecha kuri oñemoingove hague unos kuánto tapichápe. ¿Nemanduʼápa mboýpa raʼe?... Cinco. ¿Ha mboy mitã oĩ raʼe?... Mbohapy, ha ótro katu peteĩ mitãrusu. ¿Mbaʼépa ohechauka upéva?...

Ohechauka Ñandejára ohayhuha mitãnguéra ha mitãrusukuérape. Péro Ñandejára omoingove jeýta hína hetaiteve tapichápe. ¿Umi ivuénova añóntepa oikove jeýta?... Ikatu ñapensa upeichataha. Péro oĩ ningo noaprendejepéi vaʼekue Jehová ha Itaʼýragui, ha ojapo ivaíva oñemboʼégui chupekuéra upéicha. ¿Omoingove jeýnepa Jehová koʼãichaguápe?...

La Biblia heʼi “oñemoingove jeytaha umi hekojojáva ha hekojojaʼỹva” (Hechos 24:15). ¿Mbaʼérepa oñemoingovéta avei umi “hekojojaʼỹva” térã hembiapo vai vaʼekuépe?... Haʼekuéra ndorekojepéi rupi oportunida oaprende hag̃ua mbaʼépa Jehová oipota ojapo yvyporakuéra.

¿Arakaʼépa nde ere oñemoingove jeytaha umi omano vaʼekuépe?... Lázaro omanórõ guare, Jesús heʼi vaʼekue Mártape: “Ne ermáno opuʼã jeýta”, ha Marta heʼi chupe: “Che aikuaa oñemoingove jeytaha chupe pe ára pahápe” (Juan 11:23, 24). ¿Mbaʼérepa Marta heʼi oñemoingove jeytaha Lázarope “pe ára pahápe”?...

Marta ningo oikuaa vaʼekue Jesús opromete hague ‘opavave umi oĩva pe sepultúrape osẽtaha’ (Juan 5:28, 29). “Pe ára pahápe” Ñandejára omoingove jeýta umi omano vaʼekuépe. Kóva ndahaʼéi peteĩ día orekótava veinticuatro órante, síno peteĩ tiémpo ipukútava mil áño. La Biblia heʼi upe árape Ñandejára ‘ohusgataha entéro yvypórape’. Koʼã ojehusgátava apytépe oĩta avei umi oñemoingove jey vaʼekue (Hechos 17:31; 2 Pedro 3:8).

¡Ajépa hetaite mbaʼe porã oikóta upe tiémpope! Pe mil áño pukukue oñemoingove jeýta hetaiterei tapichápe. Jesús heʼi vaʼekue umi oikove jeýva oikotaha peteĩ paraíso térã hardínpe. ¿Moõpa oĩta pe paraíso? Jahechamína.

Tres óra rupi omano mboyve, Jesús oñeʼẽ pe paraísore peteĩ kuimbaʼe oñemosaingóvape avei ijykére. Pe kuimbaʼe hembiapo vai ha upévare ojedesidi ojejuka vaʼerãha chupe. Péro ohendúvo umi mbaʼe porã ojeʼéva Jesús rehe ojerovia hese ha heʼi chupe: “Jesús, nemanduʼákena cherehe reike vove ne Rréinope”. Haʼe ombohovái pe kuimbaʼépe: “Añetehápe haʼe ndéve koestedía: Reiméta chendive pe paraísope” (Lucas 23:42, 43, nóta).

¿Mbaʼépa heʼise raʼe Jesús? ¿Moõpa oĩta pe paraíso?... Epensamína ko mbaʼére: ¿moõpa oĩ raʼe yma pe paraíso?... Oiméne nemanduʼa Ñandejára omoĩ hague Adán ha Évape peteĩ hardín neporãvape ko yvy ape ári. Pe lugár héra vaʼekue hardín de Edén. Upépe oĩ kuri heta mymba imánsova. Oĩ avei yva hetereíva ha peteĩ rrío tuicháva. Pe paraíso ningo peteĩ lugár iporãiterei vaʼekue (Génesis 2:8-10).

Upéicharõ, Jesús heʼírõ guare pe kuimbaʼépe oĩtaha pe paraísope, heʼise hína oikotaha peteĩ hardín neporãvape ko yvy ape ári. ¿Oĩtapa Jesús pe kuimbaʼéndi pe paraísope?... Nahániri. ¿Reikuaápa mbaʼérepa?...

Jesús ningo oĩta yvágape ha upe guive ogovernáta ko yvy ape ári. Haʼe omoingove jeýta pe kuimbaʼépe ha omeʼẽta chupe opa mbaʼe oikotevẽva. Upévare heʼi vaʼekue oĩtaha hendive. Péro ¿mbaʼérepa ohejáta oiko pe paraísope peteĩ hembiapo vai vaʼekue?... Jahechamína mbaʼérepa.

Oñeʼẽ mboyve Jesús ndive, ¿oikuaápa raʼe pe kuimbaʼe mbaʼépa Ñandejára oipota ojapo?... Nahániri. Upévare ojapo heta mbaʼe vai. Péro pe paraísope oñemboʼéta chupe oikuaa hag̃ua Ñandejárape, ha péicha orekóta oportunida ohechauka hag̃ua ohayhúpa chupe térãpa nahániri.

¿Oikótapa pe paraísope enterove umi oñemoingove jeýva?... Nahániri. ¿Reikuaápa mbaʼérepa?... Pórke oĩta oñemoingovéva oiko hag̃ua Jesús ndive yvágape ha ogovernáta hendive upe guive ko yvy ape ári. Jahechamína mbaʼérepa jaʼe upéva.

Pe pyhare omano mboyve, Jesús heʼi ijapostolkuérape: ‘Che Ru rógape oĩ heta lugár ojepyta hag̃ua ha che aháta aprepara pene rendag̃ua’. Ha upéi opromete chupekuéra: “Aju jeýta ha porresivíta che rógape, ikatu hag̃uáicha peẽ peime che aĩháme avei” (Juan 14:2, 3).

¿Moõpa oho raʼe Jesús oñemoingove jey rire chupe?... Oho jey yvágape Itúva rendápe (Juan 17:4, 5). Upéicharõ, Jesús opromete vaʼekue ijapostolkuérape ha hetave idisípulope oikove jeytaha hikuái oĩ hag̃ua hendive yvágape. ¿Mbaʼépa ojapóta upépe?... La Biblia heʼi koʼã “tenondete oikove jeýva” oikotaha yvágape ‘ha ogovernáta Jesús ndive mil áñore’ ko yvy ape ári (Apocalipsis 5:10; 20:6; 2 Timoteo 2:12).

¿Mboýpa oĩta umi “tenondete oikove jeýva” apytépe?... Pe Mboʼehára Guasu heʼi vaʼekue idisipulokuérape: “Ani pekyhyje, peẽ che ovechakuéra mbovymi, pende Ru odesidíma omeʼẽtaha peẽme pe Rréino” (Lucas 12:32). La Biblia ohechauka porã “ciento cuarenta y cuatro mil” tapicha ohotaha yvágape ogoverna hag̃ua Jesús ndive. Haʼe ohenói vaʼekue koʼãvape “ovechakuéra mbovymi” (Apocalipsis 14:1, 3).

¿Mboy héntepa oikóta pe paraísope ko yvy ape ári?... La Biblia ningo ndeʼíri mboýpa. Péro jaikuaa Ñandejára heʼi hague Adán ha Évape oĩ aja gueteri pe paraísope ifamília hag̃ua ha tomyenyhẽ ko yvy. Haʼekuéra ndajapói kuri upéva. Péro Ñandejára okumplíta la heʼi vaʼekue ha ko yvy henyhẽta hénte ivuénovagui (Génesis 1:28; Isaías 45:18; 55:11).

¡Ajépa igustoitéta pe paraísope! Ko yvy tuichakuégui oikóta peteĩ hardín neporãva ha henyhẽtéta pype umi yvoty ha yvyramáta iporãitereíva, oĩta avei hetaiterei guyraʼi ha opaichagua mymba. Ndaiporimoʼãvéima ni peteĩ hasýva ni omanóva. Ha enterovéva oñoamigopáta. Jaikoséramo opa árare pe paraísope jajapo vaʼerã koʼág̃a Jehová heʼíva.